00:00:00 IGIHE NETWORK KN KINYARWANDA EN ENGLISH FR FRANCAIS

Amateka y’Igikombe cy’Isi mu bihe 10 by’ingenzi

Yanditswe na IGIHE
Kuya 16 Ugushyingo 2022 saa 04:53
Yasuwe :

Mu 1930 ni bwo Igikombe cy’Isi cyatangiye gukinwa. Kuva icyo gihe hari byinshi byasigaye mu mitwe ya benshi bitewe n’amateka abakinnyi bacyitabiriye bagiye bandika mu bihe bitandukanye.

Igikombe cy’Isi kigiye gukinwa ku nshuro ya 22, aho kizabera muri Qatar ku wa 20 Ugushyingo kugeza ku wa 18 Ukuboza 2022.

Iri rushanwa riyoboye andi ya ruhago ku Isi ryitabirwa n’ibihugu 32, bikina imikino 64 mbere y’uko hamenyekana uryegukana.

Mu gihe habura iminsi mike ngo Igikombe cy’Isi gitangire, muri iyi nkuru tugiye kugaruka ku bihe 10 by’ingenzi byaranze inshuro 21 kimaze gukinwa.

 1966: Hurst yatsinze igitego kitavuzweho rumwe

Umukino wa nyuma w’Igikombe cy’Isi cyo mu 1966 wabereye mu Bwongereza.

Ubwo wari ugeze ku munota wa 110 mu y’inyongera, u Bwongereza n’u Budage byawuhuriyeho byanganyaga ibitego 2-2.

Abongereza bari kuri Stade Wembley bariruhukije nyuma y’uko Rutahizamu wabo Geoffrey Hurst yateye ishoti rikomeye muri metero nka 20, umupira ukubita umutambiko w’izamu mbere y’uko ugaruka mu kibuga mbere yo gukurwaho na ba myugariro b’u Budage.

Umusifuzi wo hagati yifashishije mugenzi we uwo ku ruhande wemeje ko ari igitego kuko umupira warenze umurongo.

U Bwongereza bwatsinze uwo mukino ku bitego 4-2 by’u Budage. Sir Geoffrey Charles wenyine yatsinze ibitego bitatu, aba uwa mbere wanditse amateka yo kubona ‘hat trick’ ku mukino wa nyuma, agahigo yihariye kugeza n’ubu.

Igitego cya Sir Geoffrey Charles, ubu ufite imyaka 80, cyavugishije benshi cyane ko muri icyo gihe nta koranabuhanga ryariho ryashoboraga kwerekana ukuri.

Nyuma y’imyaka 30 ni bwo Abongereza b’abahanga mu by’Ikoranabuhanga bagaragaje amashusho yatunganyijwe mu buryo bugaragara, ibizwi nka 3D, banzura ko umupira wari warenze umurongo.

  1970 : Gordon Banks yakuyemo umupira wibukwa mu mateka

Igikombe cy’Isi cyabereye muri Mexique mu 1970 cyasize amateka yagizwemo uruhare n’abarimo Pelé, Umunye- Brésil ufatwa nk’umukinnyi w’ibihe byose muri ruhago.

Ubwo Brésil yakinaga n’u Bwongereza mu mukino wa kabiri w’amatsinda, Pelé yabonye amahirwe imbere y’izamu ariko umupira ukomeye yateresheje umutwe wakuwemo n’Umunyezamu w’u Bwongereza Gordon Banks mu buryo butangaje.

Kugeza na n’ubu, icyo gikorwa yakoze gifatwa nk’ubutabazi bukomeye umunyezamu yahaye ikipe ye mu kinyejana cya 20.

  1970: Pelé yahetse Brésil

Edson Arantes do Nascimento uzwi nka Pelé yafashije igihugu cye cya Brésil kwegukana Igikombe cy’Isi cyo mu 1970 cyabereye muri Mexique.

Uyu musaza w’imyaka 82, muri icyo gihe yari mu ikipe y’igihugu yegukanye Igikombe cy’Isi itsinze u Butaliyani 4-1. Cyari icya gatatu yegukanye nk’umukinnyi.

  1982 : Umunyezamu Harald Schumacher yakoze igikorwa “cy’ubusazi”

Mu Gikombe cy’Isi cyo mu 1982 cyabereye muri Espagne, u Bufaransa bwahuriye n’u Budage ku mukino wa ½.

Ibihugu byombi byanganyije ibitego 3-3 ariko u Budage butsinda kuri penaliti.

Icyasigaye mu mitwe ya benshi ni igikorwa cyiswe icy’ubusazi cyakozwe n’Umunyezamu w’u Budage, Harald Schumacher wakubise inkubara Umufaransa Battiston wari ugiye kumutsinda, umupira ukajya hanze y’izamu.

Platini wari uhangayikishijwe n’inshuti ye yahise isohorwa mu kibuga, icyo gihe yarize amarira menshi ndetse nyuma y’umukino yahishuye ko yari afite ubwoba bw’ubuzima bwe.

  1986: U Bufaransa na Brésil, umukino waryoheye Isi kurusha indi

U Bufaransa bwarimo abakinnyi bakomeye nka Fernandez-Tigana-Giresse na Platini bwahuye na Brésil ya Zico, Junior, Socrates na Careca muri ¼ cy’Igikombe cy’Isi cyabereye mu Mujyi wa Guadalajara muri Mexique mu 1986.

Uyu mukino ufatwa nk’umwe mu ikomeye mu mateka y’Igikombe cy’Isi, warangiye u Bufaransa bunganya na Brésil igitego 1-1, ariko iki gihugu cyo ku Mugabane w’u Burayi cyawutsinze kuri penaliti 5-4.

  1986: Maradona yinjiye mu bitabo by’amateka

Igikombe cy’Isi cyo mu 1986 cyabereye muri Mexique gifatwa nk’icyiza mu byabayeho.

Ni cyo nyakwigendera Diego Maradona yandikiyemo amateka akomeye kuko ku mukino wa ¼ wahuje igihugu cye n’u Bwongereza yatsinze igitego akoresheje ukuboko cyiswe “Ikiganza cy’Imana”.

Muri uwo mukino kandi Maradona yacenze abakinnyi barindwi b’u Bwongereza mbere yo gutsinda igitego cya kabiri cya Argentine. Ibi byose yabikoze mu minota itanu.

  1998: Zidane yisasiye Brésil

Mu Gikombe cy’Isi cya 1998, Umufaransa Zinedine Zidane yashegeshe Brésil ayitsinda ibitego bibiri wenyine mu mukino wa nyuma warangiye igihugu cye gitsinze ibitego 3-0.

  2006: Umutwe wa Zidane

Nyuma y’imyaka umunani, u Bufaransa butsinze Brésil, Zinedine Zidane yari ahanzwe amaso nk’ushobora gufasha igihugu cye gutwara Igikombe cy’Isi cya kabiri.

U Bufaransa bwahuriye n’u Butaliyani ku mukino wa nyuma aho Zidane yandikiyemo amateka yo gukubita umutwe Marco Materazzi nyuma yo kumutuka. Yahise ahabwa ikarita itukura ndetse igihugu cye gitsindirwa kuri penaliti.

  2014: Brésil yanyagiriwe mu rugo

Igikombe cy’Isi cya 2014, Brésil ni yo yacyakiriye ishaka icya gatandatu mu mateka yayo.

Brésil yahabwaga amahirwe yahuye n’uruva gusenya kuko yatsinzwe n’u Budage ibitego 7-1, intsinzwi ikomeye yagize mu mateka yayo mu Gikombe cy’Isi.

  2018: Mbappé yagoye Argentine

Igikombe cy’Isi cya 2018 cyabereye mu Burusiya cyegukanywe n’u Bufaransa. Kimwe mu bihe byibukwa harimo ibitego Kylian Mbappé, yatsinze mu mukino wa ¼ warangiye “Les Bleus” itsinze Albicelestes ibitego 4-3.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .