00:00:00 IGIHE NETWORK KN KINYARWANDA EN ENGLISH FR FRANCAIS

Migeprof yasabye abagore kwima amatwi ababaca intege bababwira ko badashoboye

Yanditswe na Mwizerwa Gilbert
Kuya 8 Werurwe 2018 saa 07:53
Yasuwe :
0 0

Minisitiri w’Uburinganire n’Iterambere ry’Umuryango, Nyirasafari Esperance, yasabye abagore gukomeza gutinyuka imirimo ibateza imbere kabone nubwo hari ababaca intege mu mikorere yabo, bakarushaho kwitabira imyuga nk’inzira y’umurimo utanga akazi kabageza ku iterambere.

Ubu butumwa yabutanze birori by’Umunsi Mpuzamahanga w’Umugore ku rwego rw’igihugu, wabereye mu Karere ka Muhanga, mu Murenge wa Shyogwe, abagaragariza ko abagore n’urubyiruko ari imbaraga zihagije ngo igihugu gitere imbere igihe zakoreshwa neza.

Minisitiri Nyirasafari agaragaza ko hari inkunga zigenerwa abagore ariko ntibazibyaze umusaruro kubera ko hari ababaca intege mu miryango ngo batitabira imwe mu myuga isa n’iyahariwe abagabo, nyamara n’umugore uyikora ashobora kwiteza imbere.

Atanga urugero ku bagore bize gukora imyuga itandukanye bamaze kwiteza imbere kandi hakaba hari n’abakomeje kuyiga kandi bagaragaza icyizere cy’uko bazayibyaza umusaruro.

Yagize ati “ Mufite byose na leta irahari ngo ibunganire cyane mugaragaze ubushake mu byo mukora mubinoze. Dufite ikigega nka BDF kibunganira, bityo hatagira ubaca intege.”

Uwizeramariya Monique, umugore wize imyuga akaba abibyaza umusaruro akanayigisha mu kigo cyigisha imyuga cya Kabgayi, yavuze ko yatinyutse kwiga ibijyanye n’amashanyarazi none akaba ageze ku rwego rwo gupiganira amasoko yo gushyira amashanyarazi mu mazu ndetse kuri ubu akaba yunganira umuryango we mu buzima bwa buri munsi.

Umunyamabanga wa Leta muri Minisiteri y’Uburezi ushinzwe amashuri y’ubumenyingiro, Olivier Rwamukwaya, yatangaje ko leta yiteguye kongera umubare w’aya mashuri agaragaramo umubare w’abakobwa mu byiciro bitandukanye aho mu maka wa 2020 abazaba biga muri aya mashuri bazaba bikubye gatatu.

Yakomeje avuga ko leta ku bufatanye n’abikorera igiye kubaka amashuri 10 asanga andi atatu y’ubumenyingiro ku rwego rwisumbuye.

Mu gushyigikira abagore n’abakobwa biga imyuga muri gahunda ya NEP Kora wigire, bahawe ibikoresho by’ubwubatsi, ubudozi, gukora amazi no kubaka bya miliyoni 66, ku bufatanye na BDF aho baziyishyurirwa 50%.

Hanahembwe abakobwa 10 (Inkubito z’Icyeza) babaye aba mbere mu mashuri yisumbuye buri umwe ahabwa mudasobwa igendanwa n’ibindi bihembo bagenewe na Imbuto Foundation.

Ibi birori byitabiriwe n'abayobozi mu nzego zitandukanye
Guverineri w'Intara y'Amajyepfo, Mureshyankwano Marie Rose
Minisitiri w’Uburinganire n’Iterambere ry’Umuryango, Nyirasagari Esperance, yongeye gusaba abanyarwandakazi kwima amatwi ababaca intege
Umunyamabanga wa Leta muri Minisiteri y’Uburezi ushinzwe amashuri y’ubumenyingiro, Olivier Rwamukwaya
Abagore bize imyuga bahawe ibikoresho bazifashisha mu gutangira ibyo bize
Abakobwa 10 batsinze neza mu mashuri yisumbuye bahawe ibihembo
Rwamukwaya Olivier atanga ibikoresho ku barangije amashuri y'ubumenyingiro
Minisitiri w’Uburinganire n’Iterambere ry’Umuryango, Nyirasagari Esperance, atanga ibihembo ku Nkubito z'Icyeza
Abakobwa biga mu ishuri rya muzika i Muhanga basusurukize abitabiriye ibirori by'uyu munsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .