NTAWAZIMYA URWO ATACANYE

Yanditswe na
Kuya 11 Gashyantare 2016 saa 05:00
Yasuwe :
0 0

Wateraga akajisho hirya no hino ukakirwa n’urusobe rw’amajwi atandukanye,ikirere cyose cyari gitatswe n’amabara y’utunyoni twaririrmbaga, warabyitegerezaga amatsiko akarushaho kuba menshi kubw’urugendo twari twiteguye(Picnic), buri wese wabonaga akeye afite ibineza neza ku maso.

Ubwo iruhande rwanjye hari hahagaze umusore, aranyegera tuba twiganirira dutegereje abashinzwe kutuyobora ko baza.

Mu gihe nari ntegereje kumva ko anyibwira, twahise dutangira guhabwa amabwiriza y’uko biri bugende nuko buri wese yitwara, urugendo ruba ruratangiye, nagiye kubona mbona haje umukobwa mwiza utagira ukwasa, w’imisatsi miremire afata wa musore akaboko ati “bebe twagiye, kandi umenye ko ninduha uribumpeke” wa musore aba aramusubije ati “ariko ntukiteteshe ngo ukabye”umukobwa araseka.

Twahise dutangira urugendo wa musore aba aransezeye ati “sawa rero ubwo turacyari kumwe”. Ako kanya ibitekerezo byanjye byahise biba nkibihindutse ntagira kugenda nirebera uwo musore w’igikwerere, n’uburyo yagendaga… Inseko ye n’ijwi rye byatangiye kugenda bigaruka mu ntekerezo zanjye, uko abandi bagendaga baganira bareba ingagi, bafotora n’ibirunga,njye nasaga nkudahari, uko twarushagaho kuzamuka umusozi niko nagendaga nanirwa ari nako ubukonje bwiyongera.

Byagezaho numva imbaraga nari mfite zirashize, nicara hasi, umwe mu bari bashinzwe kuduherekeza batuyoboye aranyegera ambaza uko meze, musubiza ko ntameze neza ahubwo mubwira ko nifuza kuba nasubira inyuma, arambwira ati “ngaho gerageza turebe ko wagera aho twahagurukiye” yaransindagije aranjyana anshyira mu cyumba cyiza ngo mbe nduhuka ahita agenda.

Abo twari kumwe bakomeje urugendo, wa musore yararanganya amaso mu bantu ntambone, yaje kumenya ko narwaye nkasubira inyuma. Urugendo rwabaye rwiza bababazwa n’uko tutari kumwe.

Bakigaruka wa musore yifuje kumenya amakuru yanjye, nagiye kubona mbona bamuzanye mu cyumba aho nari ndyamye asanga nibwo nkicura nagaruye n’akabaraga, aba aransuhuje ati banyita MANZI nti nanjye banyita INEZA, Twakomeje kuganira ambaza uko byangendekeye anambwira uko urugendo rwagenze…

Haciye akanya gato bahita bahamagara abantu bose kuri reception ngo bajye gufata imfunguzo z’icyumba bararamo, MANZI ntiyabashije kurufata kuko yari yaje kundeba, wa mukobwa yararumufatiye arumuzanira mu cyumba cyanjye aje no kureba uko meze, ntiyahatinze yahise ansezera ambwira ko ananiwe cyane agiye kwiyuhagira akaba aruhutse, naramushimiye ndamubwira nti ngaho genda uruhuke kandi Imana iguhe umugisha.

Yahise abwira MANZI ngo “bebe nugire ikibazo nafashe imfunguzo z’ibyumba byegeranye, ngiye kukubikira ibintu nuva aha umpamagare nkurangire” narabyumvishije numva ndababaye cyane kuko urukundo rwari rwatangiye kungurumanamo ariko ndiyumanganya.

Byagezaho mbwira MANZI ngo agende nawe ajye kwitegura arebe n’icyumba bamufatiye ariko bwari uburyo bwo kumwirukana ngo mbone uko ndira kuberako nari nafushye. Yahise afata numero yanjye ambwira ko ampamagara kuri njye numvaga atari ngombwa kuyitunga kuko nabonaga nakunze urudashoboka.

Akimara kugenda negetseho umuryango ndarira koko. ntangira kwibaza ukuntu amuhamagara bebe, noneho akaba yanafashe ibyumba byegeranye umutima wanjye wenda gusandara; byagezaho banzanira amafunguro ya nimugoroba ariko kurya birananira.

Abashinzwe amacumbi babajije niba hari uwandaza kuko bitari mu nshingano zabo kwita kuwaharembeye, habura numwe kuko bose bari bananiwe ariko MANZI yemera kundaraho.Byageze nka saa tanu zijoro mbona MANZI aragarutse afite laptop, ecouteur nagashashi mu ntoki, arinjira abitereka ku meza arambwira ati nkuzaniye twa pomme, kandi bambwiye ko nza kukuraraho utaza kuremba akurura intebe anyicara iruhande, igitima cyanjye cyatangiye kudiha nibaza ukuntu andaraho bugacya nti uyu musore wemeye kundaraho atanzi kandi namubonanye n’umukobwa arabifata ate? Ese aho sinaba ngiye gusenya urugo rwabandi? Ariko ngerageza kwiyumanganya.

Yafashe bya biryo atangira kungaburira ari nako anyumvisha uturirimbo twiza,yambara aka ecouteur kamwe anyambika akandi, twumvaga akaririmbo tuzi twese tukakaririmba tugaseka, ariko nari mfite ibanga kumutima.

Nahise numva umutima wanjye usubiye mu gitereko ariko uko nitegerezaga MANZI yagaragazaga umunaniro, numva ngize impuhwe mubwira ko meze neza musaba ko yajya kuruhuka; yaranyemereye aransezera ajya kuryama.

Bwarakeye twese duhurira ku ma bus dusezeranaho ngo dutahe, MANZI araza arampobera, aransoma, ampereza agapapuro. Nageze muri bus ntangira kugasoma kari kuzuye imitoma uko nakomezaga gusoma nageze aho yavugaga ati “burya nkikubona nabaye nk’ubonekewe,nakubonye nk’umukobwa utangaje,uwo umutima wanjye wifuza, kukwitaho no kukuba hafi suko nari nabitegetswe numvaga ari inshingano zanjye tu es mon amour…...”

Nanjye nageze mu rugo mwoherereza imitoma nkumukunzi wanjye mubwira ko mukunda kandi nzakomeza kumukunda…….; uko iminsi yahitaga niko twakomeje kuvugana cyane, no gusohokana urukundo rwacu rushinga imizi.

Umunsi umwe bwari gucya st valentin ikaba, arampagara nkibisanzwe ati cherie wanjye ejo nimugoroba ndashaka ko hari ahantu uzamperekeza, ndagusabye ntuzagire indi gahunda ufata cyangwa ngo umpakanire, yabaye nkuworosora uwabyukaga nahise mwemerera.

Bwarakeye ngiye kumwandikira ngo mubaze uko yaramutse mbona yashize ifoto ya wa mukobwa kuri watsapp. Narabibonye numva ndarembye, agahinda karanyica ndavuga ngo kubona MANZI atinyuka gushira uriya mukobwa kuri watsapp ku munsi w’abakundana ubwo niwe nyine akunda njyewe ntago ankunda; mfata ingamba zuko ngiye gufunga telefone na gahunda yari yansabye ko muherekeza mwihorere nanjye mubabaze; byageze nka saa munani arampamagara ndamwihorera, aranyandikira ndamwihorera….

Byagezaho bimurenze aza kundeba mu rugo ngo amenye ibyabaye, ansanga mu cyumba ati honey koko byagenze bite nkuhamagare wange kunyitaba, nkwandikire wange kunsubiza? Nahise nturika ndarira ndamubwira nti iyo nza kumenyako ukunda abandi bakobwa simba naratakaje umwanya wanjye nkukunda, ati ese abo bakobwa uvuga ni bande? N’umujinya mwinshi mba mweretse ya photo yo kuri watsapp ye nti erega wibwirako ndumwana, uyu mukobwa mwirirwa mukururukana ,yirirwa aguhamagara za bebe wibwirako ibyo byose ntabyo mbona? Nti mva imbere rero genda mukomeze inkundo zanyu njyewe undeke.

Yubitse umutwe araceceka mbona amarira amuzenze mu maso, nakomeje kumwitegereza mbona arababaye; yahise ambwira amateka mabi yanyuzemo uko bishe ababyeyi n’abavandimwe be bose; ati iyo photo uncyurira, uyu ni mushiki wanjye UMUTONI, ndamukunda kuko niwe wenyine nsigaranye ku isi, uyu munsi n’isabukuru ye y’amavuko ngomba kumwereka urukundo atabonye ku babyeyi bacu kuba anyita bebe, niko banyitaga ndi umwana ……

Atararangiza inkuru, nahise muhobera turarira, ndamusoma ndamuhanagura mubwira ko ntazongera kumubabaza kandi nta rira rye rizongera kugwa kubera njye.
Nahise nitunganya vuba vuba, tuba tugiye gusangira tuhageze nsanga ni surprise yari yaduteguriye n’ UMUTONI, Amuha gift yari yamuteguriye iherekejwe n’amagambo meza UMUTONI arishima cyane…

Nuko mbona MANZI yinyabije hanze azanye ururabyo ruhumura neza ambwira amagambo y’urukundo …ati ndagira ngo uyu munsi nkuhamirize ko nta mukobwa wundi nahariye umutima wanjye uretse wowe, nzagukunda kugeza ku mwuka wanjye wa nyuma. Ampereza ururabyo anyambika impeta nk’impano y’urukundo yari yanteguriye.

Nabuze icyo navuga kuko amarangamutima y’ibyishimo yari yambanye menshi naramuhobereye gusa mwongorera ko mukunda, iryo joro gutandukana byaratunaniye byarangiye ngiye kwirarira kwa MANZI kuva uwo munsi, buri munsi kuri twe ni st valentin kugeza igihe Imana izaduha umugisha tukitwa umugabo n’umugore.


Kwamamaza

Kwamamaza

Izindi nkuru wasoma

Inkuru ziheruka - Love Stories Competition

URUGEMWE RW’IMANA
12/02/16 - 04:13
MON ELDORADO
11/02/16 - 07:50
WANTOJE KUBA UMUGABO
11/02/16 - 07:30
NARAROSE
11/02/16 - 06:00
EMERA NKOMORE IBIGUMA
11/02/16 - 04:32
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza