Inzozi mpamo kuri Miss Iradukunda Elsa na Iradukunda Liliane bitabiriye bwa mbere Rwanda Day (Video)

Yanditswe na Nsengiyumva Emmy
Kuya 4 Ukwakira 2019 saa 11:46
Yasuwe :
0 0

Miss Iradukunda Elsa wegukanye ikamba rya Nyampinga w’u Rwanda mu 2017 na Iradukunda Liliane yarisigiye mu 2018, berekeje mu Budage aho bazahurira n’ibihumbi by’Abanyarwanda muri Rwanda Day bitabiriye ku nshuro ya mbere.

Ku mugoroba wo ku wa Kane, tariki 3 Ukwakira 2019, nibwo Miss Iradukunda Elsa na Iradukunda Liliane bashinguye ikirenge ku Kibuga Mpuzamahanga cy’Indege cya Kigali i Kanombe berekeza mu Mujyi wa Bonn ahazabera Rwanda Day ku wa 5 Ukwakira 2019.

Mbere yo guhaguruka i Kigali mu kiganiro bagiranye na IGIHE, aba bakobwa bose bahurije ku kuba ari urugendo bahoze barota rwo kwitabira igikorwa cyagutse kiganirirwamo iterambere ry’igihugu.

Miss Iradukunda Elsa yavuze ko kwitabira Rwanda Day byahoze mu nzozi ze nkuko buri Munyarwanda wese abyifuza.

Ati “Kwitabira Rwanda Day ni ibintu mpa agaciro kuko hari benshi babyifuza ariko ntibabigereho. Dufite gahunda yo kuganira n’urubyiruko tukareba icyaduteza imbere cyane nk’Abanyarwanda. Ibyo tuzitaho cyane ni ibijyanye no kurwanya n’ibiyobyabwenge n’inda zitateganyijwe.’’

Iradukunda Liliane we yavuze ko ari amahirwe yo guhura n’ababa mu mahanga no kurebera hamwe ahakenewe ubufatanye.

Ati “Nahoze nifuza kujya muri Rwanda Day kureba uko imeze. Iyi ibaye nka ba nyampinga twaravuze tuti tugomba kujyayo ngo turebe uko imeze n’ibyo twasangiza abandi.”

Miss Iradukunda Liliane na Iradukunda Elsa berekeje mu Budage basangayo Miss Rwanda 2019 Nimwiza Meghan wamaze kugera mu Mujyi wa Bonn.

Aba bakobwa b’uburanga bavuze ko nta gahunda bafite yo gutanga ibiganiro ariko amahirwe yose bazabona yo guhura n’urubyiruko rwo muri Diaspora bazayabyaza umusaruro, bakaruganiriza byinshi ku Rwanda n’iterambere ry’igihugu muri rusange.

Usibye ba nyampinga berekeje mu Budage, mu bamaze kugerayo barimo abahanzi nka Intore Masamba, Jules Sentore, Charly na Nina, King James, Bruce Melodie na Igor Mabano bose bagiye gususurutsa abazitabira Rwanda Day. Aba bazafatanya na Dj Princess Flor uzaturuka mu Bubiligi, Kitoko Bibarwa ubarizwa mu Bwongereza n’abandi.

‘Rwanda Day’ ni umunsi umaze kumenyerwa nk’uhuza Abanyarwanda bo mu gihugu, ababa mu mahanga n’inshuti z’u Rwanda, bagahuzwa n’intego imwe yo kuganira ku cyarushaho guteza imbere igihugu cyabo.

Kuva mu 2010, uyu munsi wasize amateka akomeye mu mpande zose z’isi, yaba muri Leta Zunze Ubumwe za Amerika no mu Burayi aho wabereye. Umaze kwitabirwa n’abasaga ibihumbi 35 mu nshuro icyenda imaze kuba.

Miss Iradukunda Elsa na Iradukunda Liliane berekeje muri Rwanda Day i Bonn mu Budage aho biteze guhurira n'urubyiruko no kuganira ku ngingo zitandukanye zigamije kubaka u Rwanda
Aba bakobwa bahagurutse ku Kibuga Mpuzamahanga cy'Indege cya Kigali i Kanombe bafite akanyamuneza

Indi nkuru wasoma: Rwanda Day: Ab’inkwakuzi bamaze gusesekara i Bonn, intero ni u Rwanda (Amafoto)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza