Hatangijwe ‘YEGO Delivery’, uburyo bwihuse bugeza serivisi n’ibicuruzwa ku babikeneye i Kigali

Yanditswe na Habimana James
Kuya 11 Gicurasi 2020 saa 06:20
Yasuwe :
0 0

Nyuma y’aho icyorezo cya Coronavirus kigereye mu gihugu, ubucuruzi bwaba ubunini ndetse n’ubuciriritse bwagizweho ingaruka zikomeye, ariko biba akarusho ku nzego zimwe.

Imibare igaragaza ko nibura abamotori bagera kuri 99% babuze akazi, kubera ko badashobora gutwara abagenzi kuko abantu babujijwe kwegerana hirindwa Coronavirus.

Ku rundi ruhande abantu bakeneye uburyo bwo kubagezaho ibiribwa n’izindi serivisi mu ngo, kubera ko bagombaga kuguma ngo kuko ingendo zitari ngombwa zitari zemewe.

Mu rwego rwo gufasha abo bamotari, Ikigo Yego Innovision Limited, cyatangije gahunda yo kubaha amahugurwa kugira ngo batangire gukora ubucuruzi bugeza ku bantu ibicuruzwa, ibi byakozwe kuva gahunda ya guma mu rugo yatangira.

Iki kigo kivuga ko intego nyamukuru ari ukugira ngo abamotari bige uko bakomeza kwirinda coronavirus, gusobanukirwa guhana intera mu gihe hari ibyo barimo gutanga no kumenya uko bakomeza kugira isuku igihe cyose.

Yego Innovision kandi ivuga ko yashyizeho uburyo buhamye ku buryo nta muntu ushobora gufata ku mafaranga, hagamijwe gukomeza kurinda ubuzima bw’abakiriya n’abamotari.

Yagize iti “Abashoferi bacu bose bambara udupfukamunwa kandi bagakoresha amazi yabugenewe asukura intoki mbere y’uko batanga ibicuruzwa.”

“Kugeza ubu dufite moto zirenga 50 mu Mujyi wa Kigali zitanga ibicuruzwa na serivisi ahantu hatandukanye, kandi abazitwara bose bahawe amahugurwa. Ikibazo cyabanje kubaho ni uko kugira ngo tubone ibyo tujyanamo ibyo tuba twasabwe n’abakiriya byabaye ikibazo ariko turizera ko mu mezi make, moto zacu ziyongera zikagera ku 1000.”

Yego Innovision ivuga ko na nyuma yo gusoza mu Mujyi wa Kigali, bateganya kwagura ibikorwa na serivizi mu yindi mijyi yo mu Rwanda.

Iti “Intego ni ukugera kuri buri muntu kandi tugatuma bakomeza kwishimira no gusobanukirwa neza guhaha mu buryo bw’ikoranabuhanga. Kugeza ubu twamaze gufatanya n’ibigo birenga 60 harimo za restaurants, amahahiro, za farumasi n’ibindi. Intego yacu ni ugufasha ibigo bito n’ibiciriritse ndetse n’ibigo bitanga ibicuruzwa bitandukanye.”

Yego Innovision ivuga ko “Nubwo porogaramu za telefoni n’urubuga rwa internet bikirimo kubakwa, uyu munsi umuntu ashobora gufata telefoni iyo ariyo yose akaba wakwishyura ibyo akeneye, yewe ntibinasabe ko aba ufite interinet.”

Iyi gahunda ikora ite?

YEGO Innovision ivuga ko icyo ukora ari uguhamagara umucuruzi, ugasaba icyo ukeneye warangiza ukishyura. Iyo urangije nibwo uvuga uti “Ndashaka ko YEGO ingezaho ibyo nasabye.”

“Uwo mucuruzi ageza kuri YEGO ya nomero yawe ya telefoni, umuntu wacu ako kanya araguhamara ukavuga neza aho uherereye, ibyo watumije bikugeraho mu gihe kitarenze iminota 60.”

YEGO ivuga ko “Mu by’ukuri twakoze ubugenzuzi kuri serivizi dutanga hafi ukwezi kose, twasanze ibyo umuntu yatumije bimugeraho mu minota 35, hejuru y’ibyo kandi kubera ko abashoferi bacu batwarira umuntu umwe ibyo yatumije, bisobanuye ko nk’ibyo uba watumije bikugeraho bigishyushye kandi bikimeze neza. Abashoferi bacu nabo bungukira ku nshuro bagenze, bakagira amahirwe yo kubona ibibatunga n’imiryango yabo.”

Inzira eshatu zikoreshwa

Uburyo bwa mbere ni uko umukiriya ahamagara umucuruzi agasaba ibyo akeneye, yarangiza akishyura mu buryo bwa mobile money, inzira ya kabiri ni uko umucuruzi yohereza nomero yawe kuri Whatsapp ya YEGO, naho inzira ya gatatu ni uko umushoferi wa YGEO afata ibyasabwe akabigeza ku mukiriya.

YEGO ivuga ko amafaranga yo kugera aho uwasabye ibicuruzwa ari, yibara bitewe n’urugendo ruva aho umucuruzi ari kugera ku mukiriya.

Umukiriya ashobora kwishyura akoresheje MTN Mobile Money, Airtel Money, MTN Tap & Pay, cyangwa Yego moto Ride-Tap-Pay n’ubundi buryo.

YEGO itangazo ko ishyize ingufu mu gufasha icyerekezo cya guverinoma cy’uko u Rwanda ruba igihugu gishingiye mu ikoranabuhanga.

Iki kigo kivuga ko cyiyemeje gutanga serivizi zitandukanye ku baturage kandi mu buryo bufite umutekano, kubagezaho ibiryo, imiti n’ibindi kandi bigakorwa n’abashoferi bahuguwe.

Yego Delivery ni uburyo bukugezaho ibicuruzwa na serivisi aho uri hose muri Kigali
Ubu buryo burihuse kandi burahendutse
Kwishyura hakoreshwa ikoranabuhanga mu kwimakaza gahunda yo kudahererekanya amafaranga mu ntoki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .