Umwiryane, gucikamo ibice n’umuvumba w’amarira; ibyaranze imyaka 8 RNC imaze ishinzwe

Yanditswe na IGIHE
Kuya 24 Nzeri 2019 saa 07:16
Yasuwe :
0 0

Imyaka umunani irihiritse umutwe wa RNC uvutse. Abawushinze barimo Patrick Karegeya, Kayumba Nyamwasa, Théogène Rudasingwa na Gahima Gérald hamwe n’abiyemeje kubayoboka muri iyi myaka banyuze mu bigeragezo byinshi byaje kubaviramo inzira y’umusaraba, birangira bamwe bakuwemo umwuka, abandi bukana inabi, bacitsemo ibice ku buryo umugambi bari bafite kuri ubu wababereye nk’ibya wa wundi wagerageje gukama ikimasa.

- Imvo n’imvano y’Imiborogo no gucikamo ibice muri RNC.

- Museveni, Papa mushya muri batisimu w’abarwanya u Rwanda.

- RNC mu runana na Chieftency of Military Intelligence ya Uganda mu gukorera iyicarubozo Abanyarwanda.

- Impamvu Rudasingwa yatutse Kayumba kuri nyina!

- FARDC yasongeye RNC mu mashyamba ya Congo.

RNC abayishinze bavugaga ko ari ihuriro ry’abanyarwanda rigamije impinduka mu Rwanda binyuze mu nzira z’amahoro. Ujya gushingwa, wari urangajwe imbere n’abagabo bane, bose bafite ikintu kimwe cyangwa bibiri bahuriyeho.

Théogène Rudasingwa, Kayumba Nyamwasa, Gérald Gahima, na Patrick Karegeya nibo bari ku ruhembe rw’ishingwa rya RNC mu 2010, umugambi wabo bawunogereza muri Leta Zunze Ubumwe za Amerika, batangira ibikorwa ubwo.

Mu bandi harimo kandi nka Jérôme Nayigiziki, Gervais Condo, Jonathan Musonera, Joseph Ngarambe, Dr. Emmanuel Hakizimana na Jean Paul Turayishimye.

Iri huriro ryabo baritangirije mu Mujyi wa Bethesda muri Leta ya Maryland, aho bari bihaye intego yo “kuzana impinduka za politiki mu Rwanda” nk’uko bigaragara mu mahame remezo n’imirongo ngenderwaho bari biyemeje icyo gihe iganisha ku cyo bitaga “u Rwanda rushya”.

Urupfu rwa Patrick Karegeya rwashegeshe RNC yari imwizeyeho kuba ikiraro cy'imikoranire n'ibindi bihugu

Icyita rusange ku bashinze RNC

Bane mu bari ku isonga ry’abashinze RNC bose babaye mu buyobozi bukuru bw’u Rwanda, babuvamo ku mpamvu zinyuranye, buri wese azinga utwangushye agana iy’ubuhunzi.

Kayumba Nyamwasa yigeze kuba Umugaba Mukuru w’Ingabo, Théogène Rudasingwa yabaye Ambasaderi w’u Rwanda muri Leta Zunze Ubumwe za Amerika n’Umuyobozi mu Biro bya Perezida wa Repubulika; Gérald Gerald yabaye Umushinjacyaha Mukuru ndetse n’Intumwa Nkuru ya Leta na Patrick Karegeya wigeze gushingwa ubutasi mu gisirikare.

Bashinze uyu mutwe batanguranwa n’igihe kugira ngo bajijishe amahanga bikinze inyuma y’ishusho y’abatavuga rumwe na Leta, kuko u Rwanda rwari ruri kubakurikirana ku byaha bitandukanye.

Mu 2011, Urukiko rwa Gisirikare rwakatiye Kayumba na Rudasingwa igifungo cy’imyaka 24 no kwamburwa impeta za gisirikare. Gahima na Patrick Karegeya bo bahanishwa igifungo cy’imyaka 20.

Tumenyereye ko abashinga imitwe ya politiki baba baharanira demokarasi n’amahame y’uburenganzira bwa muntu, ariko usesenguye neza aba bane bo bari bahuriye ku kindi kintu gikomeye kuri bo, ariko kinasekeje ku rundi ruhande: Kwijundika Kagame.

Impamvu bashingiraho zabonwa na buri wese, kuko akenshi hari ubwo abantu bakosa, ababakuriye bagerageza kubasubiza mu murongo, aho kurakara ku bwo gukosa, bakarakara ku bwo gukosorwa. Ni ko byagenze kuri aba bagabo bane.

Bavuye i Kigali bakwepa! Kibuno mpa amaguru…

Senateri Tito Rutaremara ni umwe mu bantu bazi neza iby’aba bagabo kuko bakuze ababona, baba abayobozi muri leta imwe ndetse banahura kenshi.

Muri Nzeri 2010, yigeze kuva imuzi impamvu zagiye zituma bafungwa, icyo gihe we yari akiri Umuvunyi Mukuru mbere y’uko aba Umusenateri.

Karegeya yafashe inzira y’ubuhinzi avuye muri Gereza, bivugwa ko icyo gihe yari amaze umwaka umwe afunguwe azira gusuzugura abamukuriye, niko guhita yerekeza iya Uganda ahari ababyeyi be, ararorongotana agera muri Afurika y’Epfo.

Ibya Gahima Gérard byo ni birebire uhereye ku buryo uyu mugabo wize amategeko yinjiye mu myanya y’ubuyobozi bukuru mu rwego rw’ubutabera; ibyo byo ni ibindi bindi ntitwabigarukaho ngo tubirangize.

Mbere y’uko nawe ava mu Rwanda, yari mu nkiko na BCR kubera gufata imyenda mu buryo bw’uburiganya, aho ngo hari umwenda yanditse ku mubyeyi we (nyina) kandi arengereje imyaka 70 y’amavuko, bikaba byari binyuranije n’amategeko.

Rudasingwa nawe ntari kure aha, abazi ibye neza bamwibukira ku buriganya mu iyubakwa ry’ibikorwa remezo bikomeye birimo na Hotel Intercontinental (Serena tubona ubu), ifaranga ryaratikiriye karahava abigizemo uruhare.

Yari ageze ku kigero cyo kwandika imitungo ku bantu batari bo, byigeze no gutuma afungwa, acitse umunyururu, nawe ayabangira ingata.

Ni uko byagenze no kuri Kayumba Nyamwasa, nawe wakoze amakosa akomeye mu gisirikare, bikiyongeraho ibijyanye no kwigwizaho imitungo, ku buryo iyo badakomwa mu nkokora ugereranyije na apeti [appetit/appetite] bari bafite, aba bagabo magingo aya baba bihariye nka 3/10 cy’ubukungu bw’u Rwanda ahari!

Kayumba Nyamwasa yavuye mu Rwanda ahunga ubutabera nyuma y'amakosa menshi yari amaze kumugaragaraho

Icengezamatwara no guhuzagurika bitewe no kubura umurongo

RNC ikimara kujyaho, yatangiye gushaka uko igaba amashami hirya no hino, ikora ku bantu bose bavuye mu Rwanda bahunga ubutabera n’abandi b’imburamukoro batuye iyo mu mahanga, basobanurirwa ko ariyo makiriro babonye, maze amashyushyu aba menshi, uwari ufitiye u Rwanda umutima mubi, awukuba kabiri.

Uhereye muri Amerika ukagera muri Afurika, hose bagiye bahashyira abayobozi. Urugero nko muri Afurika y’Epfo, umuhuzabikorwa yari Abdallah Seif Bamporiki, Robert Mukombozi ari ushinzwe Australia, Rudasingwa Alexis areberera u Bubiligi, Jean Pierre Mushimiye ari mu Bwongereza, Patrick Uwalilaye muri Canada, Eugène Munyangoga muri Denmark n’ahandi gutyo.

Byarakomeje maze bigera no mu kwiyegereza indi mitwe n’amashyaka atemewe mu Rwanda nayo agamije inabi ku gihugu maze bunga ubumwe ariko bwari bufite ikindi buhatse.

Mu 2012 RNC yatangiye imikoranire na FDU-Inkingi ya Ingabire Victoire wari ufungiye mu Rwanda, icyo gihe igikorwa byose byagenzurwaga na Dr. Nkiko Nsengimana wari Umuhuzabikorwa wayo.

Nyuma yaho yiyunze n’indi mitwe irimo Amahoro PC, PS-Imberakuri igice cya Ntaganda Bérnard, PDP-Imanzi n’indi nkuko byanagaragajwe na raporo ya Loni ya 2018 ko bafite umutwe bahuriyeho wa P5; bose intego yari uguteza umutekano n’imvururu mu gihugu, bahungabanya umutekano.

Bashatse imbaraga ahantu hose, ndetse mu minsi ishize mu 2017 havuzwe imikoranire ya RNC ya Kayumba na Diane Rwigara bashaka kureba uko bateza umwuka mubi mu baturage bifashishije akarimi n’ikimero by’umukobwa.

Kutumvikana, kuryana no gucikamo ibice

Iri huriro nk’uko ryiyita, uko iminsi yagiye isimburana, ryatangiye kuzamo urunturuntu. Byatangiriye ku rupfu rwa Patrick Karegeya mu mpera za 2013, bisa n’aho abari bawugize babuze igice kimwe cy’umubiri kuko yari umuntu uzi gucengera dore ko ariwe wabafashije kugera kuri Jakaya Kikwete wayoboraga Tanzania.

Nyuma y’aho gato, ku ya Mbere Nyakanga 2016 n’ibyo bikomere bitarakira, Kayumba na Rudasingwa barashwanye karahava. Bijya binavugwa ko Rudasingwa yigeze gutuka Kayumba ibitutsi bikomeye umuntu atatinyuka kwandika binavamo ugicikamo kabiri k’uyu mutwe.

Kayumba nk’uwabaye umusirikare ukomeye yari ashyigikiwe n’abandi babaye abasirikare, hanyuma Rudasingwa nawe afite abasivili bamuri inyuma. Uko niko bakoraga.

Muri Nyakanga 2016, Rudasingwa yanditse avuga ko uyu mutwe wasubiye inyuma ku buryo budasanzwe mu myaka itanu yari ishize, ukagira “ubuyobozi bubi butigeze bubaho”.

Inyandiko ye yo ku ya 1 Nyakanga 2016, yavugagamo ibintu biteye ubwoba bisa naho umuriro wakaga muri RNC, binagaragaza uburyo iri huriro ridafatika.

Rudasingwa yashyize Kayumba mu majwi ko yashinze agatsiko k’Abatutsi bahoze mu gisirikare kahawe kuyobora RNC nubwo ubuyobozi bwari busanzweho bwageragezaga kugatesha agaciro, ku buryo bisa “nk’aho Kayumba yaremeye ishyaka mu rindi.”

Kayumba nawe yashinjaga Rudasingwa ko hari agatsiko yashinze agamije kumuvana ku buyobozi bwa RNC ubwo yari akiyiyoboye cyane cyane mu myaka ibiri yari ishize, akamushinja kumusuzugura, kumutuka n’ibindi yavuze ko atari agishoboye kwihanganira.

Muri make, icyari kiriho icyo gihe ni ukuvuga ngo ni inde uyoboye hano, umusirikare ati “Sio maombi ni Order”, umusivili nawe ati “ntukange”. Ubwo bakizwa na nde ? Iminsi!

Gucikamo ibice kwa RNC n’ivuka rya New RNC

Kayumba Nyamwasa tariki 26 Nyakanga 2016, yashyize hanze ibibazo bivugwa muri RNC, ubuhemu bwa Rudasingwa washakaga gusenya iryo shyaka biciye mu gukurura amacakubiri ashingiye ku moko no gushaka kuryigarurira biciye mu kwanga amatora n’ibyayavuyemo.

Ubu bwumvikane buke bwatumye Rudasingwa amwiyomoraho, ashinga umutwe we yise New RNC, ajyana n’abari bamushyigikiye b’abasivili, abasirikare basigara mu rundi ruhande muri RNC ya Kayumba.

Yahise ashyiraho Komite y’agateganyo yo kuyobora New RNC mu gihe cy’iminsi 30 aho we yari Chairman, umwungirije ari Joseph Ngarambe naho Umunyamabanga ari Jonathan Musonera.

Bahise biyemeza kandi kwitandukanya n’umuntu uwo ariwe wese ushyigikiye Kayumba ndetse wemera amatwara ye.

Kayumba-Rudasingwa: Inkoni mu cyico

Kayumba na Rudasingwa ntibakunze guhuza na busa, buri wese yabaga ahiga undi, ashaka uko yamubirindura, ubundi ibindi bikazaza nyuma.

Kayumba yigeze gushinja Rudasingwa agasuzuguro, kutitabira inama kimwe no kwikanyiza.

Kayumba mu 2016 yiyemereye ko RNC yugarijwe n’ibibazo, Rudasingwa we yavuze ko ari ishyaka ryasabitswe n’urwango rushingiye ku moko, kudashyira hamwe n’ibindi.

Yavuze ko Rudasingwa yihutiye kubigaragaza mu itangazamakuru nyamara ngo we n’abo bafatanyije kwiyomora kuri Kayumba bagiye bakora ibikorwa bibi bakingirwa ikibaba.

Kayumba ati “Hari ibikorwa bibi bagiye bakora, twabagiriye ibanga ariko bo ntibaritugirira, n’ubu hari ibyo tutavuga kandi si uko bidahari, si uko tutabizi.”

Mu myaka yamaze muri RNC, Dr Rudasingwa ngo ntiyigeze ashyigikira demokarasi, atinya ko azasimburwa ku mwanya w’umuhuzabikorwa.

Abateruzi b’ibibindi muri RNC

Imvugo “Abateruzi b’ibibindi” yumvikanye igarukwaho kenshi na Twagiramungu Faustin, ashaka kuvuga abagaragu b’abandi. Muri RNC yakoreshwaga ku bantu badafite ijambo, Rudasingwa akabagereranya n’“abahutu” avuga ko bapfukiranywe n’agatsiko ka Kayumba.

Mu 2016 ihangana ryari rikajije umurego, Kayumba yigaramye utwo dutsiko ashinja Dr Rudasingwa ingengabitekerezo y’amoko n’igitugu no kwifashisha imvugo zigamije gutera ubwoba ndetse no kubiba urwango.

Ati “Igihe utangiye kuvuga ngo agatsiko k’Abatutsi bahoze ari abasirikare […] Ndetse umuntu umwise umwanzi w’abandi bantu, ugahindukira ngo agatsiko k’abateruzi b’abahutu. Izo mvugo zituma ibintu by’ubwoko bihabwa agaciro katari ko.”

Yongeye ati “Guhaguruka ukavuga ko uriya ntacyo avuze, ngo ni umuteruzi w’ibibindi ni agatsiko [...] Niba turi abanyagatsiko ntacyo bitwaye abo twasigaranye nabo bazaduhabura, ubwo butsiko buhagarare.”

Mu magambo ye yo ku wa 26 Nyakanga 2016, Kayumba yavuze ko “niba turi abateruzi b’ibindi ubwo bazatureka noneho dukore akazi, kuko bizeye ngo bamwe ni abaporofeseri, abandi ni abaganga, ariko kwita abantu abateruzi b’ibibindi mbona birimo gukabya. Hakwiye kubaho kubahana.”

Umunyenga w’intebe y’ubuyobozi wakongeje urwango ku bwa ‘Parrain’ Kikwete

Mbere y’uko Karegeya akurwamo umwuka, yari yaraceberegese agera kure, ahura na Perezida Zuma na Kikwete abagezaho igitekerezo cy’uyu mutwe wabo.

Kuri we ntibyari bigoye nk’umuntu wigeze gushingwa ubutasi mu gisirikare kuba yagera kuri aba bakuru b’ibihugu akaba yababwira icyo ashaka.

Bafashijwe na Kikwete wari ufite umugambi wo guhuza imitwe yose irwanya u Rwanda, ngo ikorere hamwe ariko icyakurikiyeho ni cyo gikomeye.

Abo muri RNC bariye akara ba Twagiramungu Faustin, Rusesabagina [nubwo yaje kubakubita icya semuhanuka], BEM Habyarimana Emmanuel wari ufite inshuti nyinshi muri FDLR, n’abandi bashaka gukora ihuriro ry’iyo mitwe yose n’amashyaka.

Ntibyatinze, kidobya ngo ba! Twagiramungu, Kayumba na buri wese wari ukomeye muri iryo huriro, yakoze ku isuti rye riteye agapasi, yitegura gusingira intebe y’ubuyobozi. Ubwinshi bw’abashakaga kuyobora bwari nka bimwe tujya tuvuga by’isoko n’amaduka ariko biza kurangira habuze n’umwe uyegukana kubera urupfu rwa Karegeya.

Yari umwe mu bantu bazi gutera igipindi unakunda gushyenga cyane bituma umugambi wose wari uhari ukendera, buri wese asubira mu mwanya we ibyo kwihuza birangira bityo nyuma bagenda bavuga uburyo batandukanye.

Kayumba yigeze kuvuga ko Rusesabagina yavuye muri uyu mugambi avuga ko burundu asezeye politiki, ubu amushinja kubeshya kuko yavuye muri RNC, agakomereza umurongo we muri FLN yarimo Nsabimana Callixte wamenyekanye nka Sankara.

Umuvumba w’amarira muri RNC

Mu myaka umunani RNC ishinzwe, amarira yatembye muri uyu mutwe inshuro nyinshi. Amarira ya mbere yatembye ubwo Patrick Karegeya yari amaze gukurwamo umwuka. Uyu yasaga nkaho ari we wahuzaga abasivili n’abasirikare, yumvirwaga na Kayumba ndetse na Rudasingwa.

Urupfu rwe rwavuzweho byinshi, bashyira mu majwi u Rwanda ko arirwo rubiri inyuma ariko habuze ikimenyetso na kimwe kibigaragaza. Gusa abasesenguzi bakunze gusobanura uburyo Karegeya yari afite ibibazo impande n’impande.

Andrew Mwenda nyuma y’urupfu rwa Karegeya yavuze uburyo uyu mugabo yashwanye n’umuhanzi w’ikirangirire Jean Christophe Matata amuziza kumuteretera ikizungerezi bari bacuditse, nyuma birangira Karegeya acuze umugambi wo kwivugana Christophe Matata binyuze mu gushyira ikinini mu kinyobwa cye.

Urupfu rwa Matata bigizwemo uruhare na Karegeya ngo rushobora kuba rwarakongeje uburakari, maze abashaka guhorera uyu muhanzi nabo bapanga kwivugana Karegeya.

Ikindi Afurika y’Epfo ni igihugu kibamo ubugizi bwa nabi ku rugero rwo hejuru. Iza mu bihugu bya mbere ku Isi biberamo ibikorwa by’ubugizi bwa nabi aho icyegeranyo cya Global Peace Index cyo mu 2018 kigaragaza ko ari iya 125 ku Isi mu 165 bitekanye.

Ku bijyanye n’impfu za hato na hato zitewe n’ibikorwa by’ubugizi bwa nabi, Afurika y’Epfo yashyizwe mu bihugu 10 ku Isi ziganjemo cyane.

Polisi ya Afurika y’Epfo mu 2018 yagaragaje ko ubwicanyi bukomeje gufata indi ntera kuko nibura ku munsi hapfa abantu 57 biciwe mu bikorwa nk’ibi by’ubugizi bwa nabi.

Ibikorwa by’ubugizi bwa nabi muri iki gihugu bishyira Afurika y’Epfo ku mwanya wa 15 ku Isi mu bihugu bihomba akayabo kubera ibi bikorwa aho nibura itakaza 24% by’umutungo mbumbe w’igihugu. Amakimbirane ashingiye ku bukungu ni yo aza ku isonga mu bituma ubugizi bwa nabi bukaza umurego muri Afurika y’Epfo.

Mu minsi ishize kandi undi muntu wahoze muri RNC Nkurunziza Camille yishwe arashwe mu bushyamirane na Polisi ya Afurika y’Epfo.

Rudasingwa yashwanye na Kayumba kugeza ubwo batukanye bikomeye, RNC icikamo ibice bibiri

Kwisuganya kw’abarwanya Leta mu mutwe mushya w’iterabwoba P5

Nyuma yo gupfunda imitwe impande zose bagakama ikimasa, Kayumba n’andi mashyaka bihurije hamwe bashinga umutwe witwa P5 wari ushyigikiwe na Perezida Museveni na leta y’u Burundi kugira ngo barebe uko bagera ku mugambi wabo wo guhungabanya umtutekano w’u Rwanda.

Tariki 18 Ukuboza 2018, Itsinda ry’inzobere za Loni zikora iperereza ku mutekano mu Burasirazuba bwa Repubulika Iharanira Demokarasi ya Congo, ryashyikirije Komite y’Akanama ka Loni gashinzwe umutekano raporo y’ibyo zabonye.

Muri iyo raporo zise ‘Midterm report of the Group of Experts on the Democratic Republic of the Congo’, impuguke zivuga ko inyeshyamba za Kayumba Nyamwasa zikorera mu misozi ya Fizi na Uvira muri Kivu y’Amajyepfo.

Izo zari zibumbiye mu mutwe wiswe P5 izwi nk’impuzamashyaka irwanya Leta y’u Rwanda, ibumbiye hamwe FDU Inkingi ya Ingabire Victoire, Amahoro PC; RNC, PDP-Imanzi na PS Imberakuri, igice cya Ntaganda Bérnard.

Kugeza muri Nzeri 2018, uwo mutwe wari ugizwe n’abagera kuri 400, uyobowe na Shaka Nyamusaraba wahoze ayoboye inyeshyamba za Gomino, ukoresha intwaro n’ibindi byangombwa byose bituruka mu Burundi nubwo hatashyizwe hanze ababibaha.

Abahoze muri uwo mutwe babwiye inzobere za Loni ko abawugize ari abanyamahanga benshi baturuka mu Rwanda ndetse n’abanye-Congo b’Abanyamulenge.

Bavuze ko Kayumba Nyamwasa asura ako gace inshuro nyinshi. Mu kureshya abinjira muri uwo mutwe ngo hifashishwa kubahamagara kuri telefone, guhura nabo amaso ku maso ndetse no gukoresha imbuga nkoranyambaga. Nibura kwinjiza abarwanyi byabaga rimwe mu kwezi, mu mezi umunani ya mbere ya 2018.

Raporo ivuga ko uwo mutwe wagabanyijwemo batayo eshatu, iyitwa Alpha, Bravo na Delta, buri imwe ikaba igizwe n’abarwanyi bagera kuri 120.

Raporo ya Loni ishimangira ko ko intwaro, ibiryo, imiti n’imyambaro byose uwo mutwe ukoresha bituruka i Burundi, ndetse igenda igaragaza n’ingero z’intwaro zinjijwe mu nyeshyamba ziturutse i Bujumbura.

Ishamaduko rya Museveni, Papa mushya muri batisimu w’abarwanya u Rwanda

Ubwo Museveni yataga mu matwi ko hari abisuganyiriza kugirira nabi u Rwanda, iryo jambo yaryakiranye ubwuzu maze abaha karibu ati rwose ni muze mwisanga mu rukari.

Uyu muyobozi guhera mu 2017 yatangiye gufasha mu buryo bweruye umutwe wa RNC n’abandi wafatanya nawo, abaha karibu muri Uganda ndetse agira n’uruhare mu bikorwa bigamije gutuma ubona abayoboke.

Urwego rushinzwe Iperereza mu Gisirikare nirwo rwabaye ku isonga muri ibyo bikorwa byo gusohoza ubutumwa bw’Umukuru w’Igihugu, rutangira gushakira hasi hejuru uwo ariwe wese waba wifuza kujya mu myitozo ya RNC i Minembwe muri RDC kugira ngo azatere u Rwanda.

Mu Ukuboza 2017, abasore 40 bafashwe bafite ibyangombwa by’inzira bya Uganda by’ibihimbano bagiye kwinjira muri RDC mu nkambi za RNC. Polisi ya Uganda itari izi umugambi wa sebuja ifatanyije n’iya Tanzania niyo yapfubije urugendo rwabo.

Uko iminsi yagiye igenda kandi, ni ko Museveni yarushijeho kwerura, akagaragaza uruhande ahagaze mu bufatanye n’iyi mitwe. Ibaruwa ye yo muri Werurwe 2019 yakuye igihu kuri ibi byose kuko nawe yiyemereye uruhare rwe.

Yandikiye Perezida Kagame amubwira ko yahuye na Mukankusi Charlotte ushinzwe dipolomasi muri RNC, agiye kubihuhura avuga ko byari nk’impanuka.

Muri make ni nk’aho Museveni yari ari kugenda n’amaguru mu muhanda wa Jinja, agahura n’umugore witwa Mukankusi yihitira, bakaganira.

Gusa ariko si ko byagenze, uyu mugore yakiriwe mu Biro by’Umukuru w’Igihugu, aganira umwanya munini na Museveni, ndetse bivugwa ko yamugejejeho umugambi wabo wo kugirira nabi ubutegetsi bw’u Rwanda undi akamwizeza ubufasha amubwira ngo ‘turikumwe’..

Bivugwa ko uyu mugore yamugaragarije ubufasha bamukeneyeho by’umwihariko kuba Uganda yashimangira umubano ifiyanye na Loni i New York ku buryo yatesha agaciro raporo y’impuguke za Loni yo ku wa 31 Ukuboza 2018 igaragaza isano iri hagati ya Guverinoma ya Museveni na RNC.

Si aba gusa, buri wese mu bavuye mu Rwanda ku mpamvu imwe cyangwa indi ariko utarwifuriza ineza, hamwe mu hantu yisanga ni muri Uganda. Ubu ba Rujugiro baratekanye baratimaje kuko ubucuruzi bwabo muri Uganda buhagarikiwe n’ingwe, Himbara David yahawe karibu mu itangazamakuru aho aba asebya u Rwanda nta rutangira n’abandi gutyo gutyo.

Uyu mwanya Museveni yafashe wo kuba Papa mushya wa Batisimu w’abarwanya u Rwanda, awusimbuyeho Jakaya Kikwete wari warahimbanishije ko ashaka kubona u Rwanda rugirana ibiganiro na FDLR.

Umunsi inyeshyamba za P5 zakubitiwe muri Congo n’ikintu kitazwi

Muri uko kwisuganya kwahereye mu 2017, abarwanyi muri RDC bagurirwa amatiliningi na bote, imyitozo iratangira igizwe n’insorensore zirenga 200 zirimo izaturutse muri Uganda zitazi n’ikipe ihanganye n’indi.

P5 ihuriwemo n’amashyaka atanu agamije kurwanya u Rwanda, yari yakajije imyitozo muri Congo, Museveni nawe akomeje gutanga ubufasha bwose yaba ubwo gushaka abajya mu bikorwa nk’ibyo.

Ku rundi ruhande, hari Congo nayo yari ifite umugambi wo gushaka uko yagarura amahoro mu gihugu cyayo cyabaye ikotaniro ry’imitwe yitwaje intwaro.

Muri Kamena uyu mwaka, Ingabo za RDC zateguye ibitero bikomeye byiswe ‘Tempête de l’Ituri’, bigamije kwirukana imitwe yitwaje intwaro yigaruriye uduce dutandukanye mu mashyamba ya RDC.

Amashusho yahise atangira gukwirakwira ku mbuga nkoranyambaga agaragaza ingabo za Leta ya Congo zisuka ibisasu biremereye ku birindiro by’imwe mu mitwe yitwaje intwaro ikorera muri aka gace ka Ituri.

Izi ngabo zari zifite indege za gisirikare n’ibisasu biremereye, zatangaje ko impamvu y’ibi bitero ari uguhiga no kwirukana imitwe yitwaje intwaro yigaruriye ibice bitandukanye by’iki gihugu.

Bishobora kuba aribyo byageze ku barwanyi ba P5 kuko bo ibyo bakorewe ntiwakeka ko ari ingabo za RDC zabikoze ahubwo wagira ngo ni ikiza cyangwa inkuba yabanyuzemo ikararika.

Gukubitwa inshuro kw’abarwanya leta y’u Rwanda ntabwo byageze muri P5 gusa kuko hari n’abafashwe bazanwa mu Rwanda nk’imizigo.

Muribuka Nsabimana Callixte wari wariyise Sankara, wigambaga ko yafashe Nyungwe mu biganza bye? Uyu wari wariyise umugaba mukuru w’ingabo za FNL ya Rusesabagina, yahizwe bukware, afatwa nta n’isasu ry’umuti rivuze, afatirwa muri za Comore, nyuma arahambirwa azanwa mu Rwanda nk’umuzigo.

Ibyago ntibyarangiriye aho, mu minsi mike ishize, Mudacumura Sylvestre nawe wari uyoboye FDLR yakubiswe n’ingabo za RDC apfana ikiyiko, abari abarwanyi be barabohwa bajyanwa muri gereza. Birashoboka ko n’abandi aricyo kibategereje. Tubitege amaso!

Gahima Gérard ni umwe muri bane bashinze RNC
Ifatwa ry'abari abayobozi bakuru muri FDLR ryabaye nk'umusonga mu rubavu rwa RNC yari yizeye amaboko
Museveni yabaye Papa mushya wa Batisimu w'uyu mutwe asimbuye Kikwete
Abasore 40 bafashwe mu 2017 bagiye mu myitozo ya gisirikare ya RNC muri Congo
Mukankusi akunze kujya muri Uganda mu biganiro na Museveni
Mukankusi wari umudipolomate w'u Rwanda nk'uko bigaragazwa na Pasiporo iri iburyo, yahawe Pasiporo imugaragaza nk'umuturage wa Uganda (ibumoso)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza