00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwaburiye Congo na Loni ku gukomeza gukerensa FDLR

Yanditswe na Ferdinand Maniraguha
Kuya 1 Ukwakira 2022 saa 06:59
Yasuwe :

Ambasaderi w’u Rwanda muri Loni, Claver Gatete yaburiye umuryango Mpuzamahanga na Repubulika Iharanira Demokarasi ya Congo by’umwihariko, ku gukomeza kurenza ingohe ikibazo cya FDLR bibwira ko idateje ikibazo gikomeye.

Amb. Gatete yabigarutseho kuri uyu wa Gatanu mu ijambo yagejeje ku Kanama k’Umuryango w’Abibumbye gashinzwe umutekano, nyuma yo guhabwa raporo ku bikorwa by’Ingabo ziri mu Butumwa bwa Loni mu Burasirazuba bwa Congo (MONUSCO).

Yavuze ko kimwe mu bikomeje guteza umutekano muke muri Congo no mu karere, harimo FDLR n’indi mitwe iwushamikiyeho.

Ambasaderi Gatete yongeyeho ko igiteye inkeke ari uburyo igisirikare cya Congo cyakabaye kiza ku isonga mu kuyirwanya, ahubwo gifatanya na FDLR.

Ati “Biba bibi kumva ko FARDC n’iyo mitwe iyishamikiyeho bikorana na FARDC. Ibintu nk’ibyo biha urwaho iyo mitwe ikongera kwisuganya, ikinjiza abarwanyi bashya ndetse igatangira kugaba ibitero byambuka imipaka. FARDC ikwiriye guhagarika ubufatanye n’imitwe yitwaje intwaro kandi yafatiwe ibihano nka FDLR.”

Yavuze ko FDLR idakwiriye gufatwa nk’umutwe woroheje mu gihe hari ibihamya by’ibitero wagiye ugaba ku Rwanda vuba aha bikangiza byinshi.

Yatanze urugero rw’ibitero bitatu imaze kugaba muri uyu mwaka, ku bufasha bw’igisirikare cya Congo, FARDC.

Ati “Kuba FDLR iri muri RDC ntabwo ari ibintu bikwiriye gufatwa mu buryo bworoheje. Ntabwo umutwe ushingiye ku ngengabitekerezo ya Jenoside ukwiriye kureberwa ku mubare w’abawugize. Uko FDLR yaba ingana kose, umutwe wose ushobora kugaba ibitero ku butaka bw’u Rwanda, ukangiza, ukica abaturage, ukiba uba werekana ko ugifite imbaraga zo guhungabanya umutekano w’u Rwanda.”

Yakomeje agira ati “Ushingiye kuri ibi bitero, FDLR n’imitwe iyishamikiyeho bigaragara neza ko ari ikibazo gikomeye ku mutekano w’u Rwanda, ushaka kwerekana ko atari ko ko biri ni ukwigiza nkana.”

Perezida wa RDC, Felix Tshisekedi aherutse kuvugira mu Nteko rusange ya Loni, ko FDLR ari urwitwazo ngo kuko igizwe n’abantu bishakira amaramuko badashobora guhungabanya umutekano w’u Rwanda.

Icyakora, yavuze ko uwo mutwe ariwo wishe uwari Ambasaderi w’u Butaliyani muri Congo, umwaka ushize.

Amb Gatete yagarutse kandi ku mvugo za bamwe mu bayobozi bo muri Congo, bitwaza u Rwanda mu bibazo by’igihugu bagamije guhunga uruhare rwabo muri byo, avuga ko ari ibintu bibi cyane.

Yavuze ko ari byo bihindukira bikavamo imvugo z’urwango zibasira abavuga Ikinyarwanda.

Ati “Imvugo zo kwibasira u Rwanda zikomeje, zazarushaho kuzambya ibintu mu Burasirazuba bwa Congo, zikarushaho gucamo ibice abanye-Congo no kubabibamo urwango.”

Gatete kandi yavuze ko uburyo ibibazo bya Congo iba ishaka kubyegeka ku mahanga nabyo ari ikibazo gikomeye, bityo ko kwemera uruhare rwayo ari imwe mu nzira zo gushakira umuti ibibazo bihari.

Ati “Ikibazo ntabwo ari ukubura uburyo bwo gukoresha, ahubwo ikibazo ni ukudashyira mu bikorwa amasezerano asanzweho. U Rwanda ruzakomeza gukora ibirureba ari nako rukomeza kurinda abaturage barwo n’ubusugire.”

Congo imaze iminsi ishinja u Rwanda kugira uruhare mu bibazo ifite by’umutekano muke mu Burasirazuba, biciye mu gushyigikira umutwe wa M23.

U Rwanda rwahakanye ibyo birego kenshi, ruvuga ko ibibazo bya M23 bireba Guverinoma ya Congo kuko abagize uwo mutwe ari abanye-Congo, basaba uburenganzira mu gihugu cyabo.

Ambasaderi Gatete yavuze ko FDLR idakwiriye kwirengagizwa mu gihe igiteje umutekano muke u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .