00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugeze kure ibiganiro ku bimukira bazaturuka muri Denmark

Yanditswe na Ferdinand Maniraguha
Kuya 9 September 2022 saa 12:55
Yasuwe :

Guverinoma y’u Rwanda na Denmark zatangaje ko zigeze kure ibiganiro biganisha ku kwakira abimukira binjira mu buryo bunyuranyije n’amategeko muri icyo gihugu giherereye mu Majyaruguru y’u Burayi.

Kuri uyu wa Gatanu tariki 9 Nzeri 2022, Minisitiri ushinzwe abimukira muri Denmark, Kaare Dybvad hamwe na Minisitiri ushinzwe ubufatanye mu iterambere, Flemming Møller Mortensen bagiriye uruzinduko i Kigali.

Baganiriye na Guverinoma y’u Rwanda ku buryo bwo gushyira mu bikorwa amasezerano y’ubufatanye arimo n’ayo y’abimukira.

Minisitiri w’Ububanyi n’Amahanga w’u Rwanda, Dr Vincent Biruta, yavuze ko guhera muri Mata 2021, u Rwanda na Denmark byatangiye ibiganiro ku guhangana n’ibibazo by’abimukira bikomeje kubera umutwaro ibihugu by’u Burayi, ari nako bishyira mu kaga ubuzima bw’abimukira baba bashaka imibereho myiza i Burayi.

Ati "Twumvikanye na Denmark ko tuzakorana kugira ngo kiriya kibazo cy’abimukira bagenda bajyanywe n’abantu bacuruza abandi tukibonere igisubizo kirambye. Aho tugeze uyu munsi amasezerano turayafite, ariko noneho turaganira ku buryo bunonosoye duhereye ku kantu kose: Ni abahe bantu, bizasaba iki, bazatuzwa bate, bizagenda bite baramutse bageze hano […] ibyo nibyo tukiganiraho."

Impande zombi zumvikanye ko kugira ngo ayo masezerano atange umusaruro, hagiye gufungurwa ibiro bihuriweho i Kigali. Bizaba birimo abadipolomate babiri bashinzwe gukurikirana umunsi ku munsi icyo kibazo.

Muri Mata uyu mwaka ubwo u Rwanda rwasinyaga amasezerano n’u Bwongereza yo kwakira abimukira, hagaragaye amajwi menshi yayanengaga, ndetse ku ruhande rumwe harimo n’imiryango mpuzamahanga yita ku bimukira n’impunzi.

Kuri iyi nshuro, Dr Biruta yavuze ko mu biganiro bazavugana n’iyo miryango itandukanye, kugira ngo amasezerano asinywe buri wese ayumva.

Ati "Twiyemeje ko tuganira n’imiryango mpuzamahanga irebana n’ibibazo by’impunzi […] kugira ngo twumvikane uko kiriya kibazo cy’abimukira bagenda mu buryo butera impanuka nyinshi bigatera n’ibibazo mu bihugu baba bashaka kujyamo, hakaba ababipfiramo mu gihe hari abandi babyungukiramo mu buryo butari bwo."

"Niba uburyo busanzwe budakora, twakora gute ngo dushyireho uburyo bushya bwakora kandi bugakemura ibibazo?"

Minisitiri Biruta kandi yabajijwe ku barwanya aya masezerano bashinja u Rwanda guhohotera abatavuga rumwe nayo, no kutubahiriza uburenganzira bwa muntu. Aba bavuga ko abimukira niboherezwa mu Rwanda batazafatwa neza nkuko byifuzwa.

Yavuze ko abarwanya iyi gahunda bigiza nkana, kuko hari izindi gahunda nka yo bagiye bafatanyamo n’u Rwanda kandi zigatanga umusaruro, ntibazinenge.

Ati "Ibi bibazo by’uburenganzira bwa muntu biri kuzamurwa uyu munsi nyuma y’ubufatanye twagiranye n’u Bwongereza, ariko ntabwo byigeze bivugwa ubwo twakiraga abimukira bavuye muri Libya. Ntabwo ibyo bibazo byavuzwe ubwo twakiraga impunzi zivuye mu bihugu duturanye zisaga ibihumbi 130 zavuye mu Burundi, RDC n’ahandi."

Yakomeje agira ati "Kubera ko uyu munsi hari abantu batabishaka, bahise batangira ngo u Rwanda si igihugu gitekanye, igihugu gihohotera abatavuga rumwe nacyo n’ibindi […] Ni abantu badashyivikiye ubu buryo bushya, rero bazagerageza ikintu cyose cyatuma bugaragara nabi."

Minisitiri ufite mu nshingano abimukira muri Denmark, Kaare Dybvad, yavuze ko bizeye umusaruro muri ibi biganiro batangiye n’u Rwanda, byo kurwanya ikibazo cy’abimukira cyahindutse ubucuruzi bwungikira bamwe, bugashyira mu kaga ubuzima bw’abandi.

Bivugwa ko mu gihe abimukira binjira muri Denmark mu buryo butemewe n’amategeko bazaba boherejwe mu Rwanda, hazajya habaho isesengura abashobora kwakirwa na Denmark bakakirwa, abashaka gutuzwa bagafashirizwa mu Rwanda.

Denmark ni kimwe mu bihugu bisanzwe biha ubuhungiro bamwe mu bimukira bacumbikiwe mu Rwanda bashaka kwerekeza i Burayi, by’umwihariko abavuye muri Libya.

Dr Biruta yavuze ko muri ibi biganiro bazinjizamo n'imiryango mpuzamahanga irengera impunzi n'abimukira
Minisitiri ushinzwe abimukira muri Denmark, Kaare Dybvad yavuze ko bizeye umusaruro muri ibi biganiro
Ibiganiro biracyakomeje kugira ngo ibihugu byombi bisinye amasezerano yo gukemura ikibazo cy'abimukira
Guverinoma y'u Rwanda n'iya Denmark ziyemeje gukomeza ubufatanye mu nzego zitandukanye z'iterambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .