00:00:00 IGIHE NETWORK KN KINYARWANDA EN ENGLISH FR FRANCAIS

Iherezo rya Théodore Sindikubwabo, Perezida wisabiye kuraswa mu mashyamba ya Congo

Yanditswe na IGIHE
Kuya 18 January 2022 saa 07:28
Yasuwe :

Dr Théodore Sindikubwabo, ni izina ryamenyekanye mu gihe gito mu mateka y’u Rwanda ariko ryafashe impapuro nyinshi mu gitabo cy’ayo mateka kubera amaraso yamenetse mu mezi atatu yayoboye u Rwanda nka Perezida w’inzibacyuho, guhera muri Mata kugeza muri Nyakanga 1994.

Tariki 9 Mata 1994 hashize iminsi itatu Perezida Juvenal Habyarimana apfuye, nibwo Sindukubwabo, umuganga w’umwuga wari Perezida w’Inteko Ishinga Amategeko yahawe inshingano zo kuyobora u Rwanda mu nzibacyuho.

Yari amahirwe akomeye kuri we yo kwigaragaza akura igihugu mu rwobo cyari kimaze iminsi ibiri kiguyemo kubera Jenoside yatangijwe ubwo indege ya Habyarimana yari imaze guhanurwa.

Si ko byagenze kuko amezi atatu Sindikubwabo yamaze ari Perezida, Jenoside yakorewe Abatutsi yarakomeje ndetse nyir’ubwite ayiha umurindi mu bice bitandukanye by’igihugu, akangurira abasivile b’abahutu kujya ‘gukora’, bica abatutsi.

Sindikubwaho yayoboye u Rwanda kugeza ubwo u Rwanda rwabohorwaga na FPR Inkotanyi muri Nyakanga 1994, ahungira muri Zaïre (Repubulika Iharanira Demokarasi ya Congo kuri ubu) ari naho yaguye arashwe n’abamurindaga bari kumwe n’umuhungu we.

Umuganga watereranye abarwayi...

Sindikubwaho yavukiye i Butare ahitwa i Shyanda mu 1928. Yize amashuri abanza i Save ayakomereza i Gisagara aho ababyeyi be bimukiye nyuma. Amashuri yisumbuye yayize muri GS Astrida (Butare) mu bijyanye n’ubuvuzi.

Nyuma yo kurangiza amashuri yisumbuye yatangiye kwinjira muri politiki kuko mu 1957 ari mu bashinze ishyaka Aprosoma rya Gitera Joseph, aribera umunyamabanga ndetse n’umubitsi.

Sindikubwabo yatangiranye na Kaminuza Nkuru y’u Rwanda tariki 2 Ugushyingo 1963, asoza amasomo ye mu ishami ry’Ubuvuzi rusange mu 1969.

Muri Leta ya Grégoire Kayibanda yabaye Minisitiri w’Ubuzima. Nyuma y’uko Kayibanda ahiritswe ku butegetsi, Sindikubwabo yakoze nk’umuganga w’abana mu bitaro bikuru bya Kigali, CHUK.

Nyuma yaje kuba umudepite ndetse ayobora Inteko Ishinga Amategeko guhera mu 1988 kugeza mu 1994 ubwo yagirwaga Perezida w’inzibacyuho guhera tariki 9 Mata 1994 kugeza tariki 19 Nyakanga 1994 ubwo ingabo za FPR Inkotanyi zabohoraga igihugu.

Nubwo yari Perezida, Sindikubwabo afatwa nk’uwari agakingirizo k’abasirikare bakuru mu ngabo za Habyarimana barimo Col Théoneste Bagosora bari bakuriye umugambi w’ikorwa rya Jenoside.

Sindikubwabo ni umwe mu bashyigikiye Jenoside ndetse akangurira abandi kuyikora hirya no hino mu gihugu by’umwihariko muri Butare no mu bindi bice byo mu Majyepfo aho avuka.

Urugero nka tariki 19 Mata 1994 hashize ibyumweru bibiri Jenoside itangiye, yagiye i Butare gushyiraho Perefe mushya w’Umuhutu Sylvain Nsabimana wo gusimbura Umututsi Habyarimana Jean Baptiste wari warwanyije Jenoside muri perefegitura ye.

Mu ijambo yahavugiye, yahamagariye abaturage kwitabira Jenoside, ntibabe ba “Ntibindeba”. Amaze kuhava abasirikare bafatanyije n’Interahamwe bishe abasivili benshi b’Abatutsi bari batuye i Butare hamwe n’impunzi zari zaturutse mu tundi turere tw’u Rwanda.

Yisabiye ko bamurasa…

Tariki 18 Nyakanga 1994 nibwo Théodore Sindikubwabo na bamwe mu bari bagize Guverinoma y’inzibacyuho bahungiye i Bukavu bavuye i Cyangugu. Hari hashize umunsi umwe umujyi wa Gisenyi ubohowe n’Inkotanyi ari na wo wa nyuma wari usigaye.

Sindikubwabo na Guverinoma ye bageze muri Zaïre bakomeje gukora nka Guverinoma nubwo icyo gihugu cyari cyabihanangirije ko batagomba gukora politiki.

Icyakora nayo yarumaga ihuha kuko yemereye abasirikare kwinjirana imbunda n’izindi ntwaro kandi ubusanzwe mu mategeko mpuzamahanga agenga impunzi bitemewe.

Sindikubwaho ageze i Bukavu, yahise ajya gutura mu gace kitwa La Beauté, abandi biganjemo abasirikare bajya kuba mu kigo cya gisirikare cya Panzi.

Sindikubwaho yagumye i Bukavu kugeza mu mpera za 1996 ubwo inkambi z’impunzi z’Abanyarwanda zasenywaga, hatangiye intambara yo gukura ku butegetsi Perezida Mobutu Sese Seko.

Sindikubwabo yavuye i Bukavu agana muri Kivu y’Amajyaruguru ashaka gukomeza Kisangani ari kumwe n’umuhungu we Cesar n’umushoferi wamutwaraga witwa Narayamenye Samuel wahoze mu ngabo zarindaga Perezida Juvenal Habyarimana.

Narayamenye ni we musirikare mu bamurinda wari umusigayeho kuko abandi bari baramuretse nyuma yo kumara igihe badahembwa nta n’icyerecyezo cya Leta ye babona.

Amakuru IGIHE yahawe n’abasirikare Narayamenye yasanze mu nkambi ya Gatoyi ubwo Sindikubwaho yari amaze gupfa, avuga ko ubwo bari bageze hagati ya Nyabwibwi na Ngungu i Masisi mu Ntara ya Kivu y’Amajyaruguru, bahawe amakuru y’uko ingabo za Laurent Desire Kabila zifatanyije n’iz’u Rwanda zafashe uduce twinshi twa Kivu y’Amajyaruguru.

Basaga n’abagoswe ku buryo icyari gisigaye ari ukunyura mu mashyamba no gushakisha ubundi buryo butari uguca mu mihanda. Bivuze ko kwari ukugenda n’amaguru.

Ntabwo byari gushoboka kuri Sindikubwabo wari ushaje akabakaba imyaka 70, arwaye kandi yarazahajwe n’ubuzima bw’ubuhunzi.

Théodore Sindikubwabo amaze guhungira i Bukavu, yakomeje kwitwara nka Perezida wo mu buhungiro anakomeza kuyobora ibikorwa byari bigamije kugaruka kugaba ibitero ku Rwanda

Sindikubwabo amaze kumenya ko aho bari bagiye hafashwe kandi nta mbaraga zo kwiruka mu mashyamba afite, yasabye umuhungu we wari urangije muri Kaminuza i Butare na Narayamenye kumwirasira aho kwicwa n’umunaniro mu mashyamba cyangwa agafatwa mpiri n’ingabo za Kabila cyangwa iz’u Rwanda.

Narayamenye yavuze ko bamutwikiriye ikintu mu maso mu modoka ye, baramurasa umurambo bawusiga mu modoka, barakomeza barahunga.

Narayamenye wari kumwe na Sindikubwabo apfa, niwe watanze amakuru ayaha bagenzi be biganjemo abasirikare bahoranye muri FAR. IGIHE yahawe amakuru ko Narayamenye na we yaje kugwa muri Congo azize uburwayi.

Ntabwo bizwi niba umurambo wa Sindikubwabo waba warashyinguwe n’abagiraneza i Masisi aho wasigaye, gusa abo bantu babiri bari bari kumwe na we bavuze ko batigeze bamushyingura.

Sindikubwabo nubwo ashinjwa uruhare rukomeye muri Jenoside yakorewe Abatutsi, yapfuye ataraburanishwa.

Mu gitabo cy’umunyamakuru Philip Gourevitch kivuga kuri Jenoside yakorewe Abatutsi yise “We Wish to Inform You That Tomorrow We Will Be Killed With Our Families”, Sindikubwabo ari mu baganirijwe agaragaza kwinangira ku ruhare rwe muri Jenoside yakorewe Abatutsi.

Gourevitch yasanze Sindikubwabo i Bukavu mu 1995, amwakirira mu ruganiro rw’inzu yari atuyemo muri Quartier La beauté, yitegeye imisozi ya Cyangungu. Hejuru y’intebe Sindikubwabo yari yicayemo, hari hari ifoto ya Perezida Juvenal Habyarimana mu mwambaro wa gisirikare.

Sindikubwabo yabajijwe niba aticuza uruhare rwe muri Jenoside by’umwihariko i Butare aho avuka, asubiza ko “igihe kitaragera ngo hamenyekane umunyabyaha n’utari we […] Ni ikinamico rizakemurwa n’urukiko mpanabyaha. Njye nkomoka i Butare kandi ibyo nahavugiye ndabizi, n’abaturage b’i Butare bazi ibyo nababwiye.”

Yakomeje agira ati “Abayobozi b’i Butare nibemeza ko ubwicanyi bwatangijwe n’amabwiriza nabahaye, bazabibazwe kuko ni inshingano zabo kubahiriza amabwiriza cyangwa kutayubahiriza. Niba baritiranyije ubutumwa nabahaye bakabwita itegeko, ubwo babikoze bitandukanye n’uko nabivuze.”

Sindikubwabo yatangiye politiki mu myaka ya 1950 akirangiza amashuri yisumbuye
Muri Mata 1994 ubwo Guverinoma ya Sindikubwabo na Kambanda yarahiraga, hashize iminsi mike Jenoside itangiye
Imisozi ya Masisi muri Repubulika Iharanira Demokarasi ya Congo, ari nabyo bice Sindikubwabo yaguyemo
Ikarita ya satellite igaragaza Masisi n'uduce tuyegereye muri Kivu y'Amajyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .