Urukiko rw’ikirenga rwahamagaje umunyemari Silas Majyambere mu rubanza aregwamo na Jean Pierre Bemba

Yanditswe na Ferdinand Maniraguha
Kuya 4 Werurwe 2019 saa 05:42
Yasuwe :
0 0

Urukiko rw’Ikirenga rwahamagaje umunyemari Majyambere Silas mu nama ntegurarubanza ku kirego cyatanzwe n’umunye-Congo Jean Pierre Bemba ku mitungo umuryango we ufite mu Rwanda.

Tariki 22 Gashyantare 2019 nibwo hasohotse itangazo ry’urukiko rw’ikirenga ryasinyweho na Perezida warwo Prof Sam Rugege, rihamagaza ahatazwi Majyambere Silas ngo azitabire inama ntegurarubanza izaba tariki 30 Gicurasi 2019.

Itangazo ryatanzwe nyuma yo kubura ahantu hazwi haba mu Rwanda no mu mahanga Majyambere Silas yaba atuye.

Ikirego cyatanzwe na Jean Pierre Bemba hamwe na Dunia Bakarani Faustin, basaba isubirishamo ry’urubanza urukiko rw’ikirenga rwaciye rwemeza ko uwitwa Kayitana Imanzi Emmanuel afite imigabane muri Société d’Exploitation Agricole du Rwanda (E.A.R Ltd) akaba ari na we uyihagarariye .

Uko byatangiye

Mu mwaka wa 1989, muri Zaїre hari umunyemari ukomeye witwa Bemba Saolona akaba inshuti ya Perezida Mobutu Sese Seko. Mobutu yaje gusura u Rwanda barazana, Saolona amenyana na Perezida Habyarimana ndetse amusaba kuba yashora imari mu Rwanda.

Saolona amaze kubyemera, yahujwe na Majyambere Silas na we wari umunyameri mu Rwanda ngo barebe ibyo bashoramo imari.

Bombi baje kwemeranya gushora imari mu bijyanye n’ibihingwa byoherezwa hanze, biyemeza gushingaSociété d’Exploitation Agricole du Rwanda (E.A.R Ltd) yagombaga gutunganya ikawa.

Muri iyo sosiyete, Saolona yashyizemo imigabane 59 %, Majyambere binyuze muri sosiyete ye Sogetra ashyiramo imigabane 20%, umuvandimwe we witwaga Ngendahimana Ezechiel ashyiramo imigabane ingana na 20 % naho abandi banye-Congo barimo na Jean Pierre Bemba umwana wa Saolona bashyiramo 1% by’imigabane.

Kuko bifuzaga kwiyandikisha ngo bahabwe ibyangombwa vuba, uruhande rwa Saolona ruvuga ko yahise atanga amafaranga y’imigabane ya buri wese, muri sitati bemeranya ko buri wese azagenda ayamwishyura nyuma bitewe n’imigabane afitemo.

Baguze ibibanza bibiri byo gukoreramo muri Rukiri mu murenge wa Remera, imbere y’ahahoze Alpha Palace Hotel, banatumiza imashini zo gutangira gutunganya umusaruro.

Mu gihe bari baratumije imashini, hatangiye urugamba rwo kubohora igihugu, Saolona agira impungenge umushinga basa n’abawuhagaritse.

Jenoside irangiye, Saolona yandikiye ba bantu bose yishyuriye imigabane muri EAR Ltd abamenyesha kumwishyura amafaranga ye mu minsi 30 bitaba ibyo akegukana imigabane yabo burundu muri iyo sosiyete.

Ngo Majyambere yavuze ko hari ibindi bibazo afite mu bucuruzi bwe ku buryo atajya mu byo kwishyura imigabane, amenyesha Saolona ko imigabane ye ayitwara. Ngendahimana we yaje gupfa, umuryango we wandikirwa usabwa kwishyura ntiwabikora, imigabane ye nayo Saolona arayitwara. Bivuze ko muri EAR Ltd, Saolona yasigaye afitemo imigabane ingana na 99 %.

Mu mwaka wa 1997, u Rwanda rwohereje Kayitana Imanzi Emmanuel ngo arubere Ambasaderi i Kinshasa. Yaje guhura na Saolona, amusaba kumukurikiranira imitungo ye iba mu Rwanda, ni ukuvuga iyo ya EAR Ltd yari afitemo imigabane anayibereye umuyobozi w’inama y’ubutegetsi.

Kayitana yahawe ibaruwa imwemerera guhagarira imitungo ya Saolona mu Rwanda (procuration) anamuha inshingano zo gushaka uburyo bazahura iyo sosiyete igakomeza gukora. Ibibanza bya EAR Ltd byatangije kujya bikodeshwa na Kayitana, ababikoreramo bakamwishyura na we amafaranga akayashyikiriza Saolona.

Mu mwaka wa 2005 Saolona ngo yaje kubona EAR Ltd ntaho igana. Muri icyo gihe umuhungu we Jean Piere Bemba yiyamamarizaga kuba Perezida, aza kumenyana na Dunia Bakarani Faustin wanabaye umudepite muri Congo bemeranya ko Bakarani agura iyo mitungo iri mu Rwanda.

Bakarani yishyuye Saolona ibihumbi bigera ku 160 by’amadolari, bandikirana bemeza ko aguze ibibanza bya EAR Ltd biri i Kigali.

Saolona yahuje Bakarani na Kayitana wari ushinzwe gucunga iyo mitungo, ngo Kayitana yemera kurekura ibyo yaragijwe.

Ibintu byaje guhindura isura

Kayitana na Bakarani bagiye mu biro bya Meya w’Umujyi wa Kigali basaba guhabwa impapuro z’ihererekanyamutungo n’iz’ubugure, bakora inama bemeza ko ibibanza byari ibya Saolona bihawe Bakarani, hakorwa inyandikomvugo na noteri ayisinyaho.

Meya w’umujyi wa Kigali ngo yabohereje mu karere ka Gasabo ngo abe aribo babakorera ihererekanyamutungo. Bakarani agezeyo asanga Kayitana yamenyesheje Meya ko atagomba kwemera iryo hererekanyamutungo ngo kuko Saolona hari ibyo amugomba ataramuha.

Saolona amaze kubona bibaye birebire yatanze ikirego, urukiko rwemeza ko ihererekanyamutungo n’ubugure byubahirije amategeko. Basubiye ku karere ka Gasabo gusaba icyo cyangombwa nabwo ngo barakibima.

Majyambere na we yahise atanga ikirego avuga ko ubwo bugure butemewe mu izina ry’umuvandimwe we Ngendahimana witabye Imana, na Kayitana atanga ikindi kirego yamagana ubwo bugure ariko bose baratsindwa.

Ngo urukiko rukuru rw’ubucuruzi rwagaragaje ko Majyambere nta cyerekana ko yahawe ububasha n’umuvandimwe we bwo kumuzungura.

Mu mwaka wa 2009, Saolona yarapfuye, iby’imigabane muri EAR Ltd bitangira gukurikiranwa n’umuhungu we Jean Pierre Bemba wari ufungiye i La Haye icyo gihe.

Majyambere yajuririye urukiko rw’ikirenga mu gihe urubanza rwari rugeze hagati, hinjiramo na Kayitana agobotse yitwaje urupapuro (bikekwa ko ari uruhimbano) rwerekana ko mu mwaka wa 1998, Saolona yamuhaye imigabane ingana na 40 % muri EAR Ltd ndetse anamuha ububasha bwo kuyihagararira, avuga ko atemera ko ibibanza bya sosiyete bigurishwa Bakarani.

Nyuma yo gusuzuma ibimenyetso mu mwaka wa 2017, urukiko rw’ikirenga rwanzuye ko Majyambere atsinzwe ariko Kayitana aratsinda, bivuze ko Kayitana byemejwe ko afite imigabane ingana na 40 % kandi ari na we uhagarariye EAR Ltd.

Ubwo Kayitana yazanaga impapuro zigaragaza ko Saolona yamuhaye imigabane, Bakarani yatanze ikirego avuga ko ari impapuro mpimbano, Kayitana atsindwa mu rukiko rw’ibanze bamukatira imyaka irindwi y’igifungo, ajuriye mu rukiko rwisumbuye bamugira umwere.

Mu rubanza rwo mu rukiko rw’ikirenga, abanyamategeko ba Jean Pierre Bemba bavuze ko nta masezerano bazi Kayitana yigeze agirana na Saolona, bityo ko batamuzi nk’umunyamigabane muri EAR Ltd.

Muri Mutarama umwaka ushize, Bakarani yareze asaba ko urukiko rw’ikirenga rwaba ruhagaritse ishyirwa mu bikorwa ry’umwanzuro wemeza ko Kayitana ahagarariye EAR Ltd, akanamburwa ububasha bwo kwakira amafaranga ava mu bibanza ariko urukiko ruvuga ko icyo kirego nta shingiro gifite.

Vuba aha uruhande rwa Bakarani n’urwa Saolona ruhagarariwe na Bemba batanze ikirego mu rukiko rw’Ikirenga, basaba gusubirishamo urubanza rwemeje ko Kayitana ari we uhagarariye EAR Ltd kandi afitemo imigabane.

Ni ihame ko igihe hagiye kuba urubanza runaka, urukiko rubanza guhamagaza ababuranyi bose mu nama ntegurarubanza ishobora no kurangira biyunze cyangwa bagakemura ikibazo mu bwumvikane.

Nyuma yo gushakisha aho umwe mu baburanyi Majyambere Silas yaba aherereye bakahabura, nibwo urukiko rw’Ikirenga rwahisemo gutanga itangazo rumuhamagaza ahatazwi.

Me Buhuru Pierre Célèstin wunganira Bakarani yabwiye IGIHE ko Majyambere nakomeza kubura, urubanza ruzakomeza nta kabuza.

Yavuze ko ubu batazi uko ibintu bizarangira kuko urubanza rwaciwe n’urukiko rukuru rw’ubucuruzi rwemeje ko ubugure bwa Bakarani na Saolona bwakurikije amategeko, naho urukiko rw’Ikirenga rukemeza ko Kayitana ari we watsinze kandi zombi ni imanza zitandukanye.

Amafaranga y’abakodesha ibibanza bya EAR Ltd yabanje kujya ahabwa Bakarani akimara kuhagura na Saolona, nyuma ababuranyi basaba ko yajya ashyirwa kuri konti y’urukiko kugeza igihe hazabonekera utsinda.

Umunyemari Silas Majyambere yahamagajwe mu rubanza aregwamo na Jean Pierre Bemba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza