00:00:00 IGIHE NETWORK KN KINYARWANDA EN ENGLISH FR FRANCAIS

Uko Ikigo cya SOS Gikongoro cyahindutse indiri y’abicanyi muri Jenoside

Yanditswe na IGIHE
Kuya 8 May 2023 saa 02:56
Yasuwe :

Mu Kigo cya SOS ku Gikongoro cyayoborwaga na Venuste Nyombayire uvuka mu yahoze ari Perefegitura ya Byumba, habaga abana baharererwaga, hakabamo n’abana b’Abatutsi. Mu ijoro ryo ku wa 7 rishyira uwa 8 gicurasi 1994, abana b’impfubyi b’Abatutsi baratoranyijwe baricwa.

Mbere y’iyo tariki, Venuste Nyombayire yari Umuyobozi wungirije w’Ikigo SOS ku Gikongoro aho yari yarajyanywe na Minisiteri y’Ubutegetsi bw’Igihugu avanywe muri Perefegitura ya Kigali Ngari aho yakoraga.

Nyombayire yajyanywe ku Gikongoro bamuhungishije kubera ibyamuvugwagaho ku ruhare rwe mu bwicanyi bwabereye mu Bugesera aho yakoraga nk’umukozi wa Minisiteri y’Ubutegetsi bw’Igihugu n’amajyambere ya Komini mu gihe cy’iyicwa ry’Abatutsi muri Werurwe 1992.

Uwamuhaye akazi muri SOS avuye muri Minisiteri y’Ubutegetsi bw’Igihugu n’Amajyambere ya Komini, kanamwohereza ku Gikongoro ni Munyangabe Marcel wari Umuyobozi Mukuru wa SOS ku rwego rw’igihugu, wari n’umwe mu Nterahamwe nkuru muri Kacyiru.

Ageze ku Gikongoro, Nyombayire yakoze ibishoboka byose ananiza uwari umuyobozi w’ikigo agamije kumusimbura. Kugira ngo agere ku mwanya w’ubuyobozi bwa SOS, Venuste Nyombayire yibasiye bikomeye uwari Umuyobozi Mukuru wa SOS Gikongoro, Marc Yirirwahandi utari ushyigikiye umugambi wa Jenoside, akaba yari Umurwanashyaka wa PSD itari igice cya Hutu Power kugeza bamuteye gerenade iramukomeretsa bikabije tariki ya 8 Mata 1994, arahunga ava ku Gikongoro ajya iwabo i Butare ahahoze ari muri Komini Mbazi.

Gerenade yayitewe na Nsengumuremyi Alphonse wari Umukozi wa ELECTROGAZ ya Gikongoro wabaye umwicanyi ruharwa, ku kagambane ka Nyombayire.

Marc Yirirwahandi amaze guhunga, ni bwo Venuste Nyombayire yihaye umwanya w’Umuyobozi Mukuru w’Ikigo cya SOS, aboneraho kwica Venuste Nyombayire yinjiye mu gatsiko k’intagondwa yasanze ku Gikongoro zari mu nzego zitandukanye z’imirimo zakoreraga muri Perefegitura ya Gikongoro, biganjemo abakiga bakomoka Ruhengeri, Gisenyi na Byumba, batangira gahunda yo gutegura Jenoside.

SOS Gikongoro yari ifite amazi menshi kandi magari, ari ahantu hiherereye, ku buryo bashakaga uburyo bazajya bayakoresha mu nama zitegura Jenoside no mu bindi bikorwa by’ubwicanyi.

Ako gatsiko kari kagizwe na:

• Perefe Bucyibaruta Laurent;

• SuPerefe Froduald Havugimana;

• Colonel Simba Aloys;

• Burugumesitiri wa Nyamagabe, Félicien Semakwavu;

• Ndereyehe Karoli Ntahontuye ukomoka mu Ruhengeri wayoboraga Umushinga w’Iterambere ry’Ubuhinzi muri Gikongoro, PDAG, mbere y’uko yimurirwa muri ISAR Rubona ari naho yakoreye Jenoside muri 1994 (ubu Ndereyehe aba mu Buholandi);

• Célestin Mutabaruka wayoboraga umushinga w’ubuhinzi n’ubworozi mu nkengero za Crete Zayire Nil, CZN, (aba mu Bwongereza);

• Capitaine Faustin Sebuhura wari Umuyobozi wungirije wa Jandarumori ku Gikongoro, ukomoka mu Ruhengeri (yarapfuye);

• Denis Kamodoka wayoboraga uruganda rw’icyayi rwa Mata ukomoka muri Komini Mutura ku Gisenyi;

• Juvénal Ndabarinze wayoboraga Uruganda rw’Icyayi rwa Mata ukomoka muri Komini Nkumba mu Ruhengeri;

• Semigabo Celse wari Porokireri wa Repuburika ku Gikongoro;

• Justin Ayurugari wayoboraga ELECTROGAZ ku Gikongoro ukomoka mu Ruhengeri;

• Fabien Uwimana wari ushinzwe Iperereza;

• Innocent Tangishaka wari ushinzwe Abinjira n’Abasohoka (Immigration et Emmigration);

• Rurangwa Joseph wayoboraga Ikigo cy’Amahugurwa cya CPDFP;

• SuPerefe Damien Biniga wategekaga SuPerefegitura ya Munini;

• SuPerefe Joseph Ntegeyintwali wategekaga Karaba;

• SuPerefe wa Kaduha, Joachim Hategekimana;

• David Karangwa wari Gerefiye w’Urukiko rwa Kanto ku Gikongoro n’abandi.

Aka gatsiko ni ko kateguye uburyo Jenoside igomba gukorwa muri Perefegitura ya Gikongoro, Nyombayire akaba yarakinjiyemo ageze ku Gikongoro ahagana mu 1992.

Iyicwa ry’abana b’impfubyi b’Abatutsi mu Kigo cya SOS ku Gikongoro

SOS Gikongoro yakorwagamo cyane n’Abahutu kuko n’Abatutsi barimo bari bafite imyanya yo hasi. Mu ijoro ryo ku wa 7 rishyira uwa 8 Gicurasi 1994, Nyombayire Venuste yazanye igitero cy’Interahamwe muri SOS cyica abo bana gifatanyije na Kabarere Venantie wari umwarimu w’abo bana muri SOS Gikongoro.

Ubu yahamijwe icyaha cya Jenoside n’Inkiko Gacaca akaba afungiye muri Gereza ya Nyamagabe. Venuste Nyombayire yafunguye icyumba aba bana bari barimo, aho bari babateranyirije, bahita babica. Hishwe abana bagera ku icumi (10).

Hari kandi abana bagera ku munani bari baraturutse i Kigali muri SOS ya Kacyiru, bivugwa ko bari babahungishije imirwano, babazana muri SOS ya Gikongoro, na bo batoranyamo Abatutsi bicamo batandatu. Aba bana bari baratoranyijwe na Nyombayire abashyira ukwabo mu cyumba cy’amashuri cyihariye, ahagana ku wa 6 Gicurasi 1994, bigaragara ko yari azi umugambi wo kubica igihe nikigera.

Kuri uwo mugoroba wo ku wa 7 Gicurasi 1994, Nyombayire yatoranyije muri izo mpfubyi umwana w’umukobwa wari mu kigero cy’imyaka 12 amuha Interahamwe yitwaga Ruzindana amuha uburenganzira bwo kumusambanya ku gahato ijoro ryose, akazamwica bukeye, ari nako byagenze.

Mu buhamya bwatanzwe na Kabarere Venantie wagize uruhare mu iyicwa ry’aba bana, avuga ko amazina yibuka y’abishwe ari abitwaga Ernestine, Hélène na Janson. Abandi ntabibuka.

Abana b’impfubyi z’Abatutsi biciwe muri SOS Gikongoro bari hagati ya 15 na 20.

Iyicwa ry’abakozi ba SOS b’Abatutsi

Muri iryo joro, abicanyi bamaze kwica abana bishe n’abakozi b’Abatutsi ba SOS Gikongoro bahereye ku bari bakoze nijoro. Ni bwo hishwe umuzamu witwa Nyirimirera, banatera urugo rwe bica umugore we n’abana be bane; banica umukozi wakoraga mu busitani witwaga Ntaganda Petero.

Mu gitero cy’abishe harimo abitwa Ndiramiye Boniface, Mbigizembishaka Jean, Kanyamanza Damascène, Athanase, Marc n’abandi.

Abana n’abakozi b’Abatutsi bishwe n’igitero cy’Interahamwe zazanywe na Venuste Nyombayire zigizwe na Munyangoga wari umuzamu muri ELECTROGAZ ku Gikongoro, Nsengumuremyi Alphonse na we wakoraga muri ELECTROGAZ akaba n’umwe mu bayobozi b’Interahamwe ku Gikongoro, Kanyamanza Jean Damascène, Habarurema Fidèle, Kakira Ildefonse, Habineza
alias Mapendu, Rusatsi Juvénal, Anastase alias Ruhabana, Gasana umuhungu wa Nyamwasa, Nyamuhene Vianney, Gasimba, François umuhungu wa Nyarugwe, Ndayisaba alias Kinonko, Nahayo Elisée, Ruberamanzi Innocent, Utazirubanda Emmanuel, Bishokankindi, Musabyimana alias Bisabo, Hashakimana, Mungwarareba.

Izo Nterahamwe Nyombayire yazivanye muri Centre y’Ubucuruzi ya Gatyazo, ziza ziyobowe na Munyangoga Félicien. Ku wa 16 Ukwakira 2009, Nyombayire Venuste yakatiwe adahari n’Urukiko Gacaca rw’Umurenge wa Gasaka igifungo cya burundu y’umwihariko.

Ubutumwa bw’ubutabazi bwa Bernard Kouchner mu Rwanda mu kwezi kwa Gicurasi 1994

Bernard Kouchner yakoreye urugendo mu Rwanda kuva tariki ya 12 kugeza ku wa 16 Gicurasi 1994, aje kugerageza gusaba ko MINUAR yajyana impfubyi z’Abanyarwanda mu Bufaransa.

Imishyikirano ibyerekeye yapfubye tariki ya 16 Gicurasi 1994 kubera ko Interahamwe zabyanze. Kouchner kuva icyo gihe yategereje indege yamucyura.

Bernard Kouchner yagiye i Gitarama aho yahuriye tariki ya 15 Gicurasi 1994 na Minisitiri w’Intebe Jean Kambanda na Perezida Tewodori Sindikubwabo. Kouchner yari yazanywe no gutabara impfubyi zikajyanwa mu Bufaransa kubera ko abo bana bashoboraga kwicwa igihe icyari cyo cyose.

Leta y’abicanyi yakomeje kwakira ubufasha bwa Gisirikare bw’u Bufaransa, ibishyigikiwemo n’abasirikare b’icyo gihugu, kandi byemejwe n’abayobozi b’Abafaransa, barangajwe imbere na Perezida François Mitterrand.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .