00:00:00 IGIHE NETWORK KN KINYARWANDA EN ENGLISH FR FRANCAIS

Uko Habyarimana yateguriwe Coup d’état, inshoreke ikamena ibanga

Yanditswe na Ferdinand Maniraguha
Kuya 8 September 2022 saa 01:04
Yasuwe :

Ku wa Gatatu tariki 30 Mata 1980, inkuru yakwiriye u Rwanda rwose ko Major Théoneste Lizinde wari igishyitsi mu butegetsi bwa Perezida Juvénal Habyarimana, yatawe muri yombi akekwaho gushaka kumuhirika.

Lizinde yatawe muri yombi mu kivunge cy’abandi bantu basaga 40, bose bashinjwaga uruhare muri uwo mugambi. Hari hashize amezi menshi ibihuha bikwirakwizwa mu gihugu, ko Lizinde na Col Kanyarengwe Alexis bombi bari abayobozi bakomeye, bashaka kwikiza Habyarimana.

Kanyarengwe yafatwaga nka nimero ya kabiri mu gihugu ndetse benshi bemezaga ko yari afite ingufu ziruta cyangwa ziyingayinga iza Habyarimana mu butegetsi. Lizinde we yari ayoboye urwego rw’iperereza, Kanyarengwe akaba mu itsinda ryitwaga ‘Les onzes Caramades du 5 Juillet’ ry’abagejeje Habyarimana ku butegetsi.

Umwaka wa 1979 ntabwo wabaye mwiza kuri ba ’Camarades’ kuko batangiye gusubiramo, ba Lizinde na Kanyarengwe batangira kwigizwa inyuma ari nako bamanurwa mu myanya.

Habyarimana amaze kurahirira manda ya mbere nyuma yo gutsinda amatora yiyamamajemo wenyine mu Ukuboza 1978, yashyizeho Guverinoma nshya.

Iyo Guverinoma yamenyekanye muri Mutarama 1979 ariko iza Kanyarengwe yahinduriwe umwanya, avanwa ku kuba Minisitiri w’Umutekano agirwa Minisitiri w’Abakozi ba Leta n’umurimo. Mu Ugushyingo uwo mwaka Lizinde nawe yakuwe ku buyobozi bw’urwego rw’iperereza.

Ntabwo aba bagabo babyishimiye ndetse batangiye kubona neza ko bari kwigizwa inyuma nyamara bari mu b’Imena bacuze umugambi wagejeje Habyarimana ku butegetsi mu 1973.

Hari amakuru avuga ko Habyarimana n’aba-Camarades 11, bari bemeranyije ko nibamara gufata ubutegetsi buri umwe azayobora manda imwe y’imyaka itanu, nyuma agahereza undi. Mu 1979 byaragaragaraga ko bitubahirijwe ndetse bitazanubahirizwa.

Igitabo Stepp’d in Blood cya Andrew Wallis cyasohotse mu 2019, havugwamo ko Kanyarengwe na Lizinde bamaze kumanurwa mu myanya babaye abarakare, ku buryo byigaragazaga ko babonye umwanya Habyarimana bamukuraho.

Habyarimana na Kanyarengwe bahoze ari inshuti z'akadasohoka, baza kwangana urunuka nyuma

Mu mpera za 1979, mu Mujyi wa Kigali hatangiye kunyanyagizwa inyandiko mpimbano zivuga nabi ubutegetsi bwa Perezida Habyarimana. Zakurikiwe n’ibihuha byavugaga ko Kanyarengwe na Lizinde bari gutegura kumuhirika ku butegetsi.

Inararibonye Boniface Rucagu wari Sous Préfet wa Kabaya muri icyo gihe, yabwiye IGIHE ko inzego z’iperereza zatangiye gushakisha abakwirakwiza izo nyandiko, ufashwe agafungwa.

Ati “Uwafatanwaga ’tracte’ baramufungaga bakamubaza bati wayikuye he?, Uwayimuhaye bakamufata kugeza igihe byaje kugaragara ko zakorerwaga hariya mu mujyi imbere y’ahahoze T2000, hari hari inzu y’umugabo witwaga Alphonse Kagenza wari ambasaderi, iyo nzu yitwaga Satellite.”

Uwo Kagenza yakozweho iperereza, biza kugaragara ko ari inshuti ya hafi ya Kanyarengwe na Lizinde ndetse ko aribo bashobora kuba baramukoreshaga.

Coup d’état yarapanzwe, inshoreke ibavamo

Nubwo mu rubanza Lizinde yahakanye ibyo gushaka guhirika Habyarimana, hari amakuru avuga ko inama zo gutegura uwo mugambi zakozwe. Bivugwa ko umugambi wanogerezwaga ku Rwesero hafi y’ikiyaga cya Muhazi.

Amakuru y’uko hari gutegurwa Coup d’état amaze gusakara, Rucagu avuga ko yegereye Kanyarengwe kuko yari akiri Minisitiri kandi mu nshingano ze harimo n’ubutegetsi bw’inzego z’ibanze Rucagu yabarizwagamo.

Rucagu ati “Biranzindura njya kumushaka muri Minisiteri ndamubura, noneho bamumenyesha ko namushakaga, arambwira ngo musange iwe. Nuko ndagenda ndamubwira nti ‘nyakubahwa Minisitiri nazinduwe no kugira ngo mbahe amakuru, mbabwire ibivugwa hanze hano, murebe niba hari icyo mubiziho ndetse murebe niba hari n’ingamba mwafata zo kubihosha.”

Rucagu yabajije Kanyarengwe niba koko ari mu mugambi wo gushaka guhirika Perezida, undi aramuhakanira gusa amwemerera ko umugambi awuzi.

Ati “Kanyarengwe yarambwiye ati ‘Lizinde yaje kunsaba ngo dufatanye dukureho Perezida Habyarimana, ndamuhakanira’. Undi munsi aza kuntumaho arambwira ngo noneho reka we ubwe akureho Habyarimana ariko Kanyarengwe mushyigikire, ndamuhakanira. Mu gitondo aza kumbwira ati noneho wowe uzamukureho njye ngushyigikire, nabyo ndamuhakanira.”

Kanyarengwe ari mu bashinjwe gushaka guhirika Habyarimana, atoroka atarafatwa

Icyumvikana ni uko umugambi wo guhirika Habyarimana wo wari uhari nubwo uburyo wategurwagamo butamenyekanye.

Rucagu avuga ko nubwo inyandiko mpimbano zatumye abashinzwe iperereza bamenya abihishe inyuma y’uwo mugambi, ngo byihutishijwe cyane n’umugore wari inshoreke ya Lizinde, wabivuze agiye gushaka imyenda yo kuzambara umunsi ubutegetsi bwa Habyarimana buzaba bwahiritswe.

Ati “Uwo mugore yaje gufungwa ari kwitegura umunsi mukuru uzaba, yari yabyongorewe na Lizinde kuko yari inshoreke ye. Ntabwo yari umukozi wa Leta, agomba kuba yari umucuruzi ariko akaba inshuti ya Lizinde. Uwo mugore yaragiye abwira abantu ngo bamudodere neza kuko yitegura umunsi mukuru. Uwo mugore bagiye kumufata arafungwa ari nabwo bafataga na Lizinde.”

Amakuru Rucagu atanga, avuga ko uwo mugore yamaze igihe kinini afunzwe ndetse ari mu bakatiwe n’urukiko ariko nyuma akaza kurekurwa.

Lizinde ataratabwa muri yombi, yabanje gushaka gutorokera muri ambasade ya Libya, iya Leta Zunze Ubumwe za Amerika ndetse no ku biro by’Intumwa ya Papa mu Rwanda, hose banga kumwakira ngo batiteranya n’ubutegetsi.

Rucagu avuga ko byagaragaraga ko hari ikibazo gikomeye hagati ya Kanyarengwe, Lizinde na Habyarimana, abishingiye mu byavugiwe mu nteko rusange y’ishyaka MRND.

Ati “Kanyarengwe twamaze kuvugana nyuma mbona ko aza gutoroka kuko nyuma habaye inteko rusange ya MRND hariya hamaze iminsi hakorera urukiko rw’ikirenga ku Kimihurura, noneho Kinani abwira abari aho ati mube mugumye aho ndaje mu kanya mbereke uko tugiye kuzakora mu minsi iri imbere n’abo tuzakorana”

“Baragenda bariherera, bamazeyo iminota nka 30 noneho aragaruka ati ngiye kubamenyesha abagize Komite nkuru ya MRND. Aravugaaa…. tugiye gusanga dusanga Kanyarengwe ntawe urimo kandi yarafatwaga nk’umuntu wa kabiri ukomeye mu gihugu.”

Igitabo Stepp’d in Blood kivuga ko nko kuri Lizinde, hari hashize igihe hari umwuka mubi hagati ye na Habyarimana ariko ahanini biturutse ku mugore wa Habyarimana wabonaga ko Lizinde yitambika mu bucuruzi bw’umuryango wa Perezida wari uyoboye igihugu mu cyiswe ‘Akazu’.

Kanyarengwe we amakuru yayamenye mbere, ahita yambuka umupaka ahungira muri Tanzania aho yakiranywe yombi, dore ko Perezida Julius Nyerere atajyaga imbizi na Habyarimana, amushinja kuba yarahiritse Grégoire Kayibanda wari inshuti ikomeye ya Nyerere.

Nyuma Kanyarengwe yaje kwinjira muri FPR Inkotanyi bafatanya urugamba rwo kubohora igihugu.

Lizinde na bagenzi be bagejejwe bwa mbere mu rukiko tariki 19 Nzeri 1981. Bivugwa ko benshi mu baregwa bakorewe iyicarubozo kugira ngo bemere ibyo baregwa ndetse bagasinyishwa ku gahato.

Urubanza rwa Lizinde na bagenzi be rwasomwe tariki 25 Ugushyingo 1981. Mu baregwaga, 23 bahamijwe ibyaha naho 24 bagirwa abere.

Bamwe bakatiwe igifungo kiri hagati y’imyaka ibiri na 20, naho Major Lizinde na Alphonse Kagenza bari ku isonga y’umugambi wo guhirika Perezida bakatirwa urwo gupfa.

Ku munsi w’ubwigenge mu 1982, Perezida Habyarimana yababariye imfungwa, Lizinde agabanyirizwa igihano, bahabwa igifungo cya burundu.

Lizinde yatorokeshejwe n’ingabo za FPR Inkotanyi tariki 23 Mutarama 1991, mu gitero bagabye kuri gereza ya Ruhengeri.

Lizinde yakatiwe urwo gupfa, nyuma ahabwa gufungwa burundu afungurwa mu gitero cy'Inkotanyi mu 1991
Kanyarengwe avuga ko yari azi ibya Coup d'état yategurirwaga Habyarimana ariko ngo nta ruhare yari abifitemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .