Tariki 24 Ukwakira, intangiriro y’indunduro ya Mobutu Sese Seko wa Zaïre

Yanditswe na IGIHE
Kuya 25 Ukwakira 2019 saa 06:41
Yasuwe :
0 0

Intambara ya mbere ya Congo ni imwe mu ntambara zikomeye zabayeho mu mateka ya Afurika ndetse ijya initirirwa kuba Intambara nyafurika ya mbere y’Isi kubera uburemere bwayo. Tariki 24 Ukwakira 1996 nibwo yanzitse.

Ni intambara ikomeye kuko niyo yashyize iherezo ku butegetsi bw’umunyagitugu Mobutu Sese Seko wari umaze imyaka 32 ayoboye Zaïre nk’urugo rwe, kugeza ubwo hari bamwe bari baramufashe nk’Imana cyangwa se umuntu utazapfa, nawe akabyuririraho akiyita Umwami wa Zaïre

Imyaka 32 ku butegetsi bwa Mobutu yayimaze yishakira abanzi ari nabo bamurunduye, haba imbere mu gihugu no ku rwego mpuzamahanga.

Mu myaka ya 1990, ubukungu bwa Zaïre bwari aharindimuka , aho umuturage yabonaga nibura amadolari atagera kuri magana atatu ku mwaka, ugize imyaka 49 akiriho akaba ari umurame.

Muri iyo myaka kandi Mobutu yari ku gitutu mpuzamahanga, aho ibihugu bikomeye byifuzaga kandi bigashyigikira impinduka n’amaraso mashya mu buyobozi bw’ibihugu bya Afurika, byasaga n’ibiyobowe cyami nta jambo abaturage bafite.

Ibihugu nka Leta Zunze Ubumwe za Amerika n’u Bufaransa byashyigikiye Mobutu mu mizo ya mbere, byari bitangiye kumukuraho amaboko bimutegeka gukuraho ubutegetsi bw’ishyaka rimwe, akemera amashyaka menshi.

Igisirikare cya Zaïre (FAZ) nacyo cyari aharindimuka kuko imyitwarire mibi yari ikigeze kure ahanini kubera kudahembwa no kutagira ubuyobozi buhamye, byatumaga bahuka mu baturage gusahura, bikongera isura mbi ya Mobutu mu baturage.

Binavugwa ko ngo hari ubwo Mobutu yigeze kubaza abasirikare be uburyo bataka kudahembwa kandi yarabahaye imbunda!.

Jenoside yakorewe Abatutsi, imbarutso y’indunduro ya Mobutu

Nyuma y’uko Ingabo zari iza FPR Inkotanyi zihagarikiye Jenoside yakorewe abatutsi mu Rwanda, Interahamwe n’ingabo za Leta bayishyize mu bikorwa bahise bahungira mu burasirazuba bwa Zaïre, hafi y’imbibi z’u Rwanda.

Ubusanzwe amategeko mpuzamahanga ntabwo yemera ko impunzi zishyirwa hafi y’umupaka w’igihugu zahunze, nyamara izavuye mu Rwanda zo zahawe rugari, maze ingabo zahoze ari iza Leta y’u Rwanda yakoze Jenoside, abahoze mu butegetsi n’abandi batangira kwisuganyiriza ku butaka bwa Zaïre ya Mobutu ngo bagaruke kugaba ibitero kuri Leta nshya yari imaze kujyaho mu Rwanda.

Inkunga ikomeye yatangwaga ivuye muri Guverinoma ya Zaïre yari iyobowe na Mobutu Sese Seko.

U Rwanda rwamenyesheje imiryango mpuzamahanga icyo kibazo ibyima amatwi, rufata umwanzuro wo kwambuka muri Zaïre gusenya inkambi impunzi zisuganyirizagamo ngo zigabe ibitero mu Rwanda, banashishikariza impunzi zabyifuzaga gutaha kuza.

Uko kwinjira k’u Rwanda muri Zaïre kwahaye ingufu indi mitwe itaravugaga rumwe na Leta ya Mobutu, nibwo umutwe wa Alliance des forces démocratiques pour la libération du Congo (AFDL) wari uyobowe na Laurent-Désiré Kabila watangije ibitero bihereye mu Burasirazuba bwa Zaïre maze ukomeza ujya gufata ubutegetsi i Kinshasa.

Intambara yahise yanzika, AFDL ishyigikiwe n’u Rwanda na Uganda, Angola, Eritrea, Ethiopia, Zambia na Zimbabwe n’inyeshyamba nka SPLA yashakaga ubwigenge bwa Sudani y’Epfo.

Kubera ubukene, ruswa n’ubwirasi muri Guverinoma ya Mobutu, abaturage benshi bagiye ku ruhande rw’inyeshyamba biba impinduramatwara kurusha uko byari intambara.

Uruhande rwa Mobutu rwagerageje kwirwanaho rushyigikiwe na Sudani ndetse n’Inyeshyamba za UNITA zashakaga ubutegetsi muri Angola. Ni nabyo byatumye Angola ishyigikira uruhande rwashakaga gukuraho Mobutu dore ko yo yaninjiyemo nyuma.

Mobutu wari no mu bihe bibi arembejwe na kanseri, yahaye ibiraka abacanshuro benshi bo kumufasha gusubiza inyuma inyeshyamba n’abari bazishyigikiye ariko biba iby’ubusa kuko umunsi ku munsi barushagaho kwegera umurwa mukuru Kinshasa.

Kwinjira kwa Angola mu ntambara noneho kongereye ingufu uruhande rwa Kabila rwarwanyaga Mobutu, ku buryo bugaragara barusha ingabo za Leta imbaraga.

Mu mezi ya nyuma y’urugamba, ingabo za Mobutu ntizari zigiteye ikibazo inyeshyamba ahubwo ikibazo cyasigaye ari ibikorwa remezo bike nk’imihanda byorohereza inyeshyamba kugera i Kinshasa.

Tariki 16 Gicurasi 1997, Mobutu wasaga n’uwabuze epfo na ruguru, yahunze igihugu, bucya Laurent Desire Kabila n’ingabo ze batangaza ko bafashe igihugu bashyiraho Guverinoma nshya.

Mobutu yabanje guhungiro muri Togo, avayo ajya muri Maroc ari naho yaje kugwa nyuma y’amezi ane azize kanseri y’ubugabo bw’epfo (Prostate cancer) tariki 7 Nzeri 1997.

Kabila amaze kujya ku butegetsi, yahindutse u Rwanda atangira gukorana n’abasize bakoze Jenoside na we atangira kubafasha ngo bazagaruke gutera u Rwanda. Nibyo byagejeje ku ntambara ya kabiri ya Congo.

Umusirikare mu ngabo za Kabila ubwo yatungaga imbunda ifoto ya Mobutu bamaze gufata Kinshasa
Ikirundo cy'intwaro inyeshyamba za Kabila zari zimaze kwambura ingabo za Mobutu
Inyeshyamba za Kabila zari zishyigikiwe n'abaturage ku bwinshi
Ingabo za AFDL zashyigikiwe bikomeye n'abaturage bari barambiwe Mobutu
Laurent Kabila aganira n'abayobozi muri Guverinoma ye nyuma yo gufata ubutegetsi
Nelson Mandela (hagati) yagerageje guhuza Mobutu (ibumoso) na Kabila biba iby'ubusa
Inyeshyamba za Kabila ubwo zambukaga zigana mu murwa mukuru
Tariki 17 Gicurasi, Kabila yafashe ubutegetsi
Mobutu amaze guhirikwa ku butegetsi, yahungiye muri Togo na Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza