00:00:00 IGIHE NETWORK KN KINYARWANDA EN ENGLISH FR FRANCAIS

Impamvu FPR yacecetse urupfu rwa Gen Maj Fred Rwigema ukwezi kugashira

Yanditswe na Ferdinand Maniraguha
Kuya 2 October 2023 saa 07:40
Yasuwe :

Kuwa Kabiri tariki 2 Ukwakira 1990, imyaka 33 irashize Major General Fred Gisa Rwigema wari uyoboye ingabo za RPA, arasiwe ku gasozi ka Nyabwishongezi mu Karere ka Nyagatare kahoze kitwa Umutara, mu bilometero icumi uvuye ku mupaka ugabanya u Rwanda na Uganda.

Rwigema yarashwe amaze umunsi umwe yinjiye ku butaka bw’u Rwanda, ayoboye ingabo zisaga ibihumbi bitatu zari zigizwe n’abasore n’inkumi b’Abanyarwanda bari bamaze igihe mu buhungiro, Leta ya Perezida Habyarimana yarabangiye gutaha ivuga ko igihugu cyuzuye.

Urupfu rwa Gen Rwigema rwaciye igikuba haba muri FPR nk’umuryango na RPA nk’ishami rya gisirikare ryawo, byari byiyemeje gukoresha inzira y’intambara nk’uburyo bwa nyuma bwo kubona uburenganzira ku gihugu cyabo.

Urupfu rwa Rwigema rwakurikiwe n’izindi mpfu ebyiri z’abari bamwungirije ku buyobozi b’urugamba aribo Major Peter Bayingana na Major Chris Bunyenyezi, bishwe barashwe n’ingabo za Habyarimana mu byumweru bibiri byakurikiye urupfu rwa Rwigema.

Byatwaye ukwezi ngo FPR itangaze ko abasirikare bayo bakuru bapfuye, binyuzwa mu itangazo n’ikiganiro n’abanyamakuru cyakorewe i Bruxeelles mu Bubiligi.

Mu Rwanda Leta ya Habyarimana yahise ikoresha igisa nk’ibirori yishimira ko FPR bayiciye amaboko, hirya no hino imirimo irahagarikwa babyina intsinzi.

Tito Rutaremara ni umwe mu banyamuryango ba FPR Inkotanyi bari bakuru ubwo urugamba rwo kubohora u Rwanda rwatangiraga, akaba ari na we wahawe inshingano zo kujya gutangaza ko abarimo Gen Maj Fred Rwigema batabarutse, nyuma y’ukwezi bibaye.

Mu kiganiro na IGIHE, Rutaremara yavuze ko icyatumye bimara ukwezi bataratangaza urupfu rw’aba basirikare, birindaga ikintu cyose cyaca igikuba mu ngabo mu minsi ya mbere.

Ati “Buriya yarapfuye turabihisha kugira ngo n’abantu bo hanze batabimenya. Urumva umuntu apfuye ku munsi wa mbere, byajyaga gutera ikibazo. Byari no kubura uko abantu babivuga, birahishwa biguma aho.”

Gen Maj Rwigema amaze kwicwa, Maj Paul Kagame wari mu ishuri rya gisirikare muri Leta Zunze Ubumwe za Amerika ni we wahise ahamagazwa ngo ayobore ingabo.

Urugendo rumuvana muri Amerika yarufashe tariki 8 Ukwakira, nyuma y’iminsi itandatu Gen Maj Fred Rwigema atabarutse.

Rutaremara avuga ko Maj Kagame ari we wamwihamagariye, akamusaba kujya gutangaza ko Rwigema yishwe arashwe ari nabwo hasohorwaga itangazo.

Ati “Ndi i Burayi Perezida Kagame arampamagara […] Museveni yari yabibwiye abagize Guverinoma. Barambwira bati ‘nyamuneka ejo urebe uko ubishyira mu itangazamakuru bidasohoka nk’ibihuha’, ni uko natangaje urupfu rwa Gen Major Rwigema, urwa Major Bayingana na Major Bunyenyezi.”

Muri icyo gihe cyose nta muntu n’umwe wari wagatangaje ko abo basirikare bakuru ba RPA bapfuye, Tito akavuga ko byari byaragizwe ibanga rikomeye.

Ati “Nta bantu bari barabimenye ariko n’uwabimenyaga yatinyaga no kubivuga, agaceceka. Mbese byamenywe n’abari bari aho n’abandi bakuru, barabihisha. N’undi ubimenye [..] agatinya kubivuga.”

Urupfu rw’abo basirikare bakuru rwakurikiwe n’ibihuha byinshi

Kuva mu 1990 kugeza mu myaka ya vuba aha, urupfu rw’aba basirikare bakuru ba RPA bapfuye mu ntangiriro z’urugamba rwo kubohora u Rwanda, rwagiye rubamo ibihuha bitandukanye.

Igihuha gikomeye cyakwirakwijwe na Maj Michael Mupende usigaye uba muri Leta Zunze Ubumwe za Amerika, uvuga ko yari mu basirikare ba mbere binjiye ku butaka bw’u Rwanda tariki 1 Ukwakira 1990.

Yanyuze mu binyamakuru bitandukanye avuga ko abo basirikare bishwe na bagenzi babo bo muri RPA kubera amakimbirane yari arimo.

Ni amakuru yanyomojwe na benshi mu basirikare bakuru bari ku rugamba icyo gihe barimo na Gen (rtd) James Kabarebe uherutse kugirwa Umunyamabanga wa Leta muri Minisiteri y’Ububanyi n’Amahanga.

Mu minsi ishize Kabarebe, yavuze ko Mupende yakwirakwije ikinyoma benshi bakacyemera, nyamara ngo mu byo avuga nta kuri na guto kurimo.

Ati “Ni ikintu gikunze gukwirakwizwa na Major witwa Mupende watorotse muri RPA ubu ari muri Amerika. Ni ikintu kandi cyakwirakwijwe n’Abagande ku mpamvu y’uko bashakaga kwivanga muri RPA no kugena uko iri buyobowe nyakubahwa [Kagame] arabangira burundu […] Ibyo bitera kabazo, bazana igihuha cyo kuvuga ngo nitwe twishe Gen Fred, Bayingana na Bunyenyezi. Ntabwo aribyo.”

Kabarebe yavuze ko urupfu rwa Rwigema rwabaye ku manywa y’ihangu tariki 2 Ukwakira, ku buryo nta rujijo na rumwe rukwiriye kubaho.

Ati “ Fred hari mu gitondo tariki 2 Ukwakira, aratubwira twese ati ‘Umunyabwoba umupaka urafunguye nasubireyo.’ Akibivuga umwanzi atangira kuturasa, we [Fred] ajya imbere yacu twese, aranadusiga ajya imbere asanga umwanzi. Twese ababibonaga twabonaga ko ari amakosa akoze ariko nta washoboraga kubimubwira kuko yari amaze kuvuga ngo ‘umunyabwoba asubire Uganda’.”

“Abantu baricecekeye bose baramureba aragenda. Mu masaha make akurikiye, umwanzi yamurasiye ku gasozi, amurasa nabwo atabigambiriye ari uko yabonye gusa abantu bari ku gasozi birunze, apfa kurasa na Machine gun. Ashobora kuba yarabikoze ngo atugaragarize ko nta we ukwiriye gutinya, ariko bimuviramo urupfu.”

Ku bijyanye n’urupfu rwa Maj Bunyenyezi na Maj Bayingana, Kabarebe yavuze ko barasiwe ahitwa Ryabega muri Nyagatare, nyuma yo gutegwa igico n’ingabo za Leta zari ziri muri ako gace.

Ati “Bunyenyezi we yabyutse mu gitondo tariki 23 Ukwakira saa kumi afata imbunda ziremereye ajya gusanga umwanzi. Yagiye Ryabega asanga umwanzi yaduciye hagati, ingabo zacu ziri Gabiro n’iziri Nyagatare yaziciye hagati maze amugwamo, aramurasa apfira aho.”

“Bayingana yumvise imbunda zarasaga Bunyenyezi yibaza ko ari izacu, ati ‘Abasore barashe reka mbakurikire’, aje asanga umwanzi amaze kwica Bunyenyezi yateze mu muhanda, na we agwa aho.”

Gen (rtd) Kabarebe yavuze ko umusirikare wese ugiye ku rugamba, aba afite ibyago byo gupfa ku buryo nta we ukwiriye kubyuririraho ngo abifate nk’ibidasanzwe.

Ati “Ku rugamba nta muntu n’umwe uba adafite ibyago byo gupfa.”

Maj Gen Rwigema Fred yashyinguwe mu cyubahiro tariki 1 Ukwakira 1995, ashyingurwa mu irimbi ry’intwari i Remera nyuma y’umuhango wo kumusezeraho wabereye muri Stade Amahoro.

We na bagenzi be baguye ku rugamba rwo kubohora u Rwanda, bashyizwe mu ntwari z’u Rwanda mu cyiciro cya mbere cy’izitwa Imanzi zihagarariye Ingabo zose z’u Rwanda zaguye ku rugamba cyangwa zashoboraga kurugwaho mu gihe cyahise, icy’ubungubu n’ikizaza zirwanira igihugu.

Maj Gen Rwigema Fred yatabarutse tariki 2 Ukwakira 1990 arashwe n'ingabo za Leta ku musozi wa Nyabwishongezi
Major Peter Bayingana yarashwe n'ingabo zari iza Leta Ryabega mu karere ka Nyagatare
Major Chris Bunyenyezi ari mu basirikare bakuru ba RPA biciwe ku rugamba mu minsi ya mbere mu Ukwakira 1990
Ibihumbi by'Abanyarwanda byari byakoraniye i Remera tariki ya 1 Ukwakira 1995, umunsi Maj Gen Fred Rwigema yashyinguweho
Umubiri wa Maj Gen Rwigema uhabwa icyubahiro mu buryo bwa gisirikare ubwo umubiri we washyungurwaga tariki 1 Ukwakira 1995
Gen Salim Saleh (ibumoso) wo mu ngabo za Uganda ubwo yahaga icyubahiro Maj Gen Fred Rwigema wari inshuti ye ikomeye
Maj Gen Rwigema yashyinguwe mu cyubahiro mu irimbi ry'intwari i Remera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .