00:00:00 IGIHE NETWORK KN KINYARWANDA EN ENGLISH FR FRANCAIS

Impaka ubwo Inkotanyi zafataga Shyorongi, Maj Gen Kagame akazisaba gusubira inyuma

Yanditswe na Ferdinand Maniraguha
Kuya 17 June 2022 saa 07:26
Yasuwe :

Umwaka wa 1993 wabereye ingorabahizi Leta ya Juvenal Habyarimana wari umaze imyaka 20 ku butegetsi mu Rwanda, ibihumbi by’impunzi z’abatutsi byarahejejwe ishyanga, babwirwa ko batemerwe gutaha mu gihugu cyabo kuko ‘cyuzuye’.

Uwo mwaka wageze FPR Inkotanyi imaze imyaka ibiri n’igice itangije urugamba rwo kubohora igihugu, rwanahagurukije Leta ya Habyarimana ikemera kujya mu biganiro.

Mu minsi ya mbere ya 1991, FPR yigaruriye bimwe mu bice bikomeye by’igihugu cyane cyane mu Majyaruguru, nk’aho ku wa 23 Mutarama 1991 yafashe umujyi wa Ruhengeri, ikabohora imfungwa zitandukanye zari zifungiyemo.

Leta ya Habyarimana yabuze andi mahitamo yemera ibiganiro ndetse byemezwa ko imirwano ihagarara ikibazo kigakemurwa mu bwumvikane.

Mu gihe ku ruhande rumwe Leta ya Habyarimana yabaga iri mu biganiro bya Arusha bigamije amahoro, mu gihugu byabaga ari ibicika. Inzego z’umutekano za Leta ku bufatanye n’Interahamwe z’ishyaka MRND ryari ku butegetsi, babaga bahigira abatutsi kubura hasi babashinja kuba ibyitso by’Inkotanyi.

Muri Mutarama na Gashyantare 1993, Leta ya Habyarimana yiraye mu Batutsi mu yahoze ari Gisenyi na Ruhengeri, baricwa. Abahigwaga cyane ni abahaye ubuhamya Komisiyo y’Ihuriro mpuzamahanga rirengera uburenganzira bwa muntu (FIDH) yari imaze igihe ikora iperereza ku bwicanyi bwakorerwaga Abatutsi kuva mu 1990.

Nyuma y’uko abagize iyi komisiyo bavuye mu Rwanda, abiganjemo Ingabo za FAR batangiye guhiga Abatutsi bagize icyo bavuga kuri ubu bwicanyi, bica abasaga 400.

Iki gikorwa cya Leta ya Habyarimana cyabaye nko gukora mu jisho FPR-Inkotanyi yari yaremeye imishyikirano maze yiyemeza kugaba ibitero ngo itange gasopo.

Mu rukerera rwo ku wa 8 Gashyantare 1993, Ingabo za RPA zavuye mu birindiro byazo mu Majyaruguru y’u Rwanda aho zari zimaze igihe zigaruriye zimanuka zigana i Kigali, zifata Umujyi wa Ruhengeri ndetse zikomeza kumanuka zigana mu Murwa Mukuru Kigali zigera i Shyorongi, mu birometero umunani uvuye i Kigali.

Igitabo A thousand hills: Rwanda’s Rebirth and the Man Who Dreamed It cya Stephen Kinzer, kivuga ko ibyo bitero byari bishyigikiwe cyane na benshi mu ngabo z’Inkotanyi kuko bari bamaze igihe basabwe guhagarika imirwano kandi baramaze kubona ko ingabo za Leta nta mbaraga zifite.

Muri icyo gitabo Maj Gen Paul Kagame wari umugaba Mukuru w’ingabo za FPR Inkotanyi yagize ati “Ntabwo intego nyamukuru kwari ugufata Kigali, gahunda kwari uguca intege ingabo za Leta, kubona intwaro no kwagura aho twari tumaze gufata. “

“Mu gihe nari nkiri gutegura uko byagenda bigenze neza n’uko byagenda bigenze nabi, natunguwe n’uburyo byagenze neza cyane. Ingabo za Leta zaratsinzwe bikomeye, ingabo zacu zikomeza zijya mbere. Iyo tubishaka twari gufata umurwa mukuru , nta kibazo na kimwe cyari gihari.”

Mu gihe ingabo za FPR Inkotanyi zari zitegeye Kigali, Leta ya Habyarimana yitabaje u Bufaransa bwohereza ibikoresho n’ingabo zo gufasha iza Leta

Ingabo za FPR Inkotanyi zirwanyeho ndetse zikomeza kugaragaza intsinzi. Mu gihe zari zizeye ko zigiye gufata Kigali, Umugaba wazo Paul Kagame yatanze itegeko ryo gusubira inyuma.

Ntabwo ari ubutumwa bwaguye neza ingabo zari ziri ku rugamba ndetse n’abanyepolitiki bajyaga guhagarira FPR Inkotanyi mu biganiro bya Arusha.

Paul Kagame avuga ko ku ruhande rumwe hari hari igitutu cy’amahanga cyo gusaba FPR Inkotanyi gusubira inyuma ikayoboka inzira y’ibiganiro.

Perezida Yoweri Museveni wa Uganda yinginze Kagame ngo ahurire mu biganiro i Kampala n’abadipolomate b’ibihugu by’amahanga. Agezeyo bamusabye gusubiza ingabo inyuma.

Yarabyemeye gusa ariko asaba ko ingabo za Leta zidasubira mu duce FPR yari yafashe. Abanyamahanga babanje kubyanga, Kagame aratsimbarara avuga ko nibitagenda gutyo urugamba rukomeza.

Baje kubyemera ndetse kuwa 22 Gashyantare 1993 hasinywa amasezerano na Leta, ingabo za FPR Inkotanyi zisubira inyuma, agace zari zafashe kaguma aho nta ngabo z’u Rwanda cyangwa iza FPR zemerewe kukageramo.

Maj Gen Paul Kagame yasabye ingabo gusubira inyuma, biteza impaka

Gusubira inyuma ku musirikare witanze akarwana kugeza aho icyo arwanira akibona imbere ye, ni umwanzuro utoroshye.

Kugira ngo abo muri FPR Inkotanyi babyemere haba abasirikare n’abanyapolitiki byabaye ihurizo.

Umwe mu basirikare bakuru bari bayoboye urugamba yabwiye Kinzer ati “Benshi mu ngabo zacu bari batakaje ubuzima ngo tuhagere, twumva ngo nidusubire inyuma. Twese twaguye mu kantu. Kagame yatubwiye ko gufata Kigali atari yo ntego nyamukuru.”

Kagame ngo yababwiye ko ikibazo atari ugufata Kigali, ahubwo igikomeye ari icyo gukora nyuma yo kuyifata. Yashakaga ko FPR itsinda urugamba yiteguye neza uburyo bwo kubaka igihugu kibereye bose, atari ugupfa gufata umurwa mukuru gusa.

Abajyaga bahagararira FPR Inkotanyi mu biganiro by’amahoro bya Arusha nabo baratunguwe ndetse babwira Kagame ko ingabo nizisubira inyuma, batazasubira mu biganiro.

Kagame ati “Ubwo nabibabwiraga mbasobanurira ibyo twemeranyije, bose baguye mu kantu. Bati ‘bishoboka bite’? Babifashe nk’aho nagambaniye FPR. Nibuka uwari uduhagarariye mu biganiro bya Arusha [Pasteur Bizimungu] ambwira ngo ‘niba ari uko bimeze, ushake undi ujya mu biganiro. Sinzasubirayo.”

Mu kubacururutsa, Kagame yagize ati “Benshi muri mwe ntabwo muzi uko biteye. Iyo muri mu biganiro, ingabo ziri ku rugamba ziba zirwana, zipfa abandi bakomereka. Ninjye uba uri kumwe nabo. Muribwira ko bakabaye barwana bakagera i Kigali ariko si uko barwana. Ikindi muri politiki na dipolomasi, ntabwo buri gihe ibintu biba ari umweru n’umukara, hari aho bigera bikajya mu kigina. Ntabwo buri gihe aba ari ‘Yego’ cyangwa ‘Oya’. Hari aho bigera hakazamo ‘ariko’.”

Kubwa burembe, byaje kurangira Kagame abemeje gusubira inyuma, bagakomeza ibiganiro bya Arusha byasojwe hasinywe amasezerano hagati ya Leta na FPR Inkotanyi kuwa 4 Kanama 1993.

Ni amasezerano yari yitezweho gushyirwa mu bikorwa agahosha intambara yari imaze imyaka itatu mu gihugu, gusa Leta ya Habyarimana yakomeje kuyatinza kugeza muri Mata 1994 ubwo Habyarimana yahanurwaga mu ndege bugacya Jenoside itangira.

Imbaraga za FPR Inkotanyi zahise zijya mu guhangana na Leta yakoraga Jenoside, ibigeraho kuwa 4 Nyakanga 1994 ubwo yahagarikaga Jenoside, Leta yayikoraga igahunga.

Ingabo za FPR Inkotanyi zafashe umusozi wa Shyorongi, hasigaye ibirometero bike zigafata Kigali
Kuri iyi karita ahari umutuku, ni i Shyorongi agace ingabo za FPR zari zigezemo ubwo zasabwaga gusubira inyuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .