00:00:00 IGIHE NETWORK KN KINYARWANDA EN ENGLISH FR FRANCAIS

Mu cyumba cya Loni, ubwo Congo yitambikaga itorwa ry’u Rwanda

Yanditswe na IGIHE
Kuya 5 June 2022 saa 07:13
Yasuwe :

Ku gicamunsi cyo kuwa Kane tariki 18 Ukwakira 2012 mu cyumba cy’Inteko rusange y’Umuryango w’Abibumbye, ibihugu 193 byari byateranye. Ababihagarariye bari barajwe ishinga no gutora ibihugu bitanu bishya, mu myanya idahoraho y’akanama gashinzwe umutekano.

Mu bilometero ibihumbi 11 uvuye New York, ibintu byari ibicika mu mujyi wa Goma no mu nkengero zayo muri Repubulika Iharanira Demokarasi ya Congo. Umutwe wa M23 wari umaze kwigarurira uduce dukomeye tw’intara ya Kivu y’Amajyaruguru.

U Rwanda rwari ruri mu bihugu bishaka umwanya mu kanama ka Loni gashinzwe umutekano, nyamara rwari rumaze iminsi rushinjwa gufasha umutwe wa M23.

Mu minsi ibiri yabanje, hari raporo y’impuguke za Loni yari yarutunze agatoki ku gushyigikira uwo mutwe, ako kanama rwasabaga kwinjiramo gasabwa kurufatira ibihano.

U Rwanda na Uganda byashyirwaga mu majwi ku gufasha M23 byabihakanye byivuye inyuma, bigaragaza ko ari ikibazo cya Congo, kigomba gukemura na yo ubwayo.

Akanama gashinzwe umutekano ka Loni nirwo rwego rw’ikirenga rufatirwamo imyanzuro ikomeye, ijyanye n’amahoro n’umutekano.

Aka kanama kagizwe n’ibihugu 15 birimo bitanu bifitemo imyanya ihoraho nka Leta Zunze Ubumwe za Amerika, u Bwongereza, u Bufaransa, u Burusiya n’u Bushinwa, mu gihe ibindi icumi bifite imyanya idahoraho bigenda bisimburanwaho, hakurikijwe uturere bihagarariye.

U Rwanda rwifuzaga kwinjira muri ako kanama ruhagarariye igice cya Afurika y’Amajyepfo n’Uburasirazuba, rusimbuye Afurika y’Epfo yari isoje manda yayo y’imyaka ibiri.

Kugira ngo u Rwanda rwinjire muri ako kanama, rwari rukeneye amajwi angana na 2/3 by’ibihugu 193 byari bigize Inteko rusange, ngo rusubire mu mwanya rwaherukagamo mu 1993/1994 ari nabwo habaga Jenoside yakorewe Abatutsi.

Ubwo abadipolomate b’ibihugu binjiraga mu cyumba cy’Inteko rusange cya Loni, batunguwe no gusanga ku meza yabo inyandiko idasanzwe. Ni inyandiko yari yakwirakwije ku meza yose ari muri icyo cyumba, yahashyizwe n’intumwa za Repubulika Iharanira Demokarasi ya Congo.

Umwe mu badipolomate b’u Rwanda bari bitabiriye iyo nteko rusange, mu kiganiro na IGIHE yagize ati "Ku munsi w’itora baraje bakwirakwiza inyandiko ku ntebe ya buri gihugu mu nteko rusange, kugira ngo ntibadutore. Bavugaga ko turi igihugu giteza umutekano muke, ko tutubahiriza amahame agenga Umuryango w’Abibumbye."

Yavuze ko ari amabwiriza bari bahawe n’abayobozi babo i Kinshasa, nubwo nabo ubwabo bagaragazaga ko ikibazo bafite ari u Rwanda, aho kuba M23.

Ntabwo Congo yari yonyine muri urwo rugamba rwo kubangamira u Rwanda mu kanama ka Loni, kuko yari ishyigikiwe na Afurika y’Epfo [ari nayo u Rwanda rwashakaga gusimbura], na Zimbabwe.

Amatora yarabaye, u Rwanda rutorwa ku majwi 148, bivuze ko ibihugu 45 ari byo bitarutoye.

Mu gihe ibindi bihugu byiyamamaje byabaye ngombwa ko hakorwa andi matora, ku Rwanda ho nta cyiciro cya kabiri cyabayeho. U Rwanda icyo gihe rwinjiranyemo na Argentine, Australia, Korea y’Epfo na Luxembourg.

Gutorwa k’u Rwanda muri ibyo bihe byafashwe nk’itsinzi idasanzwe, kuko Congo yari yakoze ibishoboka byose ngo rudatorwa.

Perezida Kagame ni umwe mu bagaragaje ibyishimo by’iryo torwa, abinyujije kuri Twitter.

Yagize ati "Ibyo abanzi bavuga byose, ukuri n’ubutabera biratsinda. Hari ubwo bisaba kubiharanira."

Louise Mushikiwabo wari Minisitiri w’Ububanyi n’amahanga w’u Rwanda, yavuze ko intsinzi y’u Rwanda igaragaza gushishoza kw’abagize inteko rusange ya Loni.

Ati “Birumvikana umujinya ushobora gutuma abantu bakora ibintu bidashimishije, icyakora benshi berekanye ubushishozi kurusha abayobozi ba Congo n’abandi mu batatwumva.”

Agaruka kuri raporo ishinja u Rwanda gufasha M23, Mushikiwabo yabwiye Aljazeera ati “Turifuza kujya mbere aho kurangazwa na raporo zidafite agaciro. Ibihugu bigize Loni byagaragaje uko bibyumva, twe rero nk’Abanyarwanda twishimiye kujya mbere.”

Umudipolomate w’u Rwanda wari muri ayo matora, yabwiye IGIHE ko ikibazo cy’abanye-Congo, ari ukuyoborwa n’amarangamutima aho kuba ibimenyetso.

Ni nabyo biherutse kuba ubwo Congo yaregaga u Rwanda mu kanama ka Loni gashinzwe umutekano, ivuga ko rwayigabyeho ibitero mu ishusho ya M23.

Ati "Ni ibintu abagize akanama k’umutekano ka Loni bamaze kumenyera, kubera ko ibyavuzwe muri iriya nama usanga bijya gusa n’ibyavuzwe muri za 2012/2013. Bamaze kumenyera kariya karere, ntabwo Congo yaza ubu ngo ishinje u Rwanda abagize akanama bahite babyemera."

Ibihugu byombi byongeye kurebana ay’ingwe nyuma y’ibitero M23 yubuye mu kwezi gushize, ishinja Congo kutubahiriza amasezerano basinye mu 2013.

Congo aho gusubiza impamvu itubahirije ibyo yasinye, yahise ishinja u Rwanda kuba inyuma ya M23, itangira inkundura yo kurusabira ibihano hirya no hino.

Akanama ka Loni gashinzwe umutekano gaherutse gusaba Congo gukemura ibibazo mu buryo bw’ibiganiro, aho gukoresha izindi nzira nkuko yo yabisabaga.

Iki cyumba gikomeje kurwanirwamo inkundura ya dipolomasi hagati y'u Rwanda na Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .