Basigayabo umaze imyaka 12 ari Gitifu w’Akagari yabaye umudepite

Yanditswe na Emma-Marie Umurerwa
Kuya 6 Nzeri 2018 saa 01:18
Yasuwe :
0 0

Ubuzima kuri iyi Si burangwa n’indoto, buri muntu agaharanira kuzamuka mu ntera niba yari atunze inka imwe akifuza eshatu cyangwa ishyo, umukozi akifuza ko umushahara we wikuba inshuro runaka, ushinzwe umutekano akifuza ko amapeti yiyongera, bityo bityo.

Mu mubare w’abamaze gukabya inzozi, ku wa Kabiri tariki 4 Nzeri 2018 hiyongereyeho Basigayabo Marcelline umaze imyaka 12 ari Umunyamabanga Nshingwabikorwa w’Akagari ka Nyakabungo mu Murenge wa Cyumba, mu Karere ka Gicumbi.

Uyu mugore w’imyaka 39 yatorewe by’agateganyo kuba umudepite uhagarariye abagore mu Ntara y’Amajyaruguru, ku majwi 89.4%.

Ni impinduka zikomeye urebye inshingano zo guhagararira abanyarwanda bose ukagereranya no guhagararira Akagari kamwe, cyangwa mu buryo bw’imibereho, ukagereranya umushahara wa 120 000Frw wa Gitifu w’Akagali na 1.774.540 Frw wa umudepite.

Mu 2006 ubwo Basigayabo yari arangije amashuri yisumbuye, nibwo yahawe kuyobora Akagari ka Rwankonjo mu Murenge wa Cyumba, ari naho avuka.

Mu mwaka wa 2016 yimuriwe mu Kagari ka Nyakabungo, ari naho akorera kugeza ubu.

Nubwo afite impamyabumenyi y’icyiciro cya kabiri cya kaminuza (A0) mu bijyanye n’Iterambere ry’Icyaro, bikiyongera ku buhinzi yize mu ishuri risumbuye rya Nyagahanga mu Karere ka Gatsibo, ntiyigeze atekereza gushaka akandi kazi.

Kuyobora Akagari abifata nk’amahirwe yagize, bikamubera isoko y’ubunararibonye bugiye kumwicaza mu Nteko.

Yagize ati "Nagize amahirwe yo kuyobora Akagari k’ahantu navukiye, nakuriye, mbese ubuzima bw’abaturage baho nari mbuzi neza, ibibazo bafite nari mbizi. Nashakaga kugira umusanzu ntanga mu guteza imbere igihugu n’agace mvukamo by’umwihariko."

“Sinigeze nifuza gushaka akandi kazi kuko nahoraga nifuza ko agace mvukamo katera imbere, nahoraga mvuga ko ntazahasiga uko nahasanze. »

Muri ako gace k’icyaro, Basigayabo yatangiye kuhakorera nta biro y’Akagari bihari, ariko ku bufatanye n’abaturage biyubakiye ibiro, bakomereza ku bindi bibazo birimo amakimbirane yo mu miryango, ibishingiye ku mutungo n’ibindi.

Yakuranye inzozi zo kuba ijwi rya rubanda

Basigayabo avuga ko kuva yiga mu mashuri abanza ndetse n’aho agereye mu yisumbuye, yagiye agirirwa icyizere n’abandi banyeshuri bakamutorera kuyobora ibyiciro bitandukanye.

Ati “Natangiye kugirirwa icyizere nkiri mu mashuri abanza, nkurana ikintu cyo gukorera abandi, ariko ntangiye kuyobora Akagari nibwo niyumvisemo ko ngomba gukorera abaturage no kuba ijwi rya rubanda kandi ntizigamye. »

"Naterwaga ishema no kugira uruhare mu gukorera ubuvugizi ibibazo runaka by’abaturage bigakemuka. Nibyo rero byagiye bintera imbaraga numva ko ndamutse ngize amahirwe nkagera ku rwego rwisumbuyeho, ijwi ryanjye ryarushaho kugera kure nkazakora ibirenze ibyo nakoze."

Yiyamamaje yifitiye icyizere

Ubwo yatangiraga urugendo rwo kwiyamamaza, Basigayabo yari umwe mu bakandida 23 bahataniraga imyanya ine y’abagore bahagarariye Intara y’Amajyaruguru mu Nteko Ishinga Amategeko.

Avuga ko guhera ku munsi wa mbere wo kwiyamamaza yumvaga yifitiye icyizere gikomeye.

Yakomeje agira ati “Sinigeze ncibwa intege no kwiyamamaza hamwe n’abandi bagore navuga ko bari bakomeye, bagiye bakora no mu nzego zitandukanye kandi zikomeye. Najyaga imbere y’imbaga y’abaturage nkumva ntewe ishema no kuvuga ko nyobora Akagari.”

Nyuma yo gutorwa, Basigayabo avuga ko nubwo bikiri iby’agateganyo, byamweretse ko afitiwe icyizere n’abaturage.

Yakomeje agira ati “Nibiba impamo rero nkajya guhagararira abaturage mu nteko ishinga amategeko n’ubundi nzakomeza kuba ijwi ry’umuturage, kuba ijwi ry’umugore.”

Uretse Basigayabo Marceline, abandi badepite bahagarariye Intara y’Amajyaruguru batowe by’agateganyo ni Murekatete Marie Therese, Uwingabiye Solange na Nirere Marie Therese.

Basigayabo Marcelline umaze imyaka 12 ari Gitifu w'Akagari yatorewe kuba depite

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza