00:00:00 IGIHE NETWORK KN KINYARWANDA EN ENGLISH FR FRANCAIS

Uburezi kugera muri kaminuza, icyerekezo gishya abaturage bashaka ko cyakongerwa ku burezi bw’ibanze

Yanditswe na Cyprien Niyomwungeri
Kuya 25 July 2017 saa 11:56
Yasuwe :

Ibikorwa byo kwiyamamaza ku bakandida batatu bifuza kuyobora u Rwanda muri manda itaha aribo; Kagame Paul, Dr. Habineza Frank na Mpayimana Philippe, birarimbanyije aho buri wese akomeje kuzenguruka igihugu ageza ku baturage imigabo n’imigambi ye kugira ngo bazamutore ku wa 4 Kanama 2017.

Abaturage bo mu Karere ka Gatsibo baganiriye na IGIHE ubwo umukandida wa FPR-Inkotanyi, Kagame Paul, yajyaga kwiyamamazayo, bashima cyane gahunda y’uburezi bw’ibanze bw’imyaka cumi n’ibiri, bagasaba ko uwo bazatora yakongera icyiciro cya kaminuza kuri politiki y’uburezi bw’ibanze kuko muri aka karere n’ahandi mu gihugu hari abasoreza amasomo mu mashuri yisumbuye gusa bikabagora guhatana ku isoko ry’umurimo.

Politiki y’uburezi bw’ibanze yatangiye ari imyaka icyenda gusa nyuma igirwa 12. Bamwe mu bayizemo bakabona amanota meza bemererwa kujya muri Kaminuza y’u Rwanda gukomeza amasomo. Gusa hari abatagira aya mahirwe bifuza ko byava ku myaka 12 bikagera ku cyiciro cya mbere cya Kaminuza n’ibindi.

Uwitwa Tuyisenge Ernestine w’imyaka 23 wo mu Murenge wa Remera, avuga ko yarangije kwiga mu burezi bw’ibanze akifuza ko uko iterambere rigenda ryiyongera politiki y’ubu burezi yakongererwa agaciro bukagera no ku cyiciro cya Kaminuza.

Yagize ati “Nkatwe muri aka karere dufite ishami rimwe rya Kaminuza ya UTAB riba i Kiramuruzi kandi ntabwo ari bose babasha kuryigamo kubera ubushobozi. Abarangiza mu mashuri y’uburezi bw’ibanze usanga tubura icyo dukora n’aho dukomereza amasomo. Tubonye ishuri rikuru tugakomerezamo amasomo n’iyo yaba imyuga byadufasha kwiteza imbere tukihangira imirimo.”

Iki cyifuzo gishimangirwa na Dushimirimana Emmanuel wo mu Murenge wa Rwimbogo, usanga uwatorwa yashyira muri buri karere ishuri ry’imyuga abarangije mu mashuri y’ubumenyi bw’ibanze bajya bakomerezamo, bakabasha kubyaza umusaruro amahirwe y’uburezi bw’ibanze bahawe.

Yagize ati “Aramutse atowe ndifuza ko abarangije mu burezi bw’ibanze yaduha ishuri ry’imyuga natwe tukiga tukunguka ubundi bumenyi. Usanga turangiza kwiga tukabura ibyo dukora kuko ibyo twize muri ya mashuri bidahagije ku isoko ry’umurimo.”

Akarere ka Gatsibo gafite ishami rimwe rya Kaminuza y’ikoranabuhanga n’ubugeni ya Byumba (UTAB), rimaze igihe gito rikorera mu Murenge wa Kiramuruzi kandi na ryo rikaba ryigenga atari buri wese wabasha kuryigamo yirihira.

Mu ijambo umukandida wa FPR-Inkotanyi, Kagame, yagejeje ku bihumbi byitabiriye ibikorwa bye byo kwiyamamaza mu karere ka Gatsibo, yavuze ko mu myaka irindwi iri imbere hazakorwa ibindi byinshi mu iterambere bishingira ku bimaze kugerwaho.

Yagize ati “Ku wa 4 Kanama ni ugukomeza urugendo rw’amajyambere rwo kugira ngo Abanyagatsibo tugere ku bindi twifuza kugeraho. Turashaka umutekano, turashaka ubumwe, turashaka amajyambere ibyo byose tugomba kubigaragaza mu bikorwa byacu bya buri munsi; aborora, abahinga, abacuruza, abana mu mashuri n’imihanda.”

Mu migabo n’imigambi y’Umuryango FPR-Inkotanyi mu myaka irindwi iri imbere harimo gukomeza guteza imbere uburezi bufite ireme kuri bose no gushyigikira ubumenyi bushingiye ku iterambere ry’ubukungu.

Kuri iyi ngingo hazitabwa ku burezi bw’incuke n’abafite ubumuga, kurandura burundu ikibazo cy’abana bata ishuri, gukorana n’abikorera mu guteza imbere ireme ry’uburezi, kubaka ubushobozi bw’abarimu n’imibereho yabo. Hari kandi kongera umubare w’amashuri y’uburezi rusange n’imyuga.

Ishyaka Democratic Green Party ryo rivuga ko umukandida waryo, Habineza, natorwa rizongera imbaraga mu bushakashatsi no mu mibereho ya mwalimu harimo no kumwongerera umushahara, gushyira muri buri murenge ishuri ry’imyuga rigashyirwamo amashami ajyanye n’ibyo abatuye muri ako gace bakeneye byabateza imbere. Hari kandi kwita kuri gahunda y’amashuri y’incuke.

Umukandida wigenga Mpayimana Philippe, ku bijyanye n’uburezi avuga ko ari umurimo ukwiye kugenerwa imari yose na leta, ntihagire umushoramari n’umwe wiharira inyungu mu bikorerwa abanyeshuri akura amafaranga mu babyeyi, ngo arabagurisha za porogaramu, imyambaro cyangwa ibiryo.

Avuga ko kugira ngo ireme ry’uburezi rigerweho, ari ngombwa ko leta igenzura niba nta munyeshuri uvutswa amasomo kubera ubukene bw’ababyeyi. Niba hari amafranga atishyuwe, leta ikaba ikwiye gukurikirana umubyeyi aho kugirango umuyobozi w’ishuri ashyire umwana hanze kubera iyo mpamvu.

Abiga mu mashuri y’incuke mu mwaka wa 2016 bari 185,666, abo mu mashuri abanza bari 2 546 263, abigaga mu mashuri yisumbuye bari 553 739 naho kugeza ubu mu Rwanda habarurwa Kaminuza n’amashuri makuru abiri agengwa na leta ariyo: Kaminuza y’u Rwanda n’Ishuri rishinzwe guteza imbere amategeko (Institute Of Legal Practice And Development) mu gihe izigenga ari 35.

Imbaga y'abaturage i Gatsibo yari yaje gushygikira Paul Kagame mu bikorwa bye byo kwiyamamaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .