00:00:00 IGIHE NETWORK KN KINYARWANDA EN ENGLISH FR FRANCAIS

Icyo Mpayimana na Green Party bavuga ku kwemerera abagabo gushaka abagore benshi

Yanditswe na Cyprien Niyomwungeri
Kuya 31 July 2017 saa 08:45
Yasuwe :

Mu bihugu bitandukanye byo muri Afurika gushaka umugore urenze umwe byabaye akarande mu mico n’imyemerere y’ababituye, ku buryo hari bimwe birimo na Kenya byeruye mu rwego rw’amategeko mbonezamubano bigashyigikira ko abagabo bashaka abagore benshi ntawe bagishije inama.

Gusa mu bihugu nk’u Rwanda, ingingo ya 166 y’itegeko rigenga abantu n’umuryango yo muri Kanama 2016, risobanura ko ugushyingiranwa kwemewe ari uk’umugabo umwe n’umugore umwe gukorewe mu butegetsi bwa Leta ku bushake bwabo.

Bamwe mu baturage baganiriye na IGIHE biganjemo abayisilamu basanzwe bemera ko umugabo ashaka abagore barenze umwe, basanga uzayobora u Rwanda mu myaka irindwi iri imbere yemereye abagabo ubu burenganzira byagabanya ibibazo birimo amakimbirane, impfu z’abashakanye n’ibindi bikomoka ku buharike.

Ntawiheba Yusufu w’imyaka 44 wo mu kagari ka Mugandamure mu murenge wa Busasamana, mu karere ka Nyanza, asanga amategeko yemereye abagabo babishoboye gushaka abagore barenze umwe byakemura ikibazo cy’ubusambanyi bubyara za gatanya n’ibindi bibazo mu muryango.

Yagize ati “Kuba hari abagabo bashaka ibiro bya kabiri cyangwa bajya gusambana rimwe na rimwe bakabafata bigateza amahane, bituruka ku kuba bagenda bihishe. Baramutse bemerewe gushaka urenze umwe, na wa mugore wa mbere yabyakira kuko byaba bikozwe mu mucyo.”

Nyiramana Housna w’imyaka 38 utuye Mugandamure, asanga byazajya bifasha nk’umugabo washaka umugore ntashobore kubyara cyangwa uwatandukanye n’umugabo.

Yagize ati “Ushobora gushaka umugore ugasanga ntabyara, aho kugira ngo mutandukane, amategeko akakwemerera gushaka undi n’abana mubyaye bakaba bemewe n’amategeko n’umuryango.”

Akomeza avuga ko nk’abapfakazi badakunda gushakwa n’abasore hagiyeho ririya tegeko hari abagabo bafite abandi bagore bajya bababenguka bakabahoza amarira.

Uwimana Antoinette w’imyaka 29, avuga ko nubwo itorero rya ADEPR asengeramo ritabyemera, asanga byafasha ingo nyinshi kubana neza kuko byakemura ikibazo cy’abagabo batanyurwa.

Ati “Hari abagabo batanyurwa bagaca inyuma abagore bigatera gatanya, abana bakabaho nabi. Biramutse byemewe abagabo bashaka mu bwisanzure n’izo gatanya zikagabanuka.”

Mpayimana abivugaho iki?

Umukandida wigenga mu matora ya Perezida wa Repubulika y’u Rwanda, Mpayimana Philippe, yateye utwatsi ibyo kuba aramutse atsinze yasinya ku iteka ryemerera abagabo gushaka abagore benshi, kuko asanga bitakemura ibibazo umuryango nyarwanda ufite.

Yagize ati “Ntabwo nakwifuza ko tujya mu kwemerera abagabo gushaka abagore benshi ahubwo twaharanira ko abagabo bumva ko abagore bafite uruhare ku mutungo w’urugo. Oya ntacyo byahindura icy’ingenzi ni uguha inshingano abagore bakumva ko imiryango ari bo ishingiyeho. Nshaka kuvugurura ubukungu bushingiye ku rugo.”

Hari uko Democratic Green Party ibibona

Umunyamabanga mukuru wa Democratic Green Party of Rwanda, Jean Claude Ntezimana, yabwiye IGIHE ko asanga kwemerera abagabo gushaka abagore benshi bitakemura ibibazo biri mu muryango bishingiye ahanini ku busambanyi nka gatanya n’ibindi.

Yagize ati “Ntabwo turabiganiraho mu rwgo rw’ishyaka ariko ndumva abagore benshi atari byo byazana igisubizo ahubwo habaho kutumvikana bikazana amakimbirane kuruta uko byari bimeze.”

Uko Islam ifata gushaka abagore benshi

Umuvugizi w’idini ya Isilamu mu Rwanda Sheikh Sindayigaya Musa, yabwiye IGIHE ko gushaka abagore barenze umwe bitazanywe na Islam ahubwo yabihaye umurongo igashyiraho ko ntawe ukwiye kurenza abagore bane no kuba uwabashatse agomba kwita kuri bose mu buryo bungana.

Avuga ko kuba amategeko atabyemera bigira ingaruka yaba ku bana no ku mugore washatswe nyuma y’uwa mbere.

Yagize ati “Kubera ko amategeko atabyemera usanga abagore babikora mu ibanga bikagira ingaruka kuko uwo mugore aba ameze nk’umusahuzi, aza afite umugambi wo gusenya urugo yasanze ngo yegukane uwo mugabo, abana uwo mugabo abyara mu rugo rw’ibanga ntabwo ari abana bemerwa ngo bamenyane na benewabo, rimwe na rimwe ugasanga abana baranashakanye kuko bataziranye.”

Asanga gushaka abagore benshi byaba gusubiza ikibazo cy’umuryango mugari cyo kuba abagore ari benshi kurusha abagabo, bituma iyo umugabo ashatse umugore umwe hari ababura abagabo, ugasanga babaye indayi cyangwa bagasenya ingo z’abandi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .