Abakinnyi baturutse mu turere dutandukanye, barushanyijwe muri siporo zirimo gusiganwa ku maguru, gutera intosho (shotput), gutera ingasire (discus) no gutera umuhunda (javelin).

Mu gusiganwa ku maguru, Niyibizi Emmanuel yahize abandi mu gusiganwa metero 1500, akoresha iminota ine n’amasegonda 22 mu gihe Tuyiringire Rimogène yakoresheje iminota itanu n’amasegonda atandatu.

Niyibizi ni we wanatsinze muri metero 400 aho yakoresheje amasegonda 57 n’ibice bitandatu naho Niyonzima Jean Luc ahiga abandi muri metero 100 akoresheje amasegonda 15 n’ibice 30.

Mu bagore, Uwiduhaye Clémentine yabaye uwa mbere muri metero 400 akoresheje umunota n’amasegonda arindwi naho Mukandayisenga Valentine atsinda muri metero 100 akoresheje amasegonda 16 n’ibice 30.

Mu gutera intosho mu bagore, Uwitije Claudine yayiteye muri metero 6.10, Mujawimana Charlotte ayitera muri metero 6 mu gihe Nikuze Josiane (5,90 m) na Mukarukundo Honorine (5,87m) bakurikiyeho.

Mu bagabo, uwitwaye neza ni Kagiraneza Noël wayiteye muri metero 7,20 naho Ndacyayisenga Théophile ayitera muri metero 5,60.

Mu gutera ingasire mu bagore, Mukarukundo Honorine yahize abandi, ayigeza muri metero 17,70 aho yakurikiwe na Uwitije Claudine (17,20), Nikuze Josiane (15,60) na Mujawimana Charlotte (11,20).

Mu bagabo, Kagiraneza Noël yayiteye muri metero 23,30 naho Ndacyayisenga Théophile ayitera muri metero 15,34.

Umunsi wa Gatatu wa Shampiyona uzabera mu Karere ka Huye ku wa 17 Gashyantare 2024 mu gihe uwa Kane, ari na wo usoza, uzabera mu Bugesera tariki ya 27 Mata.