Ikipe y’Igihugu y’Imikino Ngororamubiri iri gutozwa na Karasira Eric na Kanyabugoyi Anicet, igizwe n’abagabo batandatu ndetse n’abagore batanu, bazahatana mu byiciro birimo Full Marathon y’Abagabo, Half Marathon y’Abagabo na Half Marathon y’Abagore.

Abagabo bazakina Full-Marathon y’ibilometero 42 ni Hitimana Noël usanzwe ukinira APR A.C, wabaye uwa gatanu mu 2024 ndetse na Ntirenganya Fidèle w’Ikipe ya Sina Gérard, we ugiye gukina iri rushanwa ku nshuro ya mbere nyuma yo kwigaragaza mu marushanwa y’imbere mu gihugu arimo n’isiganwa ryakozwe muri Werurwe harebwa urwego rw’abashobora gutoranywa muri iyi Kipe y’Igihugu.

Imanizabayo Emeline watwaye Umudali w’Umuringa mu 2024, ayoboye abagore bazakina Half Marathon y’ibilometero 21, aho muri iki cyiciro ari hamwe na Niyonkuru Florence basanzwe bakinana muri Sina Gérard AC, Musabyeyezu Adeline na Ibishatse Angélique (ba APR) na Uwizeyimana Jeanne Gentille wa Police AC.

Mu bagabo bazakina Half Marathon uyu mwaka ntiharimo Mutabazi Emmanuel wegukanye umudali w’Umuringa mu 2024 kubera ko ari mu butumwa bw’akazi, ahubwo amaso azaba ahanzwe Manirafasha Primien wa Sina Gérard, Nsabimana Jean Claude, Nshimiyimana Emmanuel na Ingabire Victor (bose ba APR AC).

Abakinnyi bafite icyizere cyo kwitwara neza uyu mwaka

Kigali International Peace Marathon igiye kuba ku nshuro ya 20, ikaba ku nshuro ya kabiri iri ku rwego rwa gatatu rw’amarushanwa akomeye ku Isi ’Global Elite Label Status’, ikunze kwiharirwa n’Abanya-Kenya, ariko n’abandi barimo Abanya-Ethiopia, Eritrea na Uganda bagatwaramo imidali.

Nubwo bimeze gutyo, Imanizabayo Emeline wabaye uwa gatatu mu 2024, yavuze ko uyu mwaka bashaka kongera kwitwara neza ndetse ku giti cye aharanira kuzabona umwanya mwiza kurusha uw’ubushize.

Ati “Ubushize uwa mbere yansize umunota n’amasegonda, uwa kabiri ansiga isegonda rimwe, ubu nanjye nariteguye. Turashaka kureba ko twazamura ibendera ry’igihugu. Iyo ubonye amarushanwa atandukanye bikwereka aho uhagaze kandi federasiyo yacu na Minisiteri ya Siporo baduhaye amarushanwa atandukanye. Ndashaka kureba ko hari icyo narenza ku byo nakoze ubushize.”

Ingabire Victor uzakina Kigali International Peace Marathon ku nshuro ya kabiri, yabaye uwa 10 muri Half Marathon ubwo yakinaga ku nshuro ya mbere. Yagaragaje ko yifitiye icyizere cyo kwegukana iri rushanwa uyu mwaka.

Ati “Birashoboka ko uyu mwaka dushobora kuyitwara igasigara mu Rwanda kuko ikipe turi hamwe ifite imbaraga kandi turi mu mwuka umwe. Ku giti cyanjye meze neza, iyi Peace Marathon ishobora gusigara mu biganza byanjye kuko meze neza cyane.”

Hitimana Noël wabaye uwa gatanu muri Full Marathon y’Abagabo mu 2024, yavuze ko ibyo abakinnyi babatsinze ubushize babarushije, ari byo bahereyeho bakora mu mwiherero bari gukora.

Ati “Mu mwaka ushize haje abakinnyi benshi bakomeye, ariko uyu munsi twagiye twitegura, tureba tekinike n’ahantu bagiye badusigira, twagiye tubikosora. Twihaye intego ko tuzakora neza uyu mwaka.”

Umutoza yavuze impamvu Abanyarwanda batsindwa n’Abanya-Kenya, kwitoreza mu Bugesera no ku bakinnyi bashya

Umutoza Karasira Eric yavuze ko abakinnyi bameze neza n’abafite ibibazo ari iby’uburwayi busanzwe kandi abaganga babitaho ku buryo hari icyizere ko bazitarwa neza.

Ati “Twabonye amarushanwa menshi, hari n’abakinnyi bagiye mu marushanwa mpuzamahanga, ariko abakinnyi bariteguye ku buryo bazakora ibishoboka byose bakaza mu myanya iri imbere kurusha ubushize aho twabonye umwanya wa gatatu.”

Abajijwe impamvu Abanya-Kenya baza i Kigali bakahatsindira Abanyarwanda bahamenyereye, Karasira yavuze ko biterwa n’uko bo baba baritabiriye amarushanwa menshi atandukanye.

Ati “Abenshi buri mpera z’icyumweru mubabona mu marushanwa yo hanze ku migabane itandukanye. Ntacyo navuga ko barusha abakinnyi bacu, abacu na bo barakomeye kandi ntiwaba uwa gatatu muri Kigali International Peace Marathon utari umukinnyi ukomeye.”

Ku bijyanye no kuba abakinnyi bakorera umwiherero mu Bugesera kandi bazakinira i Kigali, uyu mutoza yavuze ko aho hantu hombi hadatandukanye cyane.

Ati “Navuga ko haba heza kurusha i Kigali, ariko bitewe n’igihe umwiherero watangiriye, iminsi 15 si myinshi cyane, abantu biruka baba bakeneye igihe kinini. Baba bakeneye igihe kinini cyo kwiruka mu misozi kugira ngo babone umwuka ariko tugakenera n’iminsi mike nk’ibyumweru bitatu kugira ngo ahantu hari ubushyuhe hasa nk’aho tuzakinira.”

Yongeyeho ati “Umwuka wa Bugesera umeze nk’uwa Kigali kandi muri Kigali ntiwabona aho ukorera mu minsi isanzwe kandi mu Bugesera ho birakunda.”

Agaruka ku bakinnyi bashya, yavuze ko mu ntego abatoza bihaye harimo kuzajya bakomeza gushaka impano zitandukanye.

Ati “Ni bashyashya kandi ni beza mwarabibonye. Uyu wa Full-Marathon [Fidèle] twamubonye mu isiganwa ryo kureba urwego rw’abakinnyi, ni byiza ko tubona abantu bashyashya buri mwaka. Ni gahunda twihaye buri mwaka ku buryo dushakisha impano nk’uko uriya bamukuye mu marushanwa y’Umurenge Kagame Cup, nk’uko Victor twamukuye mu marushanwa asanzwe yo hasi, n’uyu mwaka turateganya gushaka abandi bana.”

Biteganyijwe ko, nk’uko byagenze mu 2024, Kigali International Peace Marathon izatumirwamo abakinnyi bakomeye bari mu 100 ba mbere ku Isi muri Full Marathon na Half Marathon.