Jay Polly wari inkingi ya mwamba muri Hip Hop y’u Rwanda yitabye Imana 2 Nzeri 2021.

Kigali Hip Hop Festival yitabiriwe n’abaraperi Fireman, P FLA, MC P Wamamaye, B.Threy n’abandi. Bafashe umwanya baririmba zimwe mu ndirimbo za Jay Polly mu rwego rwo kumwibuka no kumuha icyubahiro nk’umuhanzi washyize itafari ku muziki wa Hip Hop mu Rwanda.

Umurishyo wa mbere w’iki gitaramo watangiye saa mbili n’iminota 16, umuraperi wa mbere yurira urubyiniro gusa abantu bari bake cyane kuri Canal Olympia ku i Rebero.

Abari bahari ariko ntibyababujije kwizihirwa kuko babyinnye cyane uhereye igihe umuhanzikazi Nessa, Muto wa 2 na Prime Mazimpaka bagiriye ku rubyiniro.

Iki ni igitaramo cyatangiye kiyobowe na MC Abouwiz nyuma waje kunganirwa na MC P Wamamaye barakomezanya. Uko amasaha yagendaga akura niko abantu bagendaga biyongera gake.

Umuraperikazi Fearless wari umaze iminsi arwaye yagaragaye muri iki gitaramo. Niyonsenga Keza Amina uzwi nka Fearless yazamutse ku rubyiniro saa tatu n’iminota 44, bitungura abari aho dore ko byari bizwi ko arwaye.

Uyu muraperikazi wazanye intebe kurubyiniro ari nako ahinduranya imyenda akuramo umwe agasigarana undi, mu ndirimbo yaririmbye harimo isaba abantu kwizera Imana.

Jay Polly yunamiwe

Ubwo MC P Uwamamaye yageraga ku rubyiniro, yafashe umunota umwe hacurangwa indirimbo ya Jay Polly. Wamamaye yavuze ko hari benshi Jay Polly yaharuriye inzira mu muziki wa Hip Hop mu Rwanda.

Umuraperi B.Threy uri mu bagezweho muri iyi minsi na we yageze ku rubyiniro saa tanu n’iminota 18 . Mu minota 30 yahamaze, yageze hagati aha icyubahiro Jay Polly aririmbana n’abafana indirimbo ye yise “Ndacyariho”.

Fireman na PFLA ubwo bari ku rubyiniro basabye abari aho ko bafatanya bakifuriza kuruhukira mu mahoro abahanzi Yvan Buravan na JayPolly , Yanga ndetse na Mama wa Meddy bitabye iminsi mu gihe gishize.

Aba baraperi bombi bahise baririmba indirimbo bahuriyemo na Jay Polly mu myaka yashize bakiri kumwe mu itsinda rya Tuff Gang.

Umuraperikazi wari utegerejwe na benshi Marie Grace Abayizera uzwi nka Young Grace yakurikiye B Threy yanzika mu ndirimbo " Hello Boss” n’indi imwe ahita ava ku rubyiniro kubera ikibazo cy’amasaha.

Umuraperi P FLA yaje akurikira Young Grace, hacurangwa indirimbo ya Nel Ngabo na Fireman bise ‘Muzadukumbura’. Fireman yahise azamuka ku rubyiniro bafatanya kuririmba.

Fireman yafashe umwanya ashimira abafana bake babashije kuza ababwira ko bafite umutima ukunze injyana ya “HipHop”.

Ati “Uko mungana gutya mufite urukundo rw’injyana. Ntabwo mwaje gushungera mwagumye aha kubera injyana kandi ndabibubahira cyane.”

Iki gitaramo cyarimo umubare munini w’abaraperi bagombaga gutaramira abakunzi babo umurishyo wacyo wa nyuma wakubiswe abahanzi nka BullDogg, Ririmba , Ish Kevin , Khalfan Govinda batahakandagiye.