{Ihuriro riharanira demukarasi muri Congo Kinshasa (RCD/KML) ntirikozwa ibyo kwimurira abarwanyi ba FDLR mu gace ka Kisangani nk’uko umukuru w’iri huriro Antipas Mbusa Nyamwisi yabitangaje kuwa Gatandatu mu kiganiro yagiranye n’abanyamakuru i Kinshasa.}

Umwe mu badepite bo muri iri huriro, Koloso Sumaïli yagize ati “Umwanya wa FDLR uri mu Rwanda. Niba umuryango mpuzamahanga ubona ko bakeneye gukomeza gufashwa, ntibafashirizwa muri Congo aho aba barwanyi bamaze gukorera ibyaha byinshi cyane cyane muri Kivu.”

Ashinja aba barwanyi b’Abanyarwanda kuba barakoze ibyaha byibasiye muntu mu myaka 20 ishize, aho bibasiye abaturage bo mu Burasirazuba bwa RDC kandi umuryango mpuzamahanga ntiwababonera igisubizo nyacyo.

Akomeza ati “Babashakira aho bahungira handi. Kuva mu 1994 aba barwanyi bari muri Congo. Umuryango mpuzamahanga uri hehe nyuma y’imyaka 20?”

Koloso Sumaïli ahangayikishijwe kandi no kuba abarwanyi ba FDLR bashobora kuzinjizwa mu buzima busanzwe mu banyekongo.

Kuwa Gatandatu, leta ya Congo yari yashyizeho indege Boeing 727 yo gutwara abarwanyi ba FDLR ibavana mu nkambi barimo muri Kivu y’Amajyepfo babajyana i Kisangani.

Aba barwanyi bari basabye ko hagira itsinda ryabo ryakwerekeza aho bateganyirijwe kwimurirwa kugira ngo bahagenzure. Hari kaandi itsinda rya guverinoma ryasabwe kujya mu gace ka Walungu mu rwego rwo kumvikana n’aba barwanyi nk’uko radio Okaapi ibitangaza.

Abarwanyi ba FDLR batangaje ko batazava mu nkambi barimo badahawe uruhushya n’ababakuriye, bityo kubimura bikaba byarahagarariye aho.