{Umuyobozi w’Ingabo za Loni zishinzwe kubungabunga amahoro mu Burasirazuba bwa Congo Kinshasa (MONUSCO), Martin Kobler, kuwa Kane yatangaje ko mu mwaka utaha wa 2015 umubare w’abagize izi ngabo uzagabanywa nubwo atavuze imibare y’izizagabanywa. }

Izi ngabo za MONUSCO zigera ku bihumbi 20, Kobler yatangaje ko icyo cyemezo cyatangiye kwigwaho, nk’uko Jeune Afrique yabitangaje.

Kobler yagize ati“Hari itsinda ryaturutse i New York rije kureba uko MONUSCO yagabanya umubare w’abayigize kuko mu bice bitandukanye ibintu bimeze neza.”

Nubwo avuga ko ibintu biri kugenda bimera neza aho izo ngabo zifite ubutumwa, ayo makuru aje mu gihe mu mezi ashize agace k’Uburasirazuba bwa Congo kakomeje kugaragaramo ubwicanyi butandukanye bwibasira abasivili.

Nk’urugero mu mezi ashize agace ka Beni mu Majyaruguru y’intara ya Kivu y’Amajyaruguru habereye ubwicanyi bwatwaye ubuzima bw’abagera kuri 200 mu mezi y’Ukwakira n‘Ugushyingo 2014. Ni ubwicanyi bwavuzwe ko bwakozwe n’inyeshyamba zirwanya ubutegetsi bwa Uganda, ADF, ziba mu mashyamba y’icyo gihugu.

Mu kugerageza kugarura umutekano muri ako gace, Ingabo za Congo Kinshasa zakoze igikorwa cyiswe “Sokola” mu rurimi rw’iringara, bivuze gukubura zigerageza kwirukana abo barwanyi mu duce twinshi ADF yagenzuraga mu karere ka Beni.

Kuri uyu wa Kane kandi nk’uko byavuzwe n’imiryango ya sosiyete sivile, ingabo za RDC zakozanyijeho n’izo nyeshyamba ahitwa Nadui, Mutara na Makembi hasa nk’ahabaya indiri y’inyeshyamba za ADF.