Augustin Matata Ponyo yabaye Minisitiri w'Intebe wa Repubulika Iharanira Demokarasi ya Congo kuva mu 2012 kugeza mu 2016. Umwanya yavuyeho aba Senateri mu Nteko Ishinga amategeko muri iki gihugu.

Augustin Matata Ponyo akekwaho kuba yaranyereje amafaranga yari agenewe kubaka icyanya cy'inganda zitunganya umusaruro w'ibikomoka ku buhinzi mu gace ka Bukangalonzo.

Raporo y'Umugenzuzi w'Imari ya Leta muri Ugushyingo 2020 yagaragaje ko muri miliyoni 285$ zasohowe ngo zijye gukoreshwa muri uyu mushinga izigera kuri 205$ zakoreshejwe nabi bigizwemo uruhare na Augustin Matata Ponyo.

Amakuru dukesha Ibiro Ntaramakuru by'Abafaransa agaragaza ko Ibiro by'Umushinjacyaha Mukuru muri Congo byasabye Sena y'iki gihugu gukuraho ubudahangarwa Augustin Matata Ponyo ahabwa n'Itegeko Nshinga kugira ngo akurikiranwe mu mategeko.

Ubushinjacyaha bwatangaje ko hari "Ibimenyetso ntakuka bigaragaza ko yagize uruhare mu kunyereza umutungo wa Leta."

Mu kiganiro yagiranye n'abanyamakuru ku wa 9 Gicurasi 2021, Ponyo yavuze ko ibyo aregwa ari ibinyoma ndetse yemeza ko nta bwoba afite bwo kugezwa imbere y'ubutabera.

Ati "Simfite ubwoba bw'icyo aricyo cyose, niteguye kugezwa imbere y'ubutabera nubwo akarengane kaba kari busumbe ubutabera."

Uretse kuba Minisitiri w'Intebe na Senateri, Ponyo yanabaye Minisitiri w'Imari wa Repubulika Iharanira Demokarasi ya Congo kuva mu 2010 kugeza mu 2012.

Kugira ngo Ponyo akurirweho ubudahangarwa byasaba ko abagize Inteko Ishinga Amategeko muri Repubulika Iharanira Demokarasi ya Congo batorera uyu mwanzuro.

Kuva Perezida Félix Tshisekedi yajya ku butegetsi, ikibazo cyo kunyereza umutungo wa Leta gisa n'icyahagurukiwe, dore ko n'uwahoze ari Umuyobozi w'Ibiro bye, Vital Kamerhe aherutse gukatirwa igifungo cy'imyaka 20 nyuma yo guhamywa icyaha cyo kunyereza miliyoni 50$.