{Leta ya Afurika y'Epfo, ku cyumweru, tariki ya 23 Ukuboza 2012, yakomeje kwinumira ku bijyanye n'uko ubuzima bwa Nelson Mandela Madiba bumeze mu gihe na n'ubu akiri mu bitaro, bituma hakekwa ko azizihiriza umunsi mukuru wa Noheli mu bitaro.}

Mandela w'imyaka 94 y'amavuko yajyanywe mu bitaro afite ikibazo cy'ubuhumekero, indwara y’ibihaha.

Amakuru dukesha Ibiro Ntaramakuru by'Abafaransa AFP, Mac Mahara, umuvugizi wa Leta ya Afurika y'Epfo, yagize ati “ Nta makuru mashya dufite ku buzima bwe, abaganga ntabwo bigeze batangaza itariki Madiba azavira mu bitaro” .

Bivugwa ko inzego za Perezida Jacob Zuma arizo zonyine zifite ububasha bwo gutangaza amakuru ku buzima bw'uwo bafata nk'intwari yarwanyije politiki ruvumwa yivangura ruhu rizwi nk’ “apartheid”. Kugeza ubu izo nzego ntiziratangaza neza uko ubuzima bwa Mandela buhagaze.

Ubwo Perezida Zuma yamusuraga ku wa gatandatu, yatangaje ko ubuzima bwa Mandela butameze ko agikomeza kuvurwa, ariko yizeye ko azakira.