Aya marushanwa ahuje ibihugu bitandatu bya Afurika yakozwe mu nzego zitandukanye zirimo ubwubatsi, ubutetsi, gukoresha robots mu nganda, gusudira, gukora ibijyanye n’amashanyarazi no gutunganya imisatsi.
Abitabiriye amarushanwa bari guhatanira mu Ishuri Rikuru ryigisha ubumenyingiro n’ikoranabuhanga rya Kigali (IPRC), kuri uyu wa Gatanu akaba aribwo hazatangazwa abahize abandi muri Kigali Convention Center.
Yaba abatetsi, abubatsi cyangwa se abandi bahatana mu bindi, kuri uyu wa Kane, Minisitiri Mutimura yabasuye buri umwe ahugiye ku kizaminingiro cye, aho buri wese yabaga acunganwa no kwihutisha akazi, agatanga abo bahatana kandi ibyo yakoze yabinogeje.
Ati “Ni amarushanwa aha umugisha urubyiruko rwacu kugira ngo turebe ubushobozi bwabo mu myuga itandukanye; biraduha igishushanyo cy’aho urubyiruko rwacu rugeze muri Afurika.”
Muri uko kumenya aho Abanyarwanda bageze, Mutimura yavuze ko bizatuma bamenya aho kongera imbaraga mu kunoza imyigishiriza mu bumenyingiro.
Yanavuze ko igihugu cyahuye n’ibigo bitandukanye byo hirya no hino ku Isi birimo ibyo mu Budage n’u Busuwisi [ibihugu byateye imbere cyane mu bumenyingiro], bikazajya binafasha abanyeshuri b’Abanyarwanda kubona amahugurwa mu nganda zaho.
Minisitiri w’Uburezi yashimangiye ko politiki u Rwanda rwihaye yo guteza imbere ubumenyingiro, ari inzira nziza yo gutuma abarangiza amashuri babasha kwihangira imirimo, bagafasha igihugu kugera ku iterambere cyifuza.
Abarangiza ubumenyingiro bagira amahirwe menshi yo kwihangira imirimo, ntibatege amaso kwaka akazi.
Mutimura yanemeje ko kuba u Rwanda rwaratoranyijwe kwakira bwa mbere muri Afurika aya marushanwa, bigaragaza ko hari byinshi rumaze kugeraho mu bumenyingiro.
Aya marushanwa asanzwe aba ku rwego rw’isi, agategurwa n’umuryango witwa ‘World Skills International’.
Urubyiruko rwitabiriye amarushanwa ni 33 harimo Abanyarwanwa 16.
Amafoto menshi kanda hano
Amafoto : Moise Niyonzima
Ibitekerezo 0