Yabivugiye mu Karere ka Gisagara kuri uyu wa Gatandatu ubwo yifatanyaga n’abaturage bo mu Murenge wa Mamba mu muganda ngarukakwezi, ahasibuwe umuhanda wa kilometero zisaga ebyiri ufasha abaturage kuvana umusaruro w’ubuhinzi mu mirima.

Nyuma y’umuganda Dr Munyakazi yaganiriye n’abaturage abibutsa akamaro ko kwiga bityo avuga ko nta mwana ukwiye kuvuswa ayo mahirwe.

Ati “ Ubukungu bw’iki gihugu bugomba kuba bushingiye ku buzima bwiza ariko nanone buherekejwe n’ubumenyi. Babyeyi muramenye kirazira kikaziririzwa ko hari umwana ugeze igihe cyo kwiga ukiri mu rugo, niba hari naho ari nyuma y’iyi nama umubyeyi yibwirize ajyane umwana ku ishuri.”

Yibukije ababyeyi ibyiza byo kubyara abo bashoboye kurera avuga ko bituma abana bakura neza bakagira ubuzima buzira umuze.

Yavuze ko Leta iri gushyira ingufu mu kongera ibyumba by’amashuri no gusana ibyangiritse kugira ngo hatagira umwana n’umwe uvutswa amahirwe yo kwiga.

Yasabye abayobozi ku nzego z’ibanze n’ababyeyi gukurikirana ko hari umwana n’umwe waba ataratangiye ishuri kugira ngo hamenyekane ikibazo cyabiteye gikemurwe ajye kwiga.

Bamwe mu baturage bo mu Karere ka Gisagara bavuze ko bamaze kumenya ibyiza byo kwiga bityo baharanira ko abana babo bajya mu ishuri.

Mukeshimana Josephine ati “Njyewe ntabwo nize ariko nzi neza akamaro ko kwiga; niyo mpamvu nkora uko nshoboye kose kugira ngo abana banjye bige. Mfite abana babiri biga kandi biga neza nta kibazo”.

Umuyobozi w’Akarere ka Gisagara, Rutaburingoga Jerome, yavuze ko bazakomeza gufatanya n’abaturage mu kwita ku burere n’uburezi bw’abana kugira ngo bazagire ejo hazaza heza.

Mu karere ka Gisagara habarurwa amashuri 229 abarizwamo abanyeshuri basaga ibihumbi 105.

Mu mwaka ushize wa 2018 abanyeshuri bataye ishuri muri ako karere ni bagera 2290 ariko barashakishijwe bagarurwa kwiga.

[email protected]