Ibi uyu Muyobozi yabitangaje kuri uyu wa Kabiri tariki 26 Mata 2016, mu muhango wo kwibuka abatutsi biciwe kuri paruwasi ya Mugina n’inkengero zaho, mu gihe cya Jenoside yakorewe abatutsi mu 1994.

Uyu muhango witabiriwe n’abayobozi mu nzego zitandukanye, abaturage b’uyu Murenge, abavandimwe n’inshuti z’abanyamugina; wabereye ku rwibutso rwa Mugina rwubatse mu Kagari ka Mbati.

Mu butumwa bwe, Perezida w’Inteko Ishinga Amategeko umutwe w’Abadepite, yagarutse ku mateka mabi yaranze u Rwanda kuva mu gihe cy’ubukoroni kugeza ku ndunduro ya Jenoside yakorewe abatutsi mu 1994.

Yasobanuye ko kuva kera ubutegetsi bwagiye bubiba urwango mu baturage, abatutsi barahezwa mu mashuri, mu nzego z’ubuyobozi ndetse bagirwa ibicibwa mu muryango nyarwanda babuzwa uburenganzira bwose mu gihugu cyabo.

Ashingiye kuri aya mateka mabi yaranze igihugu, Depite Mukabarisa yasabye abitabiriye uyu muhango kwanga ikibi ahubwo bakabana kivandimwe bityo ubumwe n’ubwiyunge bukaba koko inkingi y’imibanire izira amakemwa.
By’umwihariko Depite Mukabalisa yasabye urubyiruko kumva ko aribo u Rwanda ruhanze amaso mu gihe kiri imbere bityo abasaba kurangwa n’umuco wo gukunda igihugu bakaba intwari bakitandukanya n’ikibi icyo aricyo cyose.

Uyu muyobozi yagize “rubyiruko, turabasaba gusigasira ibyiza tumaze kugeraho kubera imiyoborere myiza. Muzirikane ko kugira ngo ibi bigerweho habayeho kwiyuha akuya, murasabwa rero kubyubakiraho ejo heza h’igihugu cyacu”.

Dusabumuremyi Jeanne ni umwe mu bari bahungiye kuri paruwasi ya Mugina akaba yarabashije kurokoka Jenoside yakorewe abatutsi. Uyu mubyeyi w’imyaka 42, avuga ko Jenoside yakorewe abatutsi yateguwe kuva kera kuko abatutsi bagiye babuzwa uburenganzira bwose mu gihugu cyabo, agashimangiye ko mu nzego zose wasangaga abatutsi bahezwa.

Dusabumuremyi yasobanuye inzira y’umusaraba we na bagenzi be banyuzemo mu gihe cya Jenoside, akaba ashimira ingabo zahoze ari iza FPR Inkotanyi zahagaritse Jenoside, zikabasha kumurokora.

Ku ruhande rw’ubuyobozi bw’Akarere, Meya Aimable Udahemuka yavuze ko muri iki gihe cyo kwibuka ku nshuro ya 22, hamwe na hamwe mu Mirenge hari abagaragaweho ingengabitekerezo ya Jenoside.

Kuri ibi, Umuyobozi w’Akarere yongeyeho ko bibabaje kubona hari abagifite ibyo bitekerezo bibi by’amacakubiri n’urwango muri bagenzi babo, akaba asaba abaturage gukomeza ubumwe bwabo bakamaganira kure ingengabitekerezo ya Jenoside.

Muri uyu muhango wo kwibuka, mu rwibutso rwa Mugina hashyinguwe kandi mu cyubahiro imibiri ine y’abatutsi bishwe muri Jenoside, habaho no gushyira indabo ku mva zishyinguyemo inzirakarengane zazize Jenoside yakorewe abatutsi mu 1994. Uru rwibutso rw’abazize Jenoside rwa Mugina rusanzwe rushyinguyemo imibiri y’abatutsi isaga ibihumbi 39 bishwe muri Jenoside.

Faustin Ntakirutimana, Ushinzwe Itangazamakuru mu Karere ka Kamonyi