Muri iyi nama Guverineri w’Intara y’Iburasirazuba Odette Uwamaliya yatangaje ko guhera mu kwezi kwa Mata intara ayoboye ifite umwihariko wo kwakira impunzi z’Abarundi nyinshi zihunga ikibazo cy’umutekano muke mu gihugu cy’u Burundi, uterwa no kuba abatavuga rumwe n’ishyaka riri ku butegetsi rya CNDD-FDD batifuza ko Perezida Petero Nkurunziza yakongera kwiyamamariza manda ya gatatu.
Ariko ngo n’ubwo ntacyo ubuyobozi bw’u Rwanda bwakora kugira ngo buhoshe izo mvururu nk’abantu baza bahunga ngo hagomba gushyirwaho ingamba cyane cyane habungabungwa urujya n’uruza rw’abantu.
Uwamaliya yagize ati ”Nubwo tudafite uruhare mu gukumira igitera uwo mutekano mucye ariko tugomba kwita kubaza bahunga icyo kibazo tukita ku mutekano wabo.”
Aba barundi baza mu Rwanda bahunze basabwe ko mu gihe batifuza kujya mu nkambi bajya begera ubuyobozi bw’inzego z’ibanze bakababarura kugirango na bo babe bahabwa ubufasha mu gihe bibaye ngombwa ndetse no kugira ngo umutekano wabo ukomeze kubungabungwa.
Kugeza ubu mu nkambi ya mahama iherereye mu Karere ka Kirehe hari impunzi z’Abarundi zisaga ibihumbi 29, n’aho mu Bugesera hakaba hari ibihumbi 13.
Ibitekerezo 0