Ni urwibutso ruri kubakwa mu Murenge wa Mutete mu Kagari ka Musenyi. Rwatangiye muri Kamena 2023 hagamijwe kwagura ahazashyirwa imibiri n’ahazajya hasobanurirwa amateka y’ubwicanyi bukabije bwabereye muri uyu murenge, kuko urwubitso rwari ruhasanzwe rwari rutoya hakaba hari hakenewe ahantu hagutse.

Rugizwe n’ibice birimo ahazaba hagenewe kubikwa amateka ya Mutete, ahazashyirwa imyenda abishwe muri Jenoside yakorewe Abatutsi bari bambaye, amafoto n’ibikoresho byifashishwaga mu bwicanyi muri uyu murenge.

Ruzatwara asaga miliyari 1,6 y’amafaranga y’u Rwanda nk’ uko byatangajwe ku wa 11 Mata 2023, ubwo hibukwaga ku nshuro ya 29 Jenoside yakorewe Abatutsi.

Guverineri w’Intara y’Amajyaruguru, Mugabowagahunde Maurice aherutse gusura ibikorwa byo kubaka uru rwubitso, asaba ko byakorwa neza bikazageza muri Mata umwaka utaha byarageze ku musozo.

Yagize ati “Bigaragara ko ibikorwa mubirimo neza, mwubake ku buryo imihindagurikire y’ikirere itazatuma hasenyuka, bizafasha abakomoka hano kumenya amateka yaho. Urebye nk’urubyiruko rw’aha rukeneye kumenya amateka y’ibyahabereye kurusha uko bajya gusura izindi nzibutso z’ahandi nubwo naho bagomba kuhagera."

"Ahazabikwa imyenda hagakorwa neza, ahari amafoto n’ibindi byose bigaragaza amateka ya Mutete mubitegure neza ariko ukwezi kwa Mata kuzagere imirimo yageze ku musozo”.