Kuri uyu wa Kabiri nibwo Perezida wa Repubulika akaba n’Umugaba w’Ikirenga w’Ingabo z’u Rwanda, yagize Gen Maj Muganga Umugaba Mukuru w’agateganyo w’Inkeragutabara.

Ihererekanyabubasha hagati y’aba basirikare bakuru ryayobowe n’Umugaba Mukuru w’Ingabo z’u Rwanda (RDF), Gen Patrick Nyamvumba.

Nk’uko RDF yabitangaje ku rubuga rwayo, Gen Ibingira yifurije imirimo myiza Gen Maj Muganga umusimbuye, akaba yari asanzwe ari Umuyobozi w’Ishuri rya Gisirikare rya Gako.

Yagize ati “Ndashimira ubuyobozi n’umuryango wose wa Minisiteri y’Ingabo na RDF ku bw’ubufasha bampaye mu kuzuza inshingano zanjye nk’ Umugaba Mukuru w’Inkeragutabara, ndanifuriza imirimo myiza unsimbuye.”’

Gen Ibingira na Maj Gen Muganga, bombi bashimiye Umugaba w’Ikirenga w’Ingabo z’u Rwanda ku cyizere yabagiriye.

Muganga yasezeranyije ubufatanye no gukorera hamwe nk’ikipe mu nshingano ze n’abo bazakorana.

Yagize ati “Nzahora nshimira Umugaba w’Ikirenga akaba na Perezida, umuryango wa Minisiteri y’Ingabo na RDF, ku cyizere bangiriye bakampa amahirwe yo gukorera igihugu cyanjye mu mbaraga zanjye muri uyu mwanya.”

Yashimiye Gen Ibingira asimbuye, anavuga ko azajya amugisha inama.

Gen. Maj. Muganga afite impamyabushobozi y’icyiciro cya gatatu cya kaminuza mu gutegura no gucunga imishinga yakuye muri Kaminuza ya Maastricht mu Buholandi; anafite impamyabubemyi mu bya gisirikare yakuye mu ishuri rikuru ryo muri Leta Zunze Ubumwe za Amerika ryigisha intambara, United States of America War College (USAWC) mu 2007.

Uretse imirimo ya gisirikare, Inkeragutabara zigaragara cyane mu bikorwa byinshi by’iterambere nko kubaka ibikorwaremezo, nk’amashuri, imidugudu y’icyitegererezo n’ibindi.

Inkuru wasoma – Ibyo wamenya kuri Gen.Maj Muganga wagizwe Umugaba Mukuru w’Inkeragutabara

- Gen. Maj. Muganga yasimbuye Gen. Ibingira nk’Umugaba Mukuru w’Inkeragutabara