{Nyuma y’ubujurire ku cyemezo gikomeye yari yafatiwe tariki 02 Mata 2014 cyo kutagura cyangwa ngo igurishe umukinnyi guhera muri uyu mwaka no mu 2015 kuko yasinyishije abakinnyi bari munsi y'imyaka 18, FC Barcelona yakomorewe.}

Barcelona yafatiwe iki cyemezo n'akanama k'Ishyirahamwe ry'umupira w'amaguru ku Isi (FIFA) kuko yasinyishije umunyezamu wa Borussia Monchengladbach, Marc-Andre ter Stegen n'umunya Croatia, Alen Halilovic.

Byavugwaga ko iyi kipe yasinyishije ingimbi 10 ihanishwa kumara amezi 14 itagura cyangwa ngo igurishe umukinnyi n'amande y'ibihumbi 45 by'amafaranga yo mu Busuwisi.

Nyuma yo kujurira, akanama nkemurampaka ka FIFA (CAS) kabaye gakomoreye Barcelona mu gihe iperereza rikomeje aho bari kureba abakinnyi binjiye muri FC Barcelona bari munsi y'imyaka 18 hagati ya 2009 na 2013.

Ubusanzwe amategeko ya FIFA yemerera abakinnyi bari munsi y'imyaka ya 18 kuba bahinduranya amakipe mu bihugu n'imigabane itandukanye.

Abari munsi ya 18 bemererwa guhindura igihugu iyo ababyeyi bimutse ku mpamvu zitari iza ruhago. Mu gihe abaye ari uwo mu gihugu kinyamuryango w'ubumwe bw'i Burayi afite nibura imyaka 16 kandi atuye muri Km 100 uvuye aho ikipe iba ashobora kwemererwa kujya mu kipe.

Muri Mutarama 2014, Sandro Rosell wari umuyobozi wa Barcelona yareguye nyuma yo gushinjwa uburiganya mu kugura Neymar avuye muri Santos muri Brazil kuri miliyoni 57 z'amapound.

Muri Gashyantare,iyi kipe yishyuye miliyoni 11 z'ama Euro muri Espagne nyuma yo kuvumbura amanyanga mu kugura Neymar avuye muri Santos muri Brazil.

Kapiteni wayo, Carles Puyol n'umunyezamu Victor Valdes baherutsa gutangaza ko uyu mwaka ari uwa nyuma muri kipe iri ku mwanya wa kabiri muri shampiyona irushwa na Atletico Madrid ya mbere amanota ane.