{Abasigajwe inyuma n’amateka bo mu karere ka Bugeser, Umurenge wa Musenyi, bashyikirijwe inzu bubakiwe na “Peace Plan Rwanda ” Umuryango uhuriwemo n’amatorero n’amadini ya Gikristo, mu rwego rwo kwitegura igiterane ngarukamwaka cya “Rwanda Shima Imana”.}

Akarere kavuga ko abubakiwe babaga muri za nyakatsi, bashyikirijwe inzu mu muganda wo kuri uyu wa Gatandatu. Zose hamwe ni inzu 18 zifite agaciro ka miliyoni 25 z'amafaranga y'u Rwanda.

Rwagaju Louis, Umuyobozi w’Akarere ka Bugesera, yavuze ko igikorwa cyo kubaka izi nzu cyatangijwe n’abaturage bo mu murenge wa Musenyi mu mwaka wa 2012, baterwa ingabo mu bitungu na Peace Plan Rwanda mu mwaka wa 2013.

Yagize ati “Abenshi mu basigajwe inyuma n’amateka bubakiwe aya mazu bari batuye mu buzu bw’ubugondano bwa nyakatsi, abandi babaga mu nkengero z’urufunzo, ahari ibumba ryinshi akaba ariho bakorera akazi ka buri munsi akaba ari naho barara. Turashimira amadini n’amatorero yishyize hamwe akadufasha kurangiza izi nzu, n’ubundi roho nzima itura mu mubiri muzima.”

Vincent Munyeshyaka, Umunyamabanga uhoraho muri Ministeri y’Ubutegetsi bw’Igihugu wari umushyitsi mukuru muri uyu muganda, yavuze ko icyi ari igikorwa cyashobotse kubera ubufatanye bwa Leta, abafatanyabikorwa n’abagenerwabikorwa.
Yagize ati“Turashimira Peace Plan Rwanda mu bikorwa bitandukanye by’iterambere bakora. Turasaba abubakiwe izi nzu, kuzifata neza bakazigirira isuku.”

Yaboneyeho no kwibutsa abaturage bo muri aka karere kwitabira gahunda za Leta zitandukanye, zirimo ubwisungane.

Yagize ati”Nagiye nkurikirana ikibazo cy’ubwisungane mu kwivuza muri aka karere, byagaragaye ko umwaka ushize nubwo mwagerageje, ariko ntabwo byagenze neza 100%.Turagirango tubasabe kwitabira gutanga ubwisungane mu kwivuza kandi ku gihe. Mwari muzi ko hari ibyiciro bitandatu by’Ubudehe, ariko twasanze bigomba kuvugururwa, hakazasigara ibyiciro bine gusa. Turabasaba kuzatanga umusanzu wanyu, Abanyarwanda mugire umuco wo kuvugisha ukuri, mugire umuco wo gukundana, tujye muri gahunda yo kwigira, tujye muri gahunda y’iterambere, turwanire gutera intabwe tujya imbere.”

Umuyobozi wa “Peace Plan Rwanda”, Munyemana Eric, yavuze ko abagize uyu muryango batekereje gukusanya inkunga yo gusana aya mazu kugira ngo abasigajwe inyuma n’amateka babeho ubuzima bwiza batuye mu nzu zifite isuku.

Yagize ati "Turabasaba gufata neza aya mazu, ariko munatekereza kubaka amazu arushaho kuba meza mu Bwami bwo mu Ijuru . Mutekereze gukora ibikorwa byabateza imbere mudategereje ko haza abaterankunga, hari imbaraga zanyu mufite n’ubwenge Imana yabahaye, nimushyira hamwe mukubaha Imana muzagera kuri byinshi.”