{Mu ntangiriro z’iki cyumweru, Polisi y’Igihugu yataye muri yombi abagabo batanu bakurikiranyweho ubujura buciye icyuho.}

Urubuga rwa polisi dukesha iyi nkuru rutangaza ko aba bagabo bafatiwe mu Murenge wa Nyarugunga Akarere ka Kicukiro, aho polisi yabafatanye bimwe mu byo bari baribye.

Polisi itangaza ko bafashe aba bantu bari mu modoka ifite pulake zo mu gihugu cya Repubulika Iharanira Demokarasi ya Congo bapakiyemo ibyo bari bibye birimo amateleviziyo, mudasobwa, radiyo n’ibindi babijyanye muri Congo-Kinshasa.

Itabwa muri yombi ry’aba bagabo bakurikiranyweho kwiba mu Karere ka Kicukiro na Gasabo ryagezweho ku bufatanye bw’abayobozi b’inzego z’ibanze n’abaturage b’imbangukiragutabara bo muri utu turere bari baketse amababa iri tsinda.

Abayobozi bashinzwe umutekano ku rwego rwa Rwimbogo bavuga ko bakimara gukeka aba bagabo bahise bahamagara polisi bakayimenyesha uko ikibazo giteye, aho bavuga ko aba bagabo batajya bagira ikintu bakora ku manywa bagatangira akazi mu ijoro.

Agira ati:”Amanywa yose baba bibereye mu ngo zabo”.

Polisi ikimara kumenya aya makuru yahise itangira iperereza ku buryo uwitwa Niyibizi Innocent yahise atabwa muri yombi afatiwe ku Kagugu amaze kwiba; yahise atangira guhatwa ibibazo ahita avuga aho bagenzi be baherereye, nabo polisi ihita ibata muri yombi.

Umuvugizi wa Polisi y’Igihugu Supt Theos Badege agaruka ku ruhare rw’abaturage mu guta muri yombi abantu bishora mu bikorwa nk’ibi, akanabashishikariza gukomeza gutanga amakuru ku gihe kugira ngo ibyaha nk’ibi bibashe byakumirwa.

Agira ati:”Abaturage bagize uruhare rukomeye mu itabwa muri yombi ry’aba bantu.”

Igihano kiremereye gihanishwa umuntu wakoze ubujura buciye icyuho ni igifungo cy’imyaka icumi, nk’uko bigaragara mu ngingo ya 400 y’igitabo cy’amategeko ahana y’u Rwanda.