Ibi byagarutsweho ubwo abayobozi b’Umuryango wita ku rubyiruko, JCI bari mu Rwanda mu nama y’iminsi itatu. Bagiranye ibiganiro n’ubuyobozi bwa (RDB) basobanurirwa byimbitse ibirebana n’amahirwe y’ubukerarugendo ndetse n’ishoramari aboneka mu gihugu.

Aba bayobozi basobanuriwe ko hari inzego zitandukanye zirimo izirebana n’ubukerarugendo n’ikoranabuhanga, ubwikorezi n’izindi zitandukanye zashorwamo imari mu Rwanda.

Umuyobozi Wungurije wa RCB, Janet Karemera, yagaragaje ko hari amahirwe ahabwa urubyiruko mu kwihangira imirimo no kuruherekeza mu gushyigikira ibikorwa byarwo bigamije iterambere rusange by’umwihariko mu ikoranabuhanga.

Ati “Mu by’ukuri hakozwe byinshi mu guteza imbere urubyiruko harimo no kubaha ubufasha butandukanye burimo n’inkunga y’ishoramari ndetse no kubagura ibitekerezo binyuze mu bigo bitandukanye byashyizweho bigamije gufasha urubyiruko.”

Muri Kamena 2021 ubwo JCI Rwanda yasabaga ko yakemererwa kwakira iyi nama yari yagaragaraje ko harimo amahirwe akomeye y’ishoramari ashobora kuboneka ku bayobozi baturutse mu bihugu bitandukanye bazaba bayitabiriye.

Icyo gihe RCB yagaragaje ko mu gihe u Rwanda rwakemererwa kuyakira yazafanya nabo mu kunoza imigendekere yayo ndetse no ku birebana n’ingendo, yemeza ko abaturuka mu bihugu RwandAir ikoreramo bazagabanyirizwa 15% ku giciro gisanzwe cy’urugendo.

Ku wa 25 Gashyantare 2022, abayobozi ba JCI bagiranye ibiganiro n’ubuyobozi bwa RCB bigamije gushimangira ishoramari. Bagaragaje ko hari intambwe nziza u Rwanda rumaze gutera ndetse ko ari igihugu kibereye ishoramari.

Umuyobozi wa JCI ku Isi, Argenis Angulo, yashimye urwego igihugu kimaze kugeraho mu iterambere ndetse yemeza ko ari igihugu kiri kwihuta mu kuzamura urwego rw’ishoramari binyuze mu kwishakamo ibisubizo.

Yasabye ko nk’umuryango wita ku rubyiruko JCI ishami ry’u Rwanda bakomeza kugirana imikoranire ya hafi na RCB mu rwego rwo guharanira ishoramari rusange.

Kugeza ubu u Rwanda ruri mu bihugu byorohereza ishoramari rishya by’umwihariko ubukerarugendo, ikoranabuhanga, inganda n’ubucuruzi mu rwego rwo guteza imbere ibikorerwa mu Rwanda.

Inama y’Abayobozi ba JCI mu bihugu bitandukanye bya Afurika no mu Burasirazuba bwo hagati yitabiriwe n’abarenga 100 baturutse mu bihugu 33.