Kuri uyu wa Kane, tariki ya 12 Ugushyingo 2026, Nvidia yatangaje ko Huang w’imyaka 63 yeguye ku mwanya w’Umuyobozi Mukuru, uwa Perezida w’iki kigo ndetse no mu Nama y’Ubutegetsi yacyo, nyuma y’imyaka 33 yari amaze akiyobora.

Iri tangazo rije nyuma y’iminsi mike Huang yemeye ko yaciye inyuma umugore we, asaba imbabazi umuryango we, abakozi ba Nvidia n’abashoramari.

Nk’uko ikinyamakuru The Times cyabitangaje, Huang yari amaze iminsi ari mu bibazo byaturutse ku makuru y’uko yagiranye umubano wihariye na Alice Huang, umugore inzego z’ubutasi za Leta Zunze Ubumwe za Amerika zikeka ko yakoreraga u Bushinwa.

Alice Huang yari umwe mu bayobozi ba Megaspeed International, ikigo cyo muri Singapore gikoresha ikoranabuhanga rya Nvidia.

Inzego z’ubutasi za Amerika zikeka ko uyu mugore ashobora kuba yarakoreshwaga mu gushaka amakuru yerekeye ikoranabuhanga rigezweho rya Amerika, cyane cyane utwuma tw’ikoranabuhanga tuzwi nka chips, twifashishwa mu guteza imbere ubwenge buhangano (AI).

Icyakora, kugeza ubu nta cyemezo cya nyuma cy’iperereza kiremeza ko Alice Huang yakoreraga ubutasi bw’u Bushinwa cyangwa ko Jensen Huang yamuhaye amakuru y’ibanga.

Ku wa 8 Ugushyingo, Huang yasohoye ubutumwa yemera ko yahemukiye umugore we, asaba imbabazi umuryango we ndetse n’abo bakoranaga.

Nyuma yaho, Inama y’Ubutegetsi ya Nvidia yatangaje ko yatangije iperereza ryigenga rigamije kumenya niba hari amakuru y’ibanga y’iki kigo cyangwa ajyanye n’umutekano wa Amerika yaba yarageze mu maboko y’inzego z’ubutasi z’amahanga.

Ibibazo bya Huang byarushijeho gukomera ku wa Gatatu, tariki ya 11 Ugushyingo, ubwo The New York Times yatangazaga ko yagiranye undi mubano wihariye na Kimberly Powell w’imyaka 48, usanzwe ari Visi Perezida wa Nvidia ushinzwe ibikorwa by’ikigo mu rwego rw’ubuzima.

Iki kinyamakuru cyatangaje ko Huang na Powell bagaragaye muri video bari kumwe mu buryo bugaragaza ubucuti bwihariye, mu nama yabereye i San Jose muri Leta ya California muri Werurwe 2026.

Aya makuru yatumye Inama y’Ubutegetsi ya Nvidia iterana kugira ngo isuzume ahazaza ha Huang muri icyo kigo, ari na byo byakurikiwe no kuva ku buyobozi bwe.

Nvidia yatangaje ko Colette Kress, wari usanzwe ari Umuyobozi Mukuru ushinzwe imari, ari we wagizwe Umuyobozi Mukuru w’agateganyo, mu gihe hakomeje gushakishwa uzasimbura Huang burundu.

Harvey C. Jones na we yagizwe Perezida w’Inama y’Ubutegetsi ya Nvidia.

Ibi bibazo byagize ingaruka zikomeye ku gaciro ka Nvidia ku isoko ry’imigabane, aho The Times yatangaje ko mu cyumweru kimwe iki kigo cyatakaje agaciro karenga miliyari 600 z’amadolari ya Amerika, bitewe n’impungenge z’abashoramari ku hazaza hacyo.

Nvidia ni kimwe mu bigo bikomeye ku isi mu gukora utwuma twifashishwa mu ikoranabuhanga ry’ubwenge buhangano. Abasesenguzi bagaragaza ko yihariye hafi 90% by’utwuma twifashishwa mu gutoza porogaramu za AI, ndetse na 70% by’utwifashishwa mu kuzikoresha.

Huang yari amaze imyaka 33 ayobora Nvidia, kuva yashingwa mu 1993. Yayihinduye kimwe mu bigo by’ikoranabuhanga bifite agaciro kanini ku isi.

Kwegura kwe gufatwa nk’impinduka ikomeye muri uru rwego, cyane ko Nvidia ifite uruhare runini mu iterambere ry’ubwenge buhangano no mu ihiganwa mu by’ikoranabuhanga hagati ya Amerika n’u Bushinwa.