00:00:00 IGIHE NETWORK KN KINYARWANDA EN ENGLISH FR FRANCAIS

Uwantemye muri Jenoside twaje guhura: Urugendo rwo kwiyubaka rwa Kayitesi (Video)

Yanditswe na Rabbi Malo Umucunguzi
Kuya 25 May 2022 saa 07:27
Yasuwe :

"Ndi ikimenyetso cy’ibyo bakoze". Ubu ni ubuhamya bwa Kayitesi Judence, uvuga ko nyuma ya Jenoside yakorewe Abatutsi mu 1994, abayigizemo uruhare nta mwanya na muto bakwiye kubona wo kuyipfobya cyangwa kuyihakana.

Mu gutanga umusanzu we, yanditse igitabo yise ‘A Broken Life: In Search of Lost Parents and Lost Happiness”. Agaruka ku buzima yanyuzemo mbere, mu gihe na nyuma ya Jenoside.

Ni igitabo cyabanje gusohoka mu Kidage mu Ugushyingo 2019, kiza gusohoka no mu Cyongereza muri Gicurasi 2021.

Jenoside yakorewe Abatutsi yamugizeho ingaruka zikomeye. Zirimo igihe kinini yamaze atavuga kandi atari ko yavutse, ndetse yaje no kugira ikibazo yibagirwa byinshi mu byamubayeho, kubera ingaruka z’uko bamutemye mu mutwe.

Kubera ubuyobozi bwiza, ubuzima bwongeye kugaruka nk’ikimenyetso gikomeye cy’uko kongera kwiyubaka bishoboka. Ubu ahari uruguma runini, ni inkovu nayo yarengewe n’imisatsi myiza, miremire.

Mu kiganiro yagiranye na IGIHE, Kayitesi yagarutse ku bwiyunge bukenewe n’uruhare rwa buri wese mu kurwanya abahakana n’abapfobya Jenoside yakorewe Abatutsi.

Mbere ya Jenoside yari atuye i Rutongo, ubu ni mu murenge wa Jali mu karere ka Gasabo, mu Mujyi wa Kigali.

Ubu aba mu Budage aho ari umwalimukazi, ndetse ni umwe mu batanga ibiganiro kuri Jenoside yakorewe Abatutsi.

IGIHE: Igitabo wise ‘A Broken Life: In Search of Lost Parents and Lost Happiness”, gikubiyemo iki?

Kayitesi : Gikubiyemo ibice bitatu, igice gitoya kigaruka mbere y’uko jenoside yakorewe Abatutsi iba, cyane ko wenda nari ndi muto, ibyo nibuka mu muryango wanjye, ku byabagaho mbere ya Jenoside. Icyo kikaba ari igice cya mbere.

Hakazamo igica cye kabiri mu gihe Jenoside yakorwaga, noneho hakazaho igice cya gatatu, nyuma ya jenoside, uburyo muri make ubuzima bwakomeje.

Ni ubuzima bwanjye navuga ngo nabayemo mbere, mu gihe na nyuma ya jenoside muri rusange, ndibaza no ku barokotse bose, nubwo buri wese afite amateka ye, ariko ni ibintu bijya gusa.

[Jenoside iba] nari mfite imyaka 11.

Judence Kayitesi yanditse igitabo kigaruka ku buzima bwe mbere ya Jenoside, ubwo yakorwaga ndetse na nyuma yayo

Ku gifuniko cy’igitaho wanditse hariho ifoto igaragaza inkovu nini mu mutwe. Wibuka amateka yayo?

Jenoside iba ntabwo nari ndi iwacu nta nubwo nari ndi kumwe n’ababyeyi banjye, nari ndi i Nyamirambo, twahungiye mu musigiti wo kwa Kadhafi.

Hanyuma baje kudukuramo abari bahungiyemo batujyana mu yindi nzu, hanyuma rero hariya niho natemewe, cyane ko n’umuntu wantemye yari umuturanyi w’aho nari ndi.

Ni ho uriya mupanga nawukuye, ari na wo wanzaniye ubumuga nyuma yaho kuko namaze igihe kinini cyane ntavuga, nari narabaye nk’umuntu ufite ubumuga bwo kutavuga, kandi bituma nza kwibagirwa ibintu byinshi, biza kugaruka nyuma.

Nk’urugero ntabwo nibukaga amazina yanjye. Maze gutemwa ntabwo nibukaga amazina yanjye, ariko mubyara wanjye twari turi kumwe avuze ngo Kayitesi Judence, mpita nibuka, nti ‘iryo zina ndarizi’.

Iyo umuntu yavugaga ikintu cyangwa akavuga ikintu nibwo nagiraga nkumva kiragarutse, ndacyibutse.

Ni aho uwo mupanga waturutse, hari ku itariki 13 Mata.

Utangira kwibuka ibyakubayeho hari hashize igihe kingana iki?

Ntabwo nakubwira go ni ryari, kubera ko byari urugendo rurerure, kuko kuva Jenoside inarangira hari ibikomere byinshi cyane.

Abafite ibikomere ku mubiri, abafite ibikomere ku mutima, ababuze ababo, abagize bate, kurwana intambara yo kwiyubaka byari ikintu gikomeye cyane, kugira ngo ube wakira.

Kuvuga ngo kwibuka byagarutse ryari, n’ubungubu hari ikintu umuntu ashobora kumbwira wenda nk’ahantu twari dutuye,nkaba nahagera nkumva icyo kintu ntacyibuka.

[Yakimbwira] nkavuga ngo ’ah uzi ko aribyo!’ gutyo. Rero kwibuka bigenda biza buri gihe, ariko icyo gihe byatangiye ari uko mbonye Masenge, kuko nagiye kuba mu kigo cy’impfubyi Jenoside irangira inkotanyi zifashe Kigali, aho nari ndi mu Kiyovu muri Croix Rouge, bantwaye ku Kimihurura mu kigo cy’imfubyi, mbayo.

Jenoside yamusigiye inkovu nini mu mutwe, ariko yaje kurengerwa n'imisatsi myinshi kandi myiza

Masenge rero aje kumfata anjyanye mu rugo nibwo natangiye kwibuka, akagira ibintu avuga nkavuga nti ‘ah ariko uziko ibi mbizi… ni uko kwibuka byanjye byagiye bigaruka.

Ni nko kuba ibintu byasibamwe ukabishaka muri mudasobwa ukabigaruramo, ariko kugeza n’iyi saha wenda iyo ngiye hariya hakagira umuntu uvuga ikintu, hari ukuntu nongera nkibuka n’ikindi kintu, gutyo.

Rero ni urugendo rurerure, ariko icyo gihe Masenge aza, tugiye kubana, nibwo nagaruye ubuzima umuntu yakagombye kuba afite cyangwa yakagombye kuba azi.

Nyuma y’ibyo bihe wanyuzemo, ni ryari wageze ukavuga reka ibyabaye mbishyire mu gitabo?

Ibintu byatubayeho ni ibintu bikomeye cyane, binarenze ubwenge bwa muntu kuko birakomeye cyane, no kugira ngo umuntu abivuge ni ibintu bigoye.

Biragoye, bifta umwanya munini, bifata urugendo, rero kugira ngo numve ko ayo mteka mbe nayandika, ubundi Jenoside ikirangira hari kwakuntu wumvaga nta kintu utekereza mu buzima, ntabwo utekereza ku hazaza, nta kintu na kimwe wibaza mu by’ukuri.

Ukabona umwaka urashize undi uraje, ukavuga uti ariko uzi ko nkihari… ariko ukumva nta bwoba ufite bw’urupfu cyangwa ko wapfa, wagira gute… mpfuye nkumva ntacyo byantwara, nkumva naba nsanze… kuko abo twabuze ni bo benshi, ukumva waba ugiye mu wundi muryango mugari ahubwo, aho baba bari umuntu atamenya.

Ariko nshatse, mbyaye, nibwo navuze ngo burya umuryango wa Kabare Callixte ntabwo wazimye, ahubwo urimo no gushibuka. Nibwo rero numvise ko nakagombye kubyandika.

Ariko nubundi nkiri muri Croix Rouge nyine barantemye, kubera ko ntavugaga, iyo wambwiraga ibintu narakwandikiraga. Nashoboraga kuba mfite urupapuro, ukambaza nkagusubiza nanditse.

Noneho muri icyo gihe kubera ko nzakomeza ndi ikiragi, ntavuga, numvaga ko kugira ngo nzabwire abantu ibyambayeho - ntabwo natekerezaga ko ababyeyi banjye wenda bapfuye - numvaga kugira ngo nzababwire ibyambayeho cyangwa abandi abo ari bo bose, ko ngomba kubyandika.

Ariko nyuma Jenoside irangiye numva nta gahunda nkifite kuko abo numvaga ngomba kubibwira ni ababyeyi banjye, kuko ntari ndi kumwe nabo, sinababona nsanga barishwe, nibwo numvise nta mpamvu yo kubyandika, ariko nyuma mbyaye haza indi mpamvu yo kumva ko ngomba kubyandika nkabiha abana banjye.

Noneho gukunda abo bana banjye, kuvuga ngo nifuza ko bazamenya amateka yanjye, byageze aho ntekereza n’abandi bana bato batari babizi, ntekereza no ku gihugu aho abo bana bagiye gukuriramo, ndavuga ngo ese kugira ngo bitazongera, ni gute byagenda?

Ni uko nanyandika abo bana batazi ibyabaye mu Rwanda bakabisoma, kugira ngo ntibizongere.

Mu Burayi haracyari abantu bahakana bakanapfobya Jenoside yakorewe Abatutsi. Iyo ubibona ni iki kikuza mu mutwe?

N’ejo bundi ndibaza hari abantu bafashe ifoto yanjye kuri Twitter bashyiraho ngo nshobora kuba nari nasinze, naritemye.

Ariko mu by’ukuri iyo mbona ibintu nk’ibyo abo bantu bandika cyangwa abapfobya Jenoside, ahubwo bimpa ingufu zo kubivuga no kubibwira abandi kubera ko ndi ikimenyetso cy’ibyo bakoze, kuko ino mipanga ku mwana wari ufite imyaka 11, ntabwo wakwitema nk’uko babivuga cyangwa ko waba wasinze.

Abo babikora banabivuga, ni ipfunwe bafite kubona umuntu ungana nkanjye, ukabona iyo myaka nari mfite, ese banzizaga iki buriya, ko n’ibyo byo kuvuga ngo abahutu n’abatutsi ko ntari nabizi, banzizaga iki? Ko ntari muri politiki ngo wenda mvuge ngo ni politiki?

Ni ipfunzwe, ndibaza aho bari nabo ubwabo mu mitima yabo batorohewe kuko ibyo bakoze ni ndengakamere.

Umuntu wagutemye wavuze ko yari umuturanyi. Waje kongera kumubona?

Yego, nabashije kumubona hanyuma, haciye igihe.

Nari ndi ku ishuri ku Cyivugiza nigayo, icyo gihe impunzi zari zarahungiye muri Congo zari zirimo guhunguka. Aza guhunguka ahantu hitwa muri Kariyeri niho bajyaga, hari muri 1995 cyangwa 1996, ntabwo nibuka neza amatariki.

Noneho nari ndi ku ishuri ndimo kwiga, ntabwo navugaga neza kuko bambwiraga nkasubiramo nk’umwana kugira ngo ndebe ko navuga neza, kuri segiteri mbona arahanyuze, mubonye nikubise hasi, abana twiganaga barampagurutsa.

Hari mubyara wanjye wari uraho kuri segiteri wari umusirikare, aza kuza, aramfata ati ‘ese uyu mwana abaye iki?’, ni nabwo navuze n’amagambo angahe nti ‘uriya ni we wantemye.’

Mbivuze nibwo bamufashe baramuzana, baramubaza bati ‘ese nibyo koko ni wowe wamutemye?’, Yavuze ko yatemye benshi, yishe benshi, niba ndi uwo ku Cyivugiza ko nanjye ndimo.

Ni uko yasubije, baramutwara ajya gufungwa, ariko bitewe n’uburyo nari meze, hari ahantu i Remera bajyaga bajyana abantu bagifite ikibazo cy’ihungabana, icyo gihe nagiyeyo marayo nk’icyumweru, baranganiriza, ariko kuva icyo gihe ntabwo nongeye kumenya amakuru ye kuko numvaga ntashaka kongera kuba nanamubona.

Nyuma y’imyaka 28, ubumwe n’ubwiyunge ubona buhagaze bute? Ese burashoboka

Buriya, nabanza ngashimira cyane FPR Inkotanyi baturokoye, kandi nkanabashimira ku byakozwe nyuma kuko binjiye mu gihugu cyari kirimo imirambo, kirimo abantu bababaye cyane, hanyuma ikintu nabashimira ni uko hatabayeho ikintu cyo kwihorera, cyo kuvuga ngo natwe twafashe igihugu, reka natwe tubice.

Akazi bakoze ni akazi gakomeye cyane kugira ngo ufate abantu barokotse ubahuze n’ababiciye, kugira ngo kugeza iyi saha tube tuvuga ngo turi Abanyarwanda.

Yego nari umwana nari ntarafata irangamuntu ariko uko nabyumvise ni uko kiriya gihe abantu bafataga indangamuntu harimo ubwoko.

Ubwo rero ikintu nashimira, ibyo bintu nyabwo byongeye gukomeza, bivaho, ubu turi kubaka u Rwanda rudafite amacakubiri, u Rwanda rwiza buri wese yakwisangamo.

Hari abantu benshi mbere ya Jenoside batigaga, warangizaga amashuri abanza ukaba utakomeza mu yisumbuye, bakagukuramo kuko uri umututsi.

Ariko kuri uyu munsi buri wese ajya kwiga haba mu mahanga, haba aho ariho hose, ukagenda ukajya kwiga nta we uvuze ngo uyu ubwoko ni ubu n’ubu.

Rero nashimira ubutegetsi dufite ubu bwashyizeho ibyo bintu byose, nta vangura rihari.

Turebe ku gusaba imbabazi. Umuntu wagutemye ntabwo wongeye kumubona, ariko se nk’iyo muhura agapfukama akagusaba imbabazi, wumva wari kuzitanga?

Icyo kibazo kirakomeye cyane, ntabwo nzi uburyo nagisobanura cyangwa nakivugaho, ntabwo navuga ngo nakwihorera cyangwa ngo mvuge ngo rekana na we, reka yicwe cyangwa mwice.

Ariko kumbwira ngo… buriya… kiragoye, kiragoye icyo kibazo kuko hari ikintu kimwe umuntu avuga ngo… buriya hari uburyo usaba imbabazi, uguye ku muntu kuko utabiteganyije, uramugwiriye cyangwa kwa kundi unyura ku muntu uti ‘impore’.

Ariko hari ibintu, kuri jenoside ni ibintu bari barateguye, babishyira mu bikorwa.

Rero kuvuga ngo mu by’ukuri ku muntu ku giti cye aze kandi yarantemye, nkamubwira ngo ndamubabariye… yego nta kintu navuga ngo ndamutwara cyangwa ndi bumukoreho, cyangwa ndi bugire gute, kuko ni umuntu, njyewe ntabwo nakwica umuntu cyangwa ngo ngire ikindi kintu kibi namukorera.

Ariko kuvuga ngo ndabohotse wenda ngo yarantemye noneho tube inshuti… namubwira nti genda ubeho, ubeho neza uko ubishoboye, wowe muri wowe ibabarire, kuko biragoye.

Nyuma y’ibihe bikomeye wabayemo, u Rwanda wumva abana bawe bakwiye kuragwa ni u Rwanda rumeze rute?

U Rwanda nifuza abana banjye nabaraga ni u Rwanda rwiza, rudafite amacakubiri, aba bana bakura nifuza ko hatazamo ngo uyu ni umututsi uyu ni umuhutu, u Rwanda rw’abanyarwanda, rw’abantu bakundanye, bubaka igihugu bakabaho neza.

Ni ubuhe butumwa waha abantu bakomeje guhakana no gupfobya Jenoside yakorewe Abatutsi?

Be gukomeza kudutoneka, baratubabaje bihagije pe! Batwiciye abavandimwe, batwicira inshuti, batwicira ababyeyi, ariko kuri iyi saha iyo ureye umuntu wabaye muri iyi jenoside, akazana ibintu byo gupfobya yerekana ko iyo jenoside itigeze inabaho, namubwira ngo tubabarire!

Gabanya, rekera aho kuko ntacyo urimo kubiba mu banyarwanda, nta kintu urimo kwigisha Abanyarwanda.

Bifuza se ko twasubira muri biriya bihe koko? Ariko ntabwo byakunda pe! Nibaza ko ari n’abantu bake cyane, kuko hari ho n’abikora bakajya ku mbuga nkoranyambaga, ariko ari undi yaza agahagarara imbere yawe akigaragaza kuko kenshi banakoresha uburyo bwo kutivuga, kutavuga abo aribo, n’abigaragaza aba ari umwe agafungura konti nyinshi cyane.

Ibyo rero nta n’agaciro umuntu yabiha, icya ngobwa ni uko twebwe tugomba kubakira ku mateka, akatuzanira ibyiza aho kugira ngo tuyasubiremo.

Iyo urebye inkovu Jenoside yagusigiye, hari imbaraga uvana mu kongera kuyireba, kubona ko ukiriho n’intambwe ukomeje gutera?

Iyo ndebye aho navuye, Imana yaramfashije ngira imisatsi myinshi cyane ku buryo nko kuyireba cyangwa kuyishaka, ni ugufata imisatsi ngashyira ku ruhande, ngira imisatsi myinshi ku mutwe pe! Kandi ni inkovu nini cyane, ariko ngira imisatsi ikagenda iyijya hejuru ku buryo utanayibona, keretse nogoshe.

Ingaruka nyibukaho ni nk’izo zo kutavuga, nibuka nk’iyo hari ibintu ntashobora kuba navuga mu zindi ndimi nk’Icyongereza cyangwa Ikidage, nkagerageza kugenda mbyiga nk’uko no mu Kinyarwanda nagiye ngerageza nkagenda nandika amagambo ntashoborta kuvuga neza nkagenda ngerageza kubyiga.

Rero imbaraga zimbamo nkaba nakubakoraho, ni uko nkiri ho kandi nkaba ngeze ahantu heza, hatuma mvuga ngo nanjye mfite abankomotseho, bazakomokaho abandi, ntabwo napfuye kiriya gihe kandi naravuye ahantu hafi cyane, ahantu kure cyane.

Kayitesi akomeje kubaka ubuzima bushya hamwe n'umuryango we

Hari ubundi burumwa wumva bukuri ku mutima?

Nabwira abarokotse Jenoside yakorewe Abatutsi bakiriho, buri wese afite amateka ye. Nubwo twayabayemo, n’iyo waba uri kumwe n’uwo mwabaga muri kumwe, ariko ibyiyumviro byabaga bitandukanye ashobora kuvuga bitandukanye n’ibyo navuga, bitewe n’ibyiyumviro bya buri muntu wese.

Hanyuma nababwira ngo mukomere muri ibi bihe turimo byo Kwibuka abacu bishwe bazira uko bavutse, batahisemo, ko bagerageza gusigasira ayo mateka mu buryo bwo kuyavuga, kuyandika, kuko biraruhura, birafasha kubivuga.

Ntabwo ari ngombwa ngo ube wabivuga muri rusange, mu bantu benshi, ushobora no kubivuga ubwira umuntu umwe, abantu babiri, ukabaganiriza ku byakubayeho, kuko kubigumana birica, biravuna.

Nabasaba ko bakomeza kubivuga, ababishoboye bakabyandika, bakabifata mu buryo bw’amajwi, kugira ngo n’aba bapfobya bavuga ko Jenoside itabayeho, nituba benshi tubivuga ntaho bazahera.

Uko biribwa bavuga ku mbuga nkoranyambaga, bandika n’iki, natwe tubivuge kuko ntabwo baturuta, turi benshi barokotse. Ni uko akenshi buri wese agifite agahinda, akumva kubivuga bimugoye.

Natangiye natangiye kubivuga mu 2017 cyangwa se 2018, kandi icyo gihe cyose nari mpari, kandi icyo gihe ntabwo najyaga nshaka kubivugaho, n’iyo umuntu yashakaga kumbaza narahungaga.

Yego buri wese akwiye kugira igihe cye, kumuha igihe kuko biragoye, ariko reka tubeho, tubeho neza kuko iyo babona tubayeho nabo, bariya bashakaga ko dupfa birabashimisha.

Uteganya kwandika ibindi bitabo?

Yego, hari ikindi gitabo ndimo kwandika, ntabwo navuga ngo nzagisohora ryari kuko kwandika ntabwo byoroshye, hari igihe uhagaruka, ukagira gute...

Ariko ndimo kwandika ikindi gitabo, nzandika ahubwo byinshi cyane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .