00:00:00 IGIHE NETWORK KN KINYARWANDA EN ENGLISH FR FRANCAIS

Uko imibyinire ya Kinyarwanda ikora ku mutima abayobozi bagenderera u Rwanda

Yanditswe na Mutangana Steven
Kuya 11 December 2019 saa 11:17
Yasuwe :

Ku maso urabibona, iyo Intore z’Itorero ndangamuco ry’Igihugu Urukerereza ziserutse, abashyitsi b’imena bakiriwe n’Abayobozi bakuru b ’u Rwanda muri iki gihe, ubona banezerewe.

Bakoma amashyi, bamwenyura, baganira, mbese bafite akanyamuneza. Ku mbuga nkoranyambaga cyane cyane Twitter z’abo bashyitsi b’imena, uhasanga amafoto y’igikorwa bitabiriye mu Rwanda, ariko ntihaburamo n’ay’Intore z’Urukerereza.

Ingero ni nyinshi, ariko tubahe zimwe muri zo; mu bayobozi bo ku rwego rwo hejuru bagendereye u Rwanda, bakanagaragaza ko imibyinire ya kinyarwanda yabanyuze, harimo Perezida w’Igihugu cya Misiri akaba anayobora Umuryango w’Ubumwe bwa Afurika (AU) muri iki gihe, Abdel Fattah al-Sissi; uwari Umuyobozi Mukuru w’ Ikigega Mpuzamahanga cy’Imari (IMF) ubu akaba ayobora Banki Nkuru y’Uburayi (European Central Bank) Christine Lagarde; n’Umuyobozi w’Ishyirahamwe ry’Imikino ya Commonwealth ku Isi, Dame Louise Livingstone Martin.

Imibyinire ya kinyarwanda yaba yifuzwa mu gihe cy’imikino ya Commonwealth 2022!

Ubwo yari amaze kwitegereza uko Urukerereza rwasusurukije abitabiriye Inama Rusange y’Ishyirahamwe ry’imikino ya Commonwealth yabereye i Kigali muri Nzeri 2019, Uhagarariye Igihugu cy’u Bwongereza mu Rwanda Jo Lomas, yibajije niba imibyinire ya kinyarwanda yaba ubundi buryo bwo gukora siporo mu mikino ya Commonwealth izabera Birmingham mu Bwongereza muri 2022.

Yari abishingiye kuri Twitter y’Ishyirahamwe ry’imikino ya Commonwealth yagaragazaga abayobozi bayo babyinanaga n’Urukerereza ubwo bakirwaga mu Rwanda. Koko rero, mu gihe cy’iyo nama mpuzamahanga, wasangaga amafoto meza y’Urukerereza acicikana kuri twitter, aho Umuyobozi w’Ishyirahamwe ry’Imikino ya Commonwealth ku Isi, Dame Louise Livingstone Martin wari wahisemo guseruka mu mushanana mwiza cyane, yagaragaraga abyina kinyarwanda hamwe n’abandi bayobozi baturutse mu bice bitandukanye by’isi.

Uko Christine Lagarde avuga ku muhamirizo w’Intore n’Ikinimba

Ubwo yagendereraga u Rwanda, Christine Lagarde wayoboraga Ikigega Mpuzamahanga cy’Imari (IMF), ubu akaba ayobora Banki Nkuru y’u Burayi (European Central Bank); yagereranyije umuhamirizo w’Intore ndetse n’Ikinimba n’intambwe iganje y’iterambere ry’u Rwanda.

Mu ijambo yagejeje ku Nteko Ishinga Amategeko y’u Rwanda kuwa 27 Mutarama 2015, yashimye iterambere igihugu kigezeho nyuma ya jenoside yakorewe Abatutsi. Agereranya ibyiza u Rwanda rugenda rugeraho n’ubukungu bw’umuco warwo ushingiye ku mbyino.

Yavuze ko ku ikubirito, Intore, imibyinire igaragaza intsinzi, ayigereranya n’ibigwi u Rwanda rumaze kugira mu karere ruherereyemo no ku isi cyane cyane mu bukungu bugenda buzamuka guhera mu mwaka wa 2000.

Imbyino z’umuganura azigereranya n’isomo u Rwanda rwaha ibindi bihugu byo muri Afurika n’Isi yose ashingiye ku buryo abona Abayobozi b’u Rwanda na politiki bagenderaho besa imihigo igeza Igihugu ku musaruro mwiza. Naho Ikinimba akakigereranya n’icyerekezo u Rwanda rufite ku bukungu buhamye.

Ubwo yari mu ruzinduko rw’akazi mu Rwanda kuwa 15-16 Kanama 2017, Perezida w’Igihugu cya Misiri, Abdel Fattah al-Sissi, ubu akaba anayoboye Umuryango w’Ubumwe bwa Afurika, yanyuzwe n’imibyinire y’Urukerereza, ubwo rwamutaramiraga muri Kigali Convention Centre, igihe yakirwaga na Perezida w’u Rwanda Paul Kagame.

Guseruka neza kw’intore byanejeje Perezida wa Misiri maze Urukerereza rumaze gutarama asaba ko ahabwa umwanya akabashimira abakora mu biganza nk’uko bigaragara mu mafoto yaranze uwo munsi. Ntihashize igihe, abatumira mu Misiri, aho ababyinnyi bagiye gususurutsa urubyiruko rwaturutse mu bihugu bitandukanye, rwakoraniye mu mujyi w’ubukerarugendo wa Sharm el-Sheikh, uherereye mu majyepfo ya Sinaï.

Iteka iyo Urukerereza ruserutse mu birori by’Igihugu, mu kwakira abashyitsi bo ku rwego rwo hejuru bagenderera u Rwanda, no mu bihugu bitandukanye ku Isi, abakurikira imibyinire ya kinyarwanda bavuga ko ifite umwihariko, ko bashimishwa cyane n’imbyino z’abakobwa batuje b’u Rwanda, byagera ku muhamirizo w’intore bikaba akarusho.

Abashyitsi benshi bishimira uko intore z'u Rwanda zibyina
Bishimira cyane uko baba bavuna sambwe
Perezida Sisi yishimiye Urukerereza abakora mu ntoki

Mutangana Steven

Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .