Iri rushanwa riri kubera mu Mujyi wa Nairobi muri Kenya, guhera kuri uyu wa Kabiri, tariki ya 25 Ukwakira 2022.

Mu batarengeje imyaka 18, baheruka no gukatisha itike yo gukina Igikombe cy'Isi, u Rwanda rwatsinzwe n'u Burundi ibitego 45 kuri 44 mu mukino wari ishiraniro.

U Rwanda rwihesheje ikuzo mu cyiciro cy'Abatarengeje imyaka 20 aho rwatsinze Djibouti ibitego 52-20.

Amakipe y'u Rwanda yahagurutse i Kigali ku wa Mbere tariki 24 Ukwakira 2022 habura amasaha make ngo irushanwa ritangire.

Ku munsi wa mbere w’iri rushanwa Ikipe y’Igihugu y’Abatarengeje imyaka 18 ni yo yakinnye mbere, ihura n’u Burundi saa Tanu mu gihe abatarengeje imyaka 20 bakinnye na Djibouti saa Cyenda z’amanywa.

Abatarengeje imyaka 18 bakiniye umukino wabo kuri Stade Nyayo naho abatarengeje imyaka 20 bakinira kuri Ulinzi Sports Complex.

Umukino wabaye mbere ntabwo wahiriye Ikipe y'u Rwanda kuko abasore b'Abarundi babatsinze ku kinyuranyo cy'igitego kimwe, umukino urangira ari 45-44.

Undi mukino wa bakuru babo, warangiye u Rwanda U-20 runyagiye Djibouti ibitego 52-20.

Iri rushanwa rizakomeza ku wa Gatatu, tariki ya 26 Ukwakira 2022, amakipe yombi mu batarengeje imyaka 18 na 20 y'u Rwanda akina na Somalia.