Imara Properties yatangaje ko igiye kubaka The Citadel, umushinga wayo wa karindwi w’inyubako zo guturamo, uzaba ugizwe n’amacumbi 42 yo mu rwego rwo hejuru.

Ni inyubako iherereye ku muhanda wa KG 7 Avenue ku Kacyiru mu Karere ka Gasabo, ahantu ushobora kugera mu minota mike uturutse kuri minisiteri zitandukanye na Ambasade ya Amerika. Biteganyijwe ko izi nzu zizashyikirizwa ba nyirazo 2028.

Iyi nyubako izaba ifite amagorofa arindwi, buri imwe iriho amacumbi atandatu, akikije igice cyo hagati kirimo asanseri ebyiri.

Hazaba harimo amacumbi y’icyumba kimwe, bibiri na bitatu byo kuraramo, afite ubuso bwa metero kare 83, 160 na 197 uko bikurikirana.

Ubuhagarike bw’imbere mu macumbi buzaba burenga metero eshatu, naho ibyumba byo kuraramo birenge metero kare 25 z’ubuso.

Izaba irimo ahakirirwa abantu, icyumba cyo gukoreramo imyitozo ngororamubiri, piscine yo mu nzu na parikingi yakira imodoka zirenga 60.

David Benazeraf uyobora Imara Properties wayo, yagize ati “Agaciro KG 7 Avenue ifite i Kigali kagereranywa n’ako Embassy Row ifite i Washington cyangwa Nassim Road muri Singapore. Nta wundi mushinga nk’uyu uzahaba, kandi twashakaga inyubako ikwiranye n’aha hantu.”

Imara isobanura The Citadel nk’ahantu hatekanye ho gutura, hafite ingano ituma abahatuye bisanzura, harinzwe kandi hatanga amahirwe yo kwitegera umujyi uri ahirengeye.

Aimé Bakata Nkunzi uri mu bashinze iyi sosiyete, agaragaza ibintu bitatu bidashobora kwiganwa kuri uyu mushinga ati “Aho umushinga uherereye, ubwiza bw’ibikoresho n’uburyo imirimo y’ubwubatsi ishyirwa mu bikorwa.”

The Citadel ni umushinga wa karindwi wa Imara i Kigali. Kuva mu 2022, iyi sosiyete imaze gushyikiriza ba nyirayo imishinga itanu igizwe n’amacumbi 75 i Rebero na Kibagabaga, atuwemo na ba nyirayo n’abakodesha bakomoka mu bihugu 25.

Biteganyijwe inzu zo mu mushinga The ONE Residence, uherereye ku Kimihurura, zizashyikirizwa ba nyirazo mu 2027.

Aimé Bakata Nkunzi ati “Amacumbi yo mu mishinga yacu yose yagiye agurwa akarangira mbere y’uko ubwubatsi burangira. KG 7 Avenue ni ho hantu twari dutegereje, cyane cyane dutekereza kuri Formula 1 mu Rwanda.”

Imara Properties yashinzwe mu 2020, ni sosiyete y’Abafaransa n’Abanyarwanda izobereye mu mishinga y’imitungo itimukanwa yo kubaka inzu zo guturamo.

Ubuyobozi bwayo buhuza ubunararibonye mpuzamahanga n’ubumenyi bwimbitse ku isoko ry’imbere mu gihugu.