Kuri iyi nshuro mu ndirimbo nshya harimo iy’umwana w’imyaka itandatu witwa Ndikumukiza Samuella Jessie ukoresha amazina ya Jessie mu muziki.

Uyu mwana yashyize hanze indirimbo yise “Imbuto Foundation". Ni indirimbo irimo ishimwe ndetse n’impanuro ku babyeyi n’abana. Se wa Jessie, Producer Ndikumukiza Sam umufasha byihariye mu muziki we akanamutunganyiriza indirimbo ze yavuze ko iyi ndirimbo nshya ‘Imbuto Foundation’ yashibutse ku bikorwa by’Umuryango Imbuto Foundation.

Muri iyi ndirimbo y’imonota itanu n’amasegonda 27, Jessie aragira ati “Nta kibuza imbuto kumera iyo itewe mu butaka bwiza. Gutera imbuto mu bakiri batoya nta kabuza ziramera, utera imbuto mu bakiri batoya nta kabuza arasarura.”

Imbuto Foundation yatuwe iyi ndirimbo, iherutse kwizihiza isabukuru y’imyaka 20 kuko yashinzwe mu 2001 na Madamu Jeanette Kagame.

Yatangiye yitwa PACFA [Protection and Care of Families against HIV/AIDS], wita ku kurwanya icyorezo cya SIDA no kugarurira icyizere ababana n’ubwandu bwa Virusi itera SIDA.

PACFA yaje kwaguka maze mu 2007 ihindurirwa izina yitwa "Imbuto Foundation" yagura ibikorwa mu nzego zitandukanye z’ubuzima, uburezi, kongerera ubumenyi urubyiruko no kwihaza mu bukungu ku miryango itishoboye.

Jessie yamenyekanye ubwo yasubiragamo indirimbo ‘Ushimwe’ ya Tonzi. Yakoze izindi zirimo “Kugendana nawe”, “Ntuzandeka”, “Umuseke utambitse”, “Yesu akunda abana”, “Tuganire” n’izindi.

Nyagasani Wenyine

Ni indirimbo ya Chorale yo muri Kiliziya Gatolika Angelus Dei. Yahimbwe na Padiri André Ntungiyehe. Ije ikurikiye iyo baherutse gusohora mu mezi make ashize yitwa Nimuze Twese Dushimire Imana.

Muri iki gihe Chorale zo muri Kiliziya Gatolika zikomeje kwigaragaza cyane mu ruhando rwa muzika ya gikirisitu (gospel music).

Ni muri urwo rwego hamaze kugaragara indi chorale ikomeye kandi ifite ubushobozi mu bijyanye no kuririmba neza, ari yo Angelus Dei.

Chorale Angelus Dei yatangiye mu 2015, ari itsinda ritoya ry’abaririmbyi n’abanyamuziki rigamije gukundisha abantu indirimbo zo hambere mu buryohe bwazo.

Korali Angelus Dei bivuga Abamalayika b’Imana yaje kuba Chorale ku mugaragaro tariki ya 12 Kamena 2017, yemezwa muri Paroisse Gatolika ya Mutagatifu Andereya i Gitarama tariki 4 Werurwe 2018. Yaririmbye Misa bwa mbere i ‘Gitarama’ tariki ya 25 Werurwe 2018.

Dore Inyange Yera De

Ni indirimbo yahimbwe mu 1987 na Padiri Fabien Hagenimana akirangiza mu iseminari ntoya ya Rwesero. Ni igisigo cy’umwana utewe ishema n’umubyeyi we, akamurata ubwiza kandi akamurata ubutoni yagize ku Mana, we wagiriwe umugisha wo kuba Nyina wa Jambo, rya zina yaduhishuriye mu mabonekerwa y’i Kibeho.

Uretse kugaragaza ubutoni bwa Bikiramariya, harimo no kurata isano iri hagati y’abantu n’Umubyeyi ndetse n’amahirwe ayishingiyeho kuko Bikiramariya ari umubyeyi wita ku bana be bamwiyambaza mu rugamba rwo kunyura Imana no gutsinda ikibi.

Kuri ubu iyi ndirimbo yasubiwemo na Catholic All Stars bafatanije na Aline Gahongayire. Padiri Fabien wayihimbye ni umusaseridoti wa Diyosezi ya Ruhengeri ukorera ubutumwa kuri INES Ruhengeri nk’umuyobozi w’iyo kaminuza.

Praise the Lord

Ni indirimbo ya Iraguha Alain Marius ikubiyemo ubutumwa bwo gusaba abantu gusingiza Imana. Si iyi ndirimbo gusa Alain Marius Iraguha akoze kuko asanzwe afite n’izindi ebyiri zirimo “Umva iri Sengesho”, “Uri Kirisitu” na “Ndakwihaye”.

Iraguha Alain Marius ni umugabo umaze imyaka 12 mu muziki wa Kiliziya ariko igihe kinini yakimaze akorana n’amakorali, aho yatangiriye muri Chorale le Bon Berger ikorera muri Kaminuza y’u Rwanda ishami rya Huye anayiyobora imyaka ibiri aho asoreje amasomo yakomereje muri Chorale Christus Regnat ndetse na Choeur International.

Ntiwankanga

Ni indirimbo y’umuhanzi GSB Kiloz ubusanzwe witwa Iraguha Lando Fils. Igaruka ku mvune abahanzi bakizamuka bahura na zo akabwira abanzi be ko batamukanga ahubwo azakora mpaka ibikorwa biberetse uwo ari we.

GSB akorera umuziki mu Mujyi wa Kigali ndetse amaze gukora ibihangano byinshi. Mu muziki we yibanda ku njyana ya Hip Hop.

Weekend

Ni indirimbo y’umuhanzi Forongo Francis ukoresha amazina ya Yuhi Mic. Iyi iri kuri Extended Play[EP] nshya yise ‘Nizo zabo’ aheruka gushyira hanze.

Iyi EP uyu muhanzi yayise ‘Nizo zabo’. Iriho indirimbo eshanu yahuriyemo n’abandi bahanzi batandukanye. Indirimbo ziriho zirimo iyi yise ‘Weekend’ yahuriyemo na Mistaek na Okkama, ‘My Lord’ yakoranye na Mistaek, Bill Ruzima, Nillan na Ayo Rash. Hari kandi izindi yaririmbye wenyine zirimo ‘Nyongera’, ‘Promise’ na ‘Nizo zabo’ yanitiriye EP.

Yabwoye IGIHE ko EP impamvu “Nizo Zabo”, ari uko muri iyi ndirimbo ashishikariza abantu gukora batitaye ku magambo y’abantu babavuga kuko ari ko kazi kabo ka buri munsi.

Aba-producer bakoze kuri iyi EP barimo Ayo Rash, It’s the Major, Hervis Prod M&M, The Magic, Bob Pro na Flambeau.

Agasenda

Ni indirimbo yahuriyemo abahanzi Social Mula na Alto. Ni indirimbo y’urukundo aho aba bahanzi bishyira mu mwanya w’umusore wemejwe n’umukobwa.

Alto wakoranye indirimbo na Social Mula ubusanzwe witwa Dusenge Eric. Tariki 26 Werurwe 2021, yeruye ko yamaze gutandukana na Ladies Empire byakunze kuvugwa ko yari iya Oda Paccy yabarizwagamo, yerekeza muri TB Music Entertainment.

Fake Gee

Ni amashusho y’indirimbo ya Alyn Sano yashyize hanze mu minsi ishize nyuma yaho amajwi yayo yari amaze iminsi agiye hanze.

Ni indirimbo uyu muhanzi aho aba yihaye umusore bakundanye amubeshya hakiyongeraho ko n’ubusanzwe atari umusore wari usanzwe umuhaza mu buriri.

Mu magambo ye, Alyn Sano yagize ati “Reka nguhe Ikinyarwanda, uteka ibyo utazi guhisha..." Aya magambo yumvikana nk’acyurira umusore bakundanaga wamubeshye urukundo, bikarangira amubabaje.

Uyu mukobwa aheruka kubwira IGIHE ko yayihimbye agendeye ku byamubayeho n’umusore bakundanye ariko akaba n’ubundi ari ibintu yari asanzwe abona muri sosiyete nyarwanda.

Indembo

Ni indirimbo nshya y’umuhanzi Mico The Best. Iyi ndirimbo ntabwo yerura ngo avuge icyo yashakaga kuvuga ariko umuntu wakurikiye neza ahita yumva ko yashakaga gucyurira umukobwa aba avuga ko yari azi ko gufata neza abasore mu gitanda nyuma agasanga afitemo uburambe.

Nana

Ni indirimbo nshya y’umuhanzi Kevin Kade. Irimo ubutumwa bugaragaza umusore wihebeye umukobwa ku buryo amubuze byamugiraho ingaruka. Hari aho aririmba ati “Nkubuze iruhande ndaremba byo gupfa nkabura imbaraga. Unjyana kure.”

Iwacu

Ni indirimbo nshya ya Mani Martin. Iyi ndirimbo irimo umudiho wa Kinyafurika. Uyu muhanzi aba avuga ibyiza by’u Rwanda. Hari aho aririmba ati “Uzaza ndabizi nuza uzarara, iwacu i Rwanda haracyarangwa ubuntu. Iwabo w’abantu haracyarangwa ubuntu.”

Comeka

Ni indirimbo y’umuhanzikazi Momolava wamenyekanye mu muziki w’u Rwanda mu myaka yashize, yashyize hanze mu minsi ishize nyuma y’imyaka itatu yari amaze atagaragara.

Uyu mukobwa yakoze indirimbo nshya yise ‘Comeka’. Ije nyuma y’igihe nta gihangano akora. Ni indirimbo y’urukundo aho umukobwa aba abwira umuhungu ko yamwihebeye bityo akwiriye kureka gushyira amaso ku bandi.

Yavuze ko nta kintu kidasanzwe cyatumye ayihimba ahubwo yari yicaranye muri studio na Element wayikoze mu buryo bw’amajwi, we n’abandi bahanzi bari kumwe barimo Passy Kizito, Kevin Skaa, Khalifan na Niyo Bosco bakagira igitekerezo cyayo, irakorwa.