00:00:00 IGIHE NETWORK KN KINYARWANDA EN ENGLISH FR FRANCAIS

Ntiza amatwi nkumvishe ‘Rwa Hip Hop’, Album y’Umuraperi Racine

Yanditswe na Mahoro Vainqueur
Kuya 16 September 2022 saa 02:09
Yasuwe :

“Gambana ndabumva mu nda ya mama, ndazira ubusa ku bw’uburyohe mwakunze, ndapfuye. Mwarasetse cyane, mama akora ku matako ye data akuramo umukarandara w’abamasayi, muterana udutoma umunwa udoma ku wundi , dodoma muyitera dewodora haratoha.”

Ayo ni amwe mu magambo ari mu ndirimo ziri kuri ‘album’ Kamatari Thierry aherutse gushyira hanze, aho aba agaragaza agahinda ku mwana uri mu nda ya nyina nyuma yo kugerwaho n’amakuru y’uko inda ye igiye gukurwamo.

Kamatari uvugwa hejuru ni umuraperi uzwi nka Racine, umusizi, akaba umwanditsi w’umuhanga mu gutondeka amagambo no kuyaririmba mu buryo buryoheye amatwi bikaba akarusho ku bakunzi b’injyana ya Hip Hop.

Kuva ku ifoto igaragara inyuma kuri uyu muzingo (album) ukajya ku iriburiro kugera kuri ‘Kamatari’, buri murongo uri n’igitekerezo kiri mu ndirimbo 13 zigize ‘Rwa Hip Hop’ umuzingo mushya wa Racine wose ugaruka ku gahinda gakabije kibasiye benshi muri iki gihe.

Ku muntu uzi kumva neza akabasha gusobanukirwa amagambo akoreshwa mu ndirimbo za Hip-Hop, yumva ko kuri iyi album yiswe ‘Rwa Hip Hop’, uyu muraperi aririmba asa n’uwihebye cyangwa ufite ikibazo cy’ihungabana n’agahinda gakabije.

Ku rundi ruhande ariko ni ubuhanzi! Abasizi akenshi baririmba ibibakikije biboneka muri sosiyete babarizwamo ariko hari n’ibiba byubakiye kuri bo nk’uko uwabasha kumva neza ‘Rwa Hip Hop’ yahita abona ko ariko bimeze.

Nibura 90% by’indirimbo ziri kuri ‘Rwa Hip Hop’ zigaruka ku gahinda gakabije [depression], kimwe mu bibazo byugarije umuryango Nyarwanda kuva mu bakiri bato kugera ku bageze mu zabukuru, ahanini baterwa n’ibibazo bitandukanye.

Iby’ibanze wamenya kuri ‘ Rwa Hip Hop’

Ifoto iranga iyi album igaragaraho abantu batatu barimo umukobwa usa na Racine atwite aryamye ku gitanda cyo kwa muganga, hariho kandi umuganga ugiye gukuramo inda [uyu nawe urebye neza ubona ko asa na Racine] ndetse n’umusore nawe usa na Racine ubona ko yihebye nk’ushobora kuba ariwe wateye inda uwo mukobwa.

Iriburiro [Intro] rya ‘Rwa Hip Hop’ isoza Racine yibaza niba ‘bazumva iyi album ye’ kuko hari abamubwiye ko aririmba imirongo myinshi batarimo kuyumva.

Muri rusange indirimbo 13 ni ‘Intro, No name, Mom, Umwuzukuru, Nkawe, Injajwa, Leta, Intrude, Kamatari,i Bugande, Ikanzu, Wait for me ndetse na Story.

Rwa Hip Hop igaragaraho abahanzi barimo Prime Mazimpaka, Symphony Band, Glory Majesty, Ish Teachy, Marcelo Messenger, na Umutagatifu Utazwi.

Aba –Producers bayikozeho barimo Kina Beat, Koze, Logic Hit, Master Beat, The Major n’abandi.

Twumve ‘Rwa Hip Hop’

Hari igisobanuro cya buri ndirimbo ndetse na buri murongo wanditse muri uyu muzingo witiriwe ‘Rwa Hip Hop’ nk’inkundura nshya yazanywe na Racine yo kumenyekanisha no guhesha ikuzo iyi njyana yakunze kwitwa iy’umujinya cyangwa iy’agahinda.

Urugero rw’indirimbo yitiriwe uyu muhanzi ‘Kamatari’, umwanditsi ari nawe uyiririmba aba avuga ku nkuru y’umuntu ugiye kuvuka akaza ku Isi aho amubwira ko azayihuriramo na byinshi mbere yo kiyivamo.

Itangira agira ati “Ndi mu ruzinduko na misiyo yo kuri iyi Si, natwawe [gutwitwa] amezi icyenda, mvuye iwacu iyo kure, ntinya gusubirayo, inzira ni itaka nshorezwa igitugu, nzarinda ntaha data nkitaka.”

“[…], twaje nk’imbaga urugamba rukarishye, bamwe basaza abandi bicwa njye mba ndarize, isoni, ubwoba kudatuza utarya utanishye, aho twisanze, dusanga igeno ryacu ripangiye [riteguye]. Bamwe bamagiye [bafite umwaku] abandi baseka, bikanga wakoze […].”

Muri iyi ndirimbo, Racine akomeza agaragaza uburyo mu Isi yahuriyemo n’ibirimo indwara, abagamburuzwa n’inda n’ibindi byinshi cyane, agasoza avuga ko yitwaga Kamatari warwaniye mu Rwanda.

Indirimbo yise “Mom” ivuga inkuru y’umuntu wabuze umubyeyi nyamara yari ageze mu gihe cyo kumukorera ibyiza no kumushimira nk’umubyeyi wabyaye neza kandi wagize imvune zo kurera umwana.

Ni indirimbo yumvikanisha Racine cyangwa indi mfubyi yuzuye intimba yo kubura nyina.

Ayisoza asa n’uwandikira urwandiko nyina ndetse n’abandi bagifite ababyeyi.

Ati “Mama ubu nasoje amashuri , nabonye akazi keza ,ntabwo nigeze nywa ibitabi n’amayoga nk’uko wabimbuzaga […] wowe ugifite ababyeyi ni amahirwe y’imboneka rimwe wibasuzugura ayo mahirwe hari benshi bayabuze.”

Imwe mu ndirimbo iri kuri ‘Rwa Hip Hop’ Racine yahuriyemo n’abandi ni ‘Nkawe’ yakoranye n’itsinda rya Symphony.

Ni indirimbo ivuga ku nkuru y’umwana warezwe n’ababyeyi badashobotse bityo akababwira ko yifuza kumera nkabo.

Inkuru yo muri iyi ndirimbo ivuga ku mwana ukura abona se cyangwa ababyeyi bahora barwana agakura yifuza kuba nk’umwe muri bo.

Atangira aririmba ati “Nzaba nkawe, nywe inzoga nk’uko data wabaye, njye nkubita umugore wanjye nk’uko Mama mubanye, nzabyara abana 10 ntafite ubushobozi, njye mbicisha inzara mbyite ubuyobozi, nzamenya uko itabi risa sinzajya muri Misa […].”

Iyo avuga ku mubyeyi w’umugore aririmba mu kajwi karangururira hejuru agira ati “ […] nzambara nkawe mbona wambara ibintu bigufi, nzatera abagabo irari nk’uko mbona ubikozwa, nzurizwa indege n’uburiri nk’uko mbona ubikozwa, nzacana inyuma cyane nk’uko ujya ubikorera Dady [Papa] nk’uko, nzajya nkuramo abana n’ubwo […]”

Indirimbo ‘No name’ ni indirimbo yakoze ameze nk’umwana bagiye gukuramo utarageza igihe cyo kuvuka.

Mu ndirimbo harimo amagambo agira ati “Gambana ndabumva mu nda ya mama, ndazira ubusa ku bw’uburyohe mwakunze, ndapfuye mwarasetse cyane mama akora ku matako ye data akuramo umukarandara w’abamasayi , muterana udutoma umunwa udoma ku wundi , dodoma muyitera dewodora haratoha.”

“[…] Munzingiye mu isashe munjugunye iyo mu myanda, dore nzize ibyaha byaha byanyu […] ndapfuye ntazi Isi.”

‘Wait for me’ ni indirimbo yumvikanamo avuga umuntu wigaragaza uko atari imbere mu mutima cyangwa muri we.

‘Injajwa’ ni inkuru aho aba ameze nk’uwagiye kwa Gihanga wa hanze u Rwanda yasubiye mu bihe bya kera amubwira uko ubuzima bumeze muri 2022.

Indi ndirimbo niyo yise ‘i Bugande’ yakozwe na Kina Beat iri mu njyana ya Drill Racine yumvikana aririmba abaza akanisubiza.

Ni inkuru y’umusore w’icyamamare wagiye gutereta umukobwa nyuma bakamwanga bitewe n’uko ameze bakamubwira ko azaraswa agahunga ajya Uganda , muri iyi ndirimbo aririmba yandika urwandiko asobanura ibyabaye.

Indirimbo yitwa ‘Ikanzu’ akorane na Glory Majesty, Ish Teachy, Marcelo Messenger, na Umutagatifu Utazwi, irimo amagambo y’abantu bihebye bibaza impamvu Imana yemera ko ibintu bibi biba ku bantu bayo.

Hariho nk’amagambo agira ati “Watwaye mama , urwaje Data nihe wumva naguhera , nabakuramya nabo ntabakagwira ( bamwe babayeho nabi).”

Kuri iyi Album kandi hariho indirimbo ebyiri Story na Nkawe zitarangijwe neza mu buryo bw’amajwi (Music Mastering), Racine avuga ko atazirangije kubera ubushobozi bwabaye buke agahitamo kuzishyiraho zitarangiye.

Ifoto iri kuri iyi album ya Racine nayo ikoze mu buryo butangaje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .