Cassandra, umuhanzikazi mushya wihebeye injyana ya Dancehall

Yanditswe na Dusabimana Aimable
Kuya 18 Werurwe 2018 saa 07:00
Yasuwe :
0 0

Cassandra ni umuhanzikazi mushya mu muziki ugezweho, yiyemeje kwiyegurira injyana ya Dancehall ndetse afite intego yo kuzayimenyekanisha mu Rwanda ikakirwa nk’uko ikunzwe mu bindi bihugu.

Uyu mwari ubusanzwe witwa Uwase Françoise, avuga ko yatangiye umuziki mu mpera z’umwaka ushize ariko yifuza kwaguka mu bikorwa no gukora umuziki ukundwa. Yatangiriye ku ndirimbo zivuga ubutumwa bw’urukundo gusa ahamya ko azakomereza no ku zindi ngingo.

Yabwiye IGIHE ko afite intego yo gukundisha Abanyarwanda injyana ya Dancehall akora abinyujije mu gukora ibihangano byayo byinshi no kubimenyekanisha ari na ko azamura izina rye mu bakora umuziki mu Rwanda.

Cassandra avuga ko yasunikiwe gukora umuziki no kudacika intege ndetse n’urukundo awufitiye no kuba yumva ko yawukora. Ati "Ikintu cyawe ubundi ntaho wagicikira, bikwirukamo mu myaka yose ugasanga n’ubundi uhora ubyisangamo."

Yongeyeho ati "Nshaka gukora injyana ya Dancehall ku buryo abanyarwanda bayiyumvamo bakayimenya nk’uko ikundwa muri Jamaica cyangwa Uganda. Ndashaka Abanyarwanda bumva ko injyana ya Dancehall ari umuziki nk’uko bumva RnB na Hip Hop ndetse ikaba yajya no mu byiciro bitangwamo ibihembo mu marushanwa."

Yakomeje agira ati "Nayihisemo nkurikije uburyo ikunzwe cyane n’urubyiruko cyane cyane abakunda kubyina. Nshaka kumva ko nayikora nkayigeza ku rwego rwo hejuru n’Abanyarwanda bakayiyumvamo cyane. Nkunda umuziki cyane kandi numva ko nawukora nk’akazi atari ukuvuga ngo ni ukwishimisha. Ni ikintu numva ko nakora nk’akazi byampira nkakigeza no ku rwego mpuzamahanga."

Yavuze ko kugeza ubu mu bihangano amaze gukora yibanze ku butumwa bw’urukundo ariko mu mishinga yindi azagenda akora ngo yiteguye kuvuga ku ngingo zitandukanye zigaragaza impano afite mu muziki.

Amashusho y’indirimbo ya mbere yakoze yayise "Nemeye". Yayikurikije iyitwa "It’s your time".

Ku kibazo cy’imyambarire n’imbyino bikunze kunengwa kwangiza umuco, Cassandra avuga ko ari uko abantu batari bumva neza ko kwirekura mu mashusho biyaryoshya. Yongeraho ko biba akenshi imyambaro inengwa atari yo usanga abahanzi bambaye mu bihe bwite byabo.

Ati "Usanga umuntu uri mu muziki aba atandukanye no mu buzima busanzwe, imyambaro ikoreshwa mu mashusho ntabwo ari yo yambarwa mu buzima busanzwe. Umuntu yambara imyenda imutandukanya n’undi muntu usanzwe, biri mu biha ishusho y’ubuhanzi ukureba."

Avuga ko imbogamizi abatangira umuziki bahura na zo cyane ari ukubona aho bamenera ariko byose bitewe n’ubushobozi buba bugoye kuboneka.

Cassandra, umuhanzikazi mushya ushaka gukundisha Abanyarwanda injyana ya Dancehall

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .