00:00:00 IGIHE NETWORK KN KINYARWANDA EN ENGLISH FR FRANCAIS

Aba-Producers bagezweho bari inyuma ya zimwe mu ndirimbo ziri guca ibintu

Yanditswe na Uwiduhaye Theos
Kuya 15 Ukwakira 2021 saa 08:19
Yasuwe :
0 0

Uko bukeye n’uko bwije umuziki w’u Rwanda ugenda utera imbere ndetse abawukora yaba abaririmbyi cyangwa se abawutunganya bakagenda bisukiranya.

Ku batunganya indirimbo muri iyi minsi uretse Element uri guca ibintu ndetse usa nk’aho yihariye isoko ry’umuziki hari n’abandi benshi bafite impano itangaje ariko badakunze kuvugwa cyane kuko ari we umaze kugwiza ibikorwa byinshi kubarusha kandi akaba afite akaboko kahiriwe muri iki gihe mu gutunganya indirimbo.

Benshi muri bo iyo muganiriye bakubwira ko ari ibintu byabajemo kuva bakiri bato bikagenda bikura uko imyaka yicuma kugeza aho ubu muri iki bari kubibyaza umusaruro bikaba ari byo bibatunze.

IGIHE yakusanyije aba-producers batandukanye batanga icyizere cyo gukomeza gutanga umusanzu mu guteza umuziki w’u Rwanda imbere.

Niz Beatz

Uyu musore w’imyaka 24 yavukiye mu Karere ka Rusizi. Ni uwa gatatu mu bana batanu. Mu buhamya bwe avuga ko yatangiye gutunganya indirimbo mu 2013 abikorera mu rugo mu 2015 abitangira nk’akazi.

Ati “ Gutunganya indirimbo nabitangiye mu 2013 nkorera ‘beat’ mu rugo gusa mu 2015 nibwo nabitangiye nk’akazi kantunze kugeza uyu munsi nyuma yo guhura n’aba-producers bagiye bamfasha kubigeraho.”

Uyu musore akora injyana zose gusa avuga ko kubera ko mu Rwanda muri ibi bihe baharaye Afrobeat ari zo zumvikana aba yakoze. Mu 2017 yakoze muri Country Records kugeza mu 2019 akoze iye yise One Touch.

Abatunganya indirimbo afatiraho urugero barimo Jr. Rotem , Dj Coublon, Selebobo na Scott Storch.

Yifuza kuba utunganya indirimbo urenze urwego rw’igihugu. Ati “ Ndifuza kuzazamura izina ryanjye nkaba producer mpuzamahanga no gufasha abana bifuza kwiga gukora indirimbo nk’uko nanjye hari abamfashije kubigeraho.”

Uyu musore zimwe mu ndirimbo yakoze zigakundwa zirimo ‘Igikwe’ ya Gabiro Guitar na Confy, ‘Say my Name’ ya Kenny Sol, ‘Buri gihe’ ya B-Threy n’izindi.

Niz Beatz ni umwe mu batunganya indirimbo bagezweho

Bailey Pro

Ubusanzwe yitwa Rwema Eloi Bailey afite imyaka 23. Yavukiye Kacyiru. Avuka mu muryango w’abana barindwi barimo abakobwa babiri n’abahungu batanu.

Afite umwihariko wo kuba akora injyana za hip hop. Avuga ko yahisemo gukora iyi njyana kubera ayikunda.

Ati “Nahisemo iyi njyana kubera ko nkiri umwana nakundaga kumva umuziki w’ubwoko bwose ariko hip hop nkumva ifite indi ubundi buryohe kubera uburyo yabaga iremereye. Indi mpamvu ni ukubera ko inshuti zanjye nyinshi ari urubyiruko kandi zirayikunda kubera ibyishimo no gusabana ibazanira bityo bigatuma nkomeza kuyikora.”

Mu batunganya indirimbo afatiraho urugero harimo Lex Luger, TM88, Sonny Digital, 808 Melo, Rxckson.

Uyu musore yakoze indirimbo zitandukanye zirimo ‘Toto Mtosso’ ya Ish Kevin, ‘Nsengera’ ya Racine, ‘Baddest’ ya SoldierKid n’izindi.

Ayoo Rash

Ubusanzwe yitwa Élisée Raha afite imyaka 22. Ni ikinege iwabo. Yavukiye muri Repubulika Iharanira Demokarasi ya Kongo [RDC]. Yatangiye gutunganya indirimbo muri Nyakanga 2019. Agaragaza ko yatangiye gukunda umuziki akiri muto.
Ati “Nari nsanzwe ncuranga mu rusengero nyuma ntangira kwiyumvamo gutunganya indirimbo gutyo gake gake. Nkora injyana zose ariko cyane cyane pop kuko niyo igezweho cyane.”

Yatangiye akorera muri Auvis Record ibarizwa i Remera, ubu akorera muri The Mane Label Music ya Bad Rama. Avuga yemera producer umwe rukumbi ariwe Dj Snake.

Yakoze indirimbo zitandukanye zirimo ‘Away’ ya Juno Kizigenza na Ariel Wayz, ‘Please me’ ya Juno Kizigenza, ‘La vida Loca’ ya Ariel Wayz, ‘Bella’ ya Mr Kagame n’izindi.

Ayo Rash nimwe mu batunganya indirimbo bagezweho

Kina Beat

Uyu musore ubusanzwe yitwa Nshimiyimana Clement. Yavutse ku wa 13 Werurwe 1997. Yasoje amashuri ye mu cyiciro cya mbere cya kaminuza aho yarangirije muri IPRC Kicukiro mu 2019, yize ishami rya Multimedia. Amaze imyaka itatu atangiye gukora indirimbo aho akorera muri Studio ya Coffee Sound Music.

Avuga ko gukora umuziki atari ibintu byamujemo gutyo gusa kuko akiri umwana yagaragazaga ibimenyetso byo gukunda, umuziki ndetse akagenda agerageza ibintu bitandukanye birimo kuririmba no kubyina ariko byose bikaza kumwangira akaza kwisanga atunganya indirimbo.

Avuga ko yatangiye akora beat z’indirimbo ameze nk’uwishimisha ndetse abavandimwe be bakajya bamuseka.

Ati “Natangiye kugerageza ibyo gutunganya niga mu mashuri yisumbuye mu gihe abandi babaga bahuze bari mu bindi njye nabaga ndi kugerageza gukora indirimbo. Ntabwo numvaga ko bizaba umwuga ahubwo numvaga ari ukwishimisha.”

Amaze gukora indirimbo zitandukanye zirimo iz’abahanzi bari kwitwara neza nka B Threy, Ish Kevin n’abandi benshi bari gutanga icyizere mu muziki nyarwanda. Afite umwihariko w’uko ari we mu ba-producers bari kuzamuka ndetse n’abandi bamubanjirije, wo gukora injyana ya Drill music cyane n’izindi ziganjemo Trap Musi nubwo avuga ko n’izindi zose yazikora.

Uyu musore ni we wakoze indirimbo zitandukanye zirimo ‘Mood’ ya B-Threy na Bulldogg, ‘Njyewe utazi’ Logn Joe aheruka gushyira hanze n’izindi zitandukanye.

Santana

Ubusanzwe yitwa Kayiranga Joachim Bonny afite imyaka 24. Yavukiye mu Karere ka Musanze. Avuka mu muryango w’abana babiri. Yatangiye gutunganya indirimbo mu buryo bw’umwuga mu 2019.

Avuga ko injyana hafi ya zose azikora ariko akaba yibanda cyane kuri RnB na Afro Beat.

Ati “Injyana zo hafi ya zose ndazikora Ariko nibanda ku ziririmbitse RnB na Afrobeats, si ukuvuga ko ari zo nahisemo ahubwo nk’abahanzi bagiye batandukanye nkorera nsanga higanjemo abaririmbyi kurusha abaraperi. Bivuze ko nzikora kubera abangana ariko n’undi ukora indi njyana iyo ariyo yose twakorana.”

Na we aba-producers afatiraho urugero avugamo Schott Storch wakoreraga abiganjemo 50 Cent.

Ni we wakoze indirimbo zitandukanye zirimo iza Niyo Bosco nka ‘Ubigenza ute’ na Piyapuresha, iza Dorcas na Vestine nka ‘Nahawe ijambo’, ‘Adonai’ ‘Ibuye’ , ‘Byambera’ na ‘Warankomye’ za Alto, ‘Ubunyunyusi’ ya Mico The Best n’izindi.

Heavy Kick

Uyu musore afite imyaka 25 ubundi yitwa Kigero Simplicité. Yavukiye Nyamagabe. Avuka mu bana babiri akaba ari we bucura. Yatangiye gukora umuziki mu 2015 ariko avuga ko yatangiye kuwukunda akiri muto.

Ati “Natangiye mbyina nyuma nza kuririmba. Nabonye abatunganya indirimbo bantenguha nigira inama yo kwiga gukora indirimbo. Kugira ngo mbigire umwuga binambesheho nanjye mbashe kwikorera umuziki wanjye.”

Ijyana yibandaho harimo Afro Beat, Hip Hop, RnB na Dancehall. Avuga ko impamvu yibanda kuri izi njyana ari uko muri Afurika zikunzwe cyane kurusha izindi kandi nawe akaba azikunda.

Yahereye muri Unlimited record nyuma aza kujya muri Infinity akomereza muri muri Kigali Record ari naho abarizwa. Afatira urugero kuri Producer Tekno wo muri Nigeria usanzwe anaririmba, na ho mu Rwanda ni Paster P ndetse na Bob Pro.

Intego afite ni ugushinga ishuri ryo gutunganya indirimbo, ati “Intego ni ugukora ishuri ryigisha gukora indirimbo no kuzamura impano z’abana batoya. Ndifuza kuzamura label yanjye ikagera kure. Iyi label yanjye nise Shodebellah Crick ibarizwamo umuhanzi Ivanova.”

Ni we wakoze indirimbo zirimo ‘Umutoso’ ya Muchoma na the Ben, ‘Why’ sintex, ‘Waruzuye’ ya Yvanny Mpano, ‘Nzaza’ ya Kigali records all stars, ‘Kideyo’ ya Victor Rukotana n’izindi.

Heavy Kick ni umwe mu basore bafiye impano mu gutunganya indirimbo

Pro Zedd

Ubusanzwe yitwa Ngabonziza Shema Darcin. Avuga ko yatangiye kwiga gutunganya indirimbo mu 2015.

Ati “Gukora indirimbo nabitangiye mu 2015 ari software ya FL Studio mbonye nkajya nyifashisha nkora beat, biza kuvamo akazi. Mfite intumbero yo kuzana ibintu bishyashya abantu badasanzwe bazi mu muziki wo mu Rwanda.”

Zimwe mu ndirimbo amaze gukora zirimo album yitwa ‘Nicyo Gituma’ ya B Threy, ‘Whatever’ ya Logan Joe na Kivumbi, ‘Brocode’ ya Ish Kevin, Og2Tone, Ririmba na Kenny K Shot, ‘Mukarukundo’ yahurijemo Ririmba, Og2tone na Arnaud Gray, ‘King Kong’ yahuriyemo Kivumbi King, Kenny K-Shot na Ish Kevin n’izindi.

Uyu musore akorera muri Loud Sound Music. Mu gutunganya indirimbo kwe yibanda ku njyana zirimo Hip Hop, Pop, Drill Music na RnB.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .