00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo eshanu zazamuye umurindi w’abakunzi b’umuziki muri East African Party

Yanditswe na Mahoro Vainqueur
Kuya 2 Mutarama 2023 saa 03:09
Yasuwe :

Igitaramo cya East African Party cyabaga ku nshuro ya 14 cyari gifite umwihariko w’abahanzi 12 b’abanyarwanda, bikaba ari ibintu byari bibaye bwa mbere mu myaka yose icyo gitaramo kimaze kiba.

Abahanzi bose bageze muri iki gitaramo bakoze ibishoboka byose ngo bagerageze gushimisha abakunzi babo , batoranya zimwe mu ndirimbo zabo bazi ko zishobora gukirigita amarangamutima y’abakunzi babo.

Nubwo buri muhanzi yaririmbye indirimbo azi neza ko zakunzwe, aha tugiye kugaruka ku ndirimbo 5 zakuye benshi mu byicaro byabo.

‘Ndagutegereje cyane’ – King James

Iyi ni indirimbo ya Rumuhuriza James [King James] yakoze mu myaka isaga 10 ishize. Nubwo imaze iyo myaka yose , uyu muhanzi ntiyakanzwe no kuyiririmba mu gitaramo gisa n’icyabanjirije ibindi mu 2023.

Uyu musore udakunze kugaragara mu bitaramo byinshi, yaririmbye indirimbo nyinshi zishimiwe cyane gusa ageze kuri ‘Ndagutegereje cyane’ ibintu byahise bihinduka, buri wese arahaguruka abyinana n’uyu muhanzi.

‘Amakosi’ – Ish Kevin

Iyi ni indirimbo y’ umuraperi Ishimwe Semana Kevin [Ish Kevin] yakoze mu 2021, ifatwa nk’imwe muzatumye izina rye rikomera cyane mu Rwanda no hanze yarwo.

Uyu muraper wagaragarijwe urukundo bikomeye , ubwo yari ageze kuri iyi ndirimbo abakunzi be bamucaniye amatoroshi bamwereka ko bamwishimiye.

Yaririmbanye nabo kuva ku ijambo rya mbere kugeza kuryanyuma , bamugarariza ko ishobora kuba ariyo ndirimbo y’ibihe byose kuri we.

‘Nywe’ – Nel Ngabo

Nelson Byangabo Cyusa [Nel Ngabo] akigera ku rubyiniro muri iki gitaramo, yahereye kuri iyi ndirimbo abafana bamwakirana yombi baririmbana na we ubona ko bamaze kuyimanya neza barimbana nawe badategwa.

Ni indirimbo uyu muhanzi yakoze mu 2021 . Kugeza ubu aho uyumvise hose ubona abantu bayishimiye bitewe n’ubutumwa buyigize.

‘Abanyabirori’ – Riderman

Iyi ni indirimbo y’umuraperi Gatsinzi Emery [Riderman] yagiye akoresha mu bitaramo bitandukanye guhera mu bihe bya Primus Guma Guma Super Star kugeza n’ubu iracyakunzwe.

Ubwo yari mu gitaramo cya East African Party, uyu muhanzi yaririmbye indirimbo nyinshi afatanya n’abakunzi be, ariko ubwo yageze kuri iyi ndirimbo ibintu byahinduye isura, ufite ifirimbi arayivuza abandi nabo bati “Pipilili pipi” kugeza avuye ku rubyiniro basigara bayiririmba.

‘Henzapu’ – Bruce Melodie

Mu 2021 nibwo Itahiwacu Bruce [Bruce Melodie] yakoze iyi ndirimbo yakunzwe n’umubare munini w’abafana be ndetse n’abakunda umuziki muri rusange.

Uyo muhanzi ubwo yari mu gitaramo cya East African Party , yishimiwe cyane binyuze mu ndirimbo nka ‘Funga macho’, ‘Urabinyegeza’ na ‘Kungola’ gusa ubwo yari ageze kuri ‘Henzapu’ ibintu byahise bindura isura.

Byari bigeze mu masaha ya saa munani z’igicuku gusa abakunzi b’umuziki ntibakanzwe n’amasaha, barimbanye n’uyu muhanzi bagira bati ‘Ntawe twese byaranze’ amwe mu magambo ayigize.

Izindi ndirimbo zagerageje gukora ku mitima ya benshi muri iki gitaramo cyabeye mu ijoro rya tariki ya 1 Mutarama 2023, zirimo , Mu mutashye ya Dream Boys na Jay Polly yaririmbwe na Platini P , Agatunda ya Afrique, Tsaper na Puculi za Okkama na Radiyo ya Alyn Sano.

Inkuru bijyanye: Bwa mbere igitaramo cya EAP cyihariwe n’Abanyarwanda, bagaragaza itandukaniro (Amafoto)


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .