Iki gitaramo gitegerejwe ku wa 3 Mutarama 2026, kizabera muri BK Arena cyateguwe na Visit Rwanda ku bufatanye n'ibigo nka Skol, RwandAir, ndetse na Banki ya Kigali, kugira ngo aba bahanzi b’Abanya-Jamaica batangire umwaka bataramira abakunzi babo.

Muri iki gitaramo, imiryango izafungura saa kumi z’umugoroba, aho abazitabira bazasusurutswa na DJ Lamper mu kuvanga imiziki naho MCs Rocky Try na Michel Legrand bakiyobore.

Ibiciro by’amatike bihera kuri 20.000 Frw, 30.000 Frw, 70.000 Frw, 100.000 Frw na 150.000 Frw. Abafite amakarita ya Banki ya Kigali bagabanyirizwa 30% ku giciro cy’itike.

Skol Malt nk’umwe mu bafatanyabikorwa b’iki gitaramo yashyizeho uburyo bwo guha abakiliya amahirwe yo gutsindira amatike y’igitaramo n’ibindi bihembo byashyizwe mu bice bitandukanye mu mujyi wa Kigali.

Kuwa Gatatu tariki 31 Ukuboza 2025, birabera La Noche na KCC, Kuwa Kane, tariki ya 1 Mutarama 2026, bizakomereza kuri KCC naho Ku wa Gatanu, tariki 2 Mutarama amatike azatangirwa kuri Paddock na KCC.

Chinsea Linda Lee wamamaye nka Shensea, ni umwe mu bahanzi bagezweho mu muziki w’Isi.

Yavutse tariki 1 Ukwakira 1996. Kugeza ubu amaze guhatanira ibihembo bibiri bya Grammy Awards, mu 2021 no mu 2023.

Uyu mugore afite umubyeyi ukomoka ku mubyeyi w’Umunyafurika ariko w’umunya-Jamaica mu gihe se umubyara we ari Umunya-Koreya.

Shensea yamenyekanye mu ndirimbo nka Hit and Run, Lighter, Blessed n’izindi nyinshi zatumye izina rye riba ikimenyabose mu muziki w’Isi.

David Constantine Brooks wamamaye nka Mavado ni umwe mu bazamuwe na DJ Khaled binyuze muri ‘We the best music group’ mbere yo kunyura muri Cash Money na Republic Records.

Uyu muhanzi yamenyekanye cyane mu 2013 ubwo yakoraga indirimbo ‘Give it all to me’ yahuriyemo na Nick Minaj n’izindi zirimo Father God, Not Perfect, n’izindi zirimo Progress.