00:00:00 IGIHE NETWORK KN KINYARWANDA EN ENGLISH FR FRANCAIS

Korali El Shadai yikije ku gaciro ko kwizera mu ndirimbo nshya

Yanditswe na IGIHE
Kuya 10 October 2023 saa 10:00
Yasuwe :

El-Shaddai Choir and Ministry (EL-CHOM) yashyize hanze indirimbo ikubiyemo ubutumwa buganisha ku gusaba abantu gutegereza amasezerano y’Imana bihanganye.

Iyi ndirimbo yasohokanye n’amashusho yayo yitwa “Ku bwo Kwizera”, igizwe n’iminota itanu n’amasegonda 51.

El-Shaddai Choir and Ministry (EL-CHOM) ni korali ikorera ivugabutumwa rinyuze mu ndirimbo mu Badiventisiti b’Umunsi wa Karindwi mu Itorero rya Bibare ku Kimironko.

Indirimbo yayo nshya yanditswe na Ntwari Joseph usanzwe ari Umutoza wayo mu bijyanye n’Imiririmbire.

Ntwari yabwiye IGIHE ko ubutumwa buyirimo bugamije gukangurira abantu kwizera ko ibyo babwiwe n’Imana bizasohora.

Ati “Harimo ubutumwa bwiza bufite imbaraga, buhamagarira umuntu wese uri kuyumva kugerageza gukoresha kwizera kwe mu Mana kugira ngo yakire amasezerano y’ibyo Imana yamuvuzeho.’’

Igitekerezo cyo kuyandika cyavuye mu ijambo mwarimu wa korali usanzwe ari n’umubwirizabutumwa yateguye akakigisha mu materaniro ariko akifuza no kukinyuza mu nganzo.

Yakomeje ati “Yifuje kutakibwiriza mu magambo gusa ahubwo agishyira no mu buryo bw’indirimbo.’’

Mu kuyandika yashingiye ku ngero mpamo z’inkuru zo muri Bibiliya z’abo Imana yagiye isohoreza amasezerano.

Ntwari yahaye umukoro abakunzi b’ibihangano byabo gukomeza kwizera kwabo kuko gushobora kurema ibifatika.

Yakomeje ati “Turashishikariza abakunzi bacu kugerageza gukora umwitozo wo gukoresha kwizera kwabo mu Mana nk’uko bivugwa mu ndirimbo, bizarema ikintu. Nibakomeze kudushyigikira, basangiza inshuti zabo ubu butumwa bwiza buhindura ubuzima.’’

El-Shaddai Choir and Ministry ifite imishinga yo gukomeza gushyira hanze indirimbo aho yiyemeje ko nibura buri kwezi izajya isohora imwe. Ni mu rugendo rwo gutegura igitaramo gikomeye iteganya gukora mu mwaka utaha.

Iyi korali yatangiye umurimo w’ivugabutumwa mu mwaka wa 1998, kuri ubu ifite abaririmbyi 38.

El-Shaddai Choir and Ministry yagiye ikora umurimo mu bihugu bitandukanye nk’u Rwanda, Uganda, Repubulika Iharanira Demokarasi ya Congo na Kenya. Indirimbo zayo ziri mu ndimi zivugwa mu bihugu by’Akarere birimo Ikinyarwanda, Ikigande, Igiswahili, Icyongereza n’Igifaransa.

El-Shaddai Choir and Ministry (EL-CHOM) ikorera ivugabutumwa rinyuze mu ndirimbo mu Badiventisiti b’Umunsi wa Karindwi mu Itorero rya Bibare
Iyi korali ifite abaririmbyi 38
Korali El Shadai yasohoye indirimbo yise “Ku bwo Kwizera” isubizamo abantu umuhate wo gukomeza kwizera ko ibyo babwiwe n'Imana bizasohora
El-Shaddai Choir and Ministry ifite imishinga yo gukomeza gushyira hanze indirimbo aho yiyemeje ko nibura buri kwezi izajya isohora imwe
Iyi korali yatangiye umurimo w’ivugabutumwa mu mwaka wa 1998

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .