00:00:00 IGIHE NETWORK KN KINYARWANDA EN ENGLISH FR FRANCAIS

Mukansanga yabaye Umunyarwandakazi wa mbere usifuye Imikino Olempike (Amafoto)

Yanditswe na Eric Tony Ukurikiyimfura
Kuya 21 Nyakanga 2021 saa 04:57
Yasuwe :
0 0

Umusifuzi mpuzamahanga, Mukansanga Salma Rhadia, yabaye Umunyarwandakazi wa mbere usifuye Imikino Olempike aho yayoboye umukino Ubwami bw’u Bwongereza bwatsinzemo Chile ibitego 2-0 kuri uyu wa Gatatu.

Mu gihe habura iminsi ibiri ngo Imikino Olempike ya Tokyo 2020 ifungurwe ku mugaragaro, hatangiye kuba imikino inyuranye irimo n’iy’umupira w’amaguru.

Umusifuzi mpuzamahanga w’Umunyarwandakazi, Mukansanga Salima yasifuye umukino wo mu itsinda E wahuje Ikipe y’Ubwami bw’u Bwongereza n’iya Chile i Sapporo mu Buyapani.

Uyu mukino warangiye Ubwami bw’u Bwongereza butsinze Chile ibitego 2-0, byombi byinjijwe na Ellen White usanzwe ukinira Manchester City y’Abagore.

Igitego cya mbere cyabonetse ku munota wa 18 ubwo Lauren Hemp yatangaga umupira kuri White mu gihe icya kabiri cyinjiye ku mupira watanzwe na myugariro Lucy Bronze ku munota wa 73.

Gutsinda uyu mukino byafashije Ubwami bw’u Bwongereza kuyobora itsinda mu gihe u Buyapani butarakina na Canada.

Mu yindi mikino imaze kuba, Suède yatsinze Leta Zunze Ubumwe za Amerika ibitego 3-0, Brésil itsinda u Bushinwa 5-0 mu gihe u Buholandi bwanyagiye Zambia ibitego 10-3.

Mukansanga Rhadia Salma uri gusifura muri iyi mikino, yaherukaga gutoranywa mu basifuzi umunani bo muri Afurika, bazatoranywamo abazasifura Igikombe cy’Isi cy’Abagore cya 2023 muri Nouvelle-Zélande.

Asanzwe ari mu basifuzi bahagaze neza muri Afurka aho yasifuye Igikombe cy’Isi cy’Abagore cyabereye mu Bufaransa mu 2019 n’icya Afurika cy’Abatarengeje imyaka 23 cyabereye mu Misiri mu 2019.

Mu mpera z’umwaka ushize, uyu musifuzi w’Umunyarwandakazi yatoranyijwe muri 20 babigize umwuga muri Afurika, bahawe amasezerano y’umwaka umwe na CAF.

Stade Sapporo Dome yabereyeho umukino mu Buyapani
Abakinnyi bagize Ikipe y'Ubwami bw'u Bwongereza babanje mu kibuga
Abakinnyi ba Chile babanje mu kibuga
Umutoza mukuru wa GB, Hege Riise, atanga amabwiriza ku bakinnyi be
Ellen White atsinda igitego cya mbere nyuma yo kunyuza umupira kuri Christiane Endler
Ellen White yishimira igitego hamwe na Steph Houghton
Umusifuzi w'Umunyarwandakazi, Mukansanga Salma asanga abakinnyi b'Ubwami bw'u Bwongereza gusubira mu kibuga bagakina nyuma yo kwishimira igitego
Mukansanga yifashishije ikoranabuhanga rya VAR ku byemezo bimwe na bimwe
Mukansanga yereka abakinnyi aho batereka umupira
Rachel Daly ahanganiye umupira na Daniela Zamora wa Chile

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .