Uyu mukinnyi w’imyaka 25 yegukanye isiganwa ry’ibilometero 21,09 akoresheje iminota 57 n’amasegonda 10.

Ibihe yakoresheje byatumye agabanya amasegonda 10 ku byaherukaga gukoreshwa n’Umunya-Ethiopia Yomif Kejelcha mu isiganwa ryabereye mu Mujyi wa Valence mu 2024.

Kiplimo yisubije agahigo ke yari yarafashe mu 2021 ubwo n’ubundi yatsindaga iri siganwa ry’i Lisbon akoresheje iminota 57 n’amasegonda 31.

Uyu mukinnyi umaze kwegukana Shampiyona y’Isi ya Cross-country inshuro eshatu, yakoresheje kandi iminota 56 n’amasegonda 42 i Barcelone mu mwaka ushize, ariko ibyo bihe ntibyahawe agaciro n’Ishyirahamwe Mpuzamahanga ry’Imikino Ngororamubiri kubera abo bakinanye.

Nyuma yo gutsindira i Lisbon ku Cyumweru, Kiplimo yagize ati “Nishimiye cyane guca agahigo k’Isi. Nyuma y’ibilometero 10 bya mbere, natangiye gutekereza ko bishoboka. Nagerageje gukomeza ku muvuduko umwe mu bilometero bibiri bya nyuma.”

Umunya-Kenya Nicholas Kipkorir yabaye uwa kabiri akoresheje iminota 58 n’amasegonda umunani mu gihe mugenzi we Gilbert Kiprotich yabaye wa gatatu yakoresheje iminota 58 n’amasegonda 59.

Mu bilometero bitanu bya mbere, Kiplimo yari amaze gukoresha iminota 13 n’amasegonda 28, agera mu bilometero 10 yakoresheje iminota 27. Ku kilometero cya 15, yari amaze gukoresha iminota 40 n’amasegonda 52 mu gihe ibilometero bitanu bya nyuma yabyirutse mu minota 13 n’amasegonda 31.

Jacob Kiplimo yisubije agahigo ko ku rwego rw’Isi mu gusiganwa igice cya Marathon